މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލައި އަލަށް އުފައްދާ މީޑިއާ އެންޑް ބްރޯޑްކާސްޓިން ކޮމިޝަނުގެ މެޖޯރިޓީ ސަރުކާރު އަތުގައި އޮވެއްޖެނަމަ ރާއްޖޭގައި މީޑިއާގެ މިނިވަންކަން ނޯންނާނެ ކަމަށް ރާއްޖޭގައި ފާހަގަކޮށްލެވޭ ސީނިއާ ނޫސްވެރިއެއް ކަމަށްވާ އަހުމަދު ޒާހިރު (ހިރިގާ) ވިދާޅުވެއްޖެ އެވެ.
ހަތް މެންބަރުންގެ މައްޗަށް އާ ކޮމިޝަން އެކުލަވާލާއިރު، ހަތަރު މެންބަރުން އައްޔަން ކުރަނީ ރައީސުލްޖުމްހޫރިއްޔާ މަޖިލީހަށް ނަން ފޮނުވައިގެން މަޖިލީހުގެ ރުހުމާއެކު އެވެ. ތިން މެންބަރުން ހޮވަނީ މީޑިއާތަކުގެ މެދުގައި ބާއްވާ އިންތިހާބަކުންނެވެ. އަދި މީޑިއާ ކޮމިޝަންގެ ރައީސް އާއި ނައިބު ރައީސް އައްޔަން ކުރާނީ ރައީސުލްޖުމްހޫރިއްޔާ އެވެ.
ހިރިގާ "އަދަދު" އަށް ވިދާޅުވީ އާ ކޮމިޝަނުގައި ކޮމްޕޮޒިޝަން އޮންނަން ޖެހޭނީ ތިންބައިކުޅަ ދެބައި އޮންނަން ޖެހޭނީ މީޑިއާތަކަށް ކޮންޓްރޯލް އޮންނަ ގޮތަށް ކަމަށާއި ސަރުކާރުގެ ބައިވެރިވުމެއް ކޮމިޝަނުގައި ބާއްވަން ބޭނުންވާނަމަ ލާން ޖެހޭނީ ތިން ބައިކުޅަ އެއްބައި މެންބަރުން ކަމަށެވެ.
"މެޖޯރިޓީ އެއްވެސް ހާލެއްގައި އޮވެއްޖެއްޔާ އޭގެ މާނައަކީ ފްރީ މީޑިއާއެއް ހިންގުމަށް އޮންނަ ދައުރު ގެއްލެނީ. ތިންބައިކުޅަ ދެބައި މީޑިއާތަކަށް އޭގެ ކޮންޓްރޯލް އޮންނަ ގޮތަށް ކޮމްޕޮޒިޝަން ފޯމްވާން ޖެހޭނީ،" ހިރިގާ ވިދާޅުވި އެވެ.
މީޑިއާކައުންސިލްގެ ގާނޫނަކީ ސެލްފް ރެގިއުލޭޓް ކުރެވޭ ގޮތަށް އޮތް ރަނގަޅު ގާނޫނެއްކަން ފާހަގަ ކުރައްވާ ހިރިގާ ވިދާޅުވީ އެ ގާނޫނު ހަދާފައި ވަނީ އެތައް ބުރަ މަސައްކަތަކުން ބޭރުގެ ވެސް އެހީއާ އެކު ކަމަށެވެ.
ހިރިގާ ވިދާޅުވީ މީޑިއާ ކައުންސިލްގެ ގާނޫނަށް އެތައް އަހަރެއް ވެގެންދިޔައިރު އެ ގާނޫނަށް ދިމާވެފައި އޮތް މައްސަލަތަކަށް ވެސް އެޑްރެސް ނުކުރާ ކަމަށާއި ގާނޫނު ރަނގަޅަށް ތަންފީޒު ވެސް ނުކުރާ ކަމަށެވެ.
އޭގެއިތުރުން ހިރިގާ ވިދާޅުވީ ބިލު އޭގެ ޒާތުގައި އައިސްފައި އޮތީ ޑިމޮކްރަސީ ގަބޫލުކުރާ ހަމަތަކުގައި ފައިހަމަވާ ގޮތަށް ނޫން ކަމަށާއި ބިލުތައް އަންނަން ޖެހޭނީ ޑިމޮކްރަސީގެ ބެސްޓް ޕްރެކްޓިސްއާ އެއްގޮތްވާ ގޮތުގެ މަތިން ކަމަށެވެ.
"ވަރަށް ބޮޑު ކަންބޮޑުވުމެއް މި ރާއްޖޭގައި އަހަރުން ބަލައިގަންނަ ކަހަލަ ގާނޫނު އަސާސީ އާއި މަލްޓިޕާޓީ ޑިމޮކްރަސީއާ ފައިހަމަވާ ގޮތަކަށް ނޫން އެ ބިލު އެއޮތީ އޭގެ ޒާތުގައި. އަހަރެން ފަންޑަމެންޓަލީ ގަބޫލުކުރަނީ އަހަރެމެންގެ ޑިމޮކްރަސީގެ ބެސްޓް ޕްރެކްޓިސްތެރެއާ ފައިހަމަވާ ގޮތަށް ޕެރަލަލްވާ ގޮތަށް ބިލުތައް އަންނަން ޖެހޭނީ އޭގެ ޒާތުގައި. އެ ބިލަކީ މިދެންނެވި މަަފްހޫމާ ފިޓުވާ ބިލެއް ގޮތުގައި އަޅުގަނޑަށް ނުފެނޭ،" ހިރިގާ ވިދާޅުވި އެވެ.
ބިލު ހުށަހެޅިއިރު މީޑިއާ ދާއިރާގައި އުޅުއްވާ އެއްވެސް ބަޔަކާ މަޝްވަރާ ނުކުރާ ކަމަށާއި ދާއިރާއާ ގުޅޭ ބޮޑެތި ނިންމުންތައް ނިންމާއިރު ދާއިރާއާ ގުޅޭ މީހުންނާ މަޝްވަރާ ކުރަން ޖެހޭނެ ކަމަށް ވެސް ހިރިގާ ވިދާޅުވި އެވެ.
އެ ބިލްގައިވާ ގޮތުން އަލަށް އުފައްދާ މީޑިއާ ކޮމިޝަނުން ހަދާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ނޫހާއި މަޖައްސާ ޖޫރިމަނާ ކުރެވޭނެ އެވެ. އަދި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުން ޖޫރިމަނާ ކުރުމުގެ ބާރު ވެސް ލިބެ އެވެ.
