ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ މަޝްރޫއުގެ ބޮޑު ބަޔެއް ފަންޑުކުރަމުން އަންނަ ސައުދީ ފަންޑް ފޯ ޑިވެލޮޕްމެންޓުގެ ސީއީއޯ، ސުލްތާން އަބްދުއްރަހުމާން އަލް މަރްޝަދު އާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްދަލު ކުރައްވައިފި އެވެ.
ސައުދީއަރަބިއްޔާގެ ރިޔާދުގައި ކުރިއަށްދާ ޖޮއިންޓް އަރަބް އިސްލާމިކް އެކްސްޓްރާއޯޑިނަރީ ސަމިޓުގެ ހަވާސާގައި ބޭއްވި ބައްދަލުވުމުގައި ސައުދީ ފަންޑުގެ އެހީގައި ރާއްޖޭގައި ކުރިއަށް ގެންދާ މަޝްރޫއުތަކާ ގުޅޭގޮތުން މަޝްވަރާ ކުރި ކަމަށް ރައީސް އޮފީހުން ބުންޏެވެ.
އެ ގޮތުން ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތާއި މަސްވެރިކަމުގެ ސިނާއަތާ ގުޅުންހުރި އެކި މަޝްރޫއުތައް މުއްދަތަށް ނިންމުމަށް ކުރަންޖެހޭ އެންމެހައި މަސައްކަތްތައް ކުރާނެކަމުގެ ޔަގީންކަން ދެފަރާތުން ވެސް ދިން ކަމަށް ރައީސް އޮފީހުން ބުންޏެވެ.
އޭގެ އިތުރުން ރާއްޖެ އާއި ސައުދީ ފަންޑާ ދެމެދު އޮންނަ ގުޅުން އިތުރަށް ވަރުގަދަކުރުމަށް ވެސް މަޝްވަރާ ކުރި ކަމަށް ރައީސް އޮފީހުން ބުންޏެވެ.
މައި އެއާޕޯޓުގެ ޓާމިނަލް ތަރައްގީކުރަން ހިންގާ މަޝްރޫއަށް އެއް ފަރާތަކުން އެންމެ ގިނަ ފައިސާ ފޯރުކޮށްދީފައި ވަނީ ސައުދީ ފަންޑުންނެވެ. އެ މަޝްރޫއުގެ މައި ކޮންޓްރެކްޓަރަކީ ސައުދީ ކުންފުންޏެއް ކަމުގައިވާ ސައުދީ ބިން ލާދިން ގްރޫޕެވެ. ނަމަވެސް އަމަލީ މަސައްކަތްތައް ކުރަނީ އެ މަޝްރޫއުގެ ސަބްކޮންޓްރެކްޓަރު، ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އިންނެވެ.
