ކަނޑުގެ ރާޅާއި އޮއިން ހަކަތަ އުފައްދަން ސްޓެލްކޯއިން ދިރސާއެއް ކުރަން ފަށާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.
ފަހުމީ "އެކްސް" ގައި އިއްޔެ ކުރެއްވި ޕޯސްޓެއްގައި ވިދާޅުވީ އެ ދިރާސާއިން ކަނޑުގެ އޮއިން ހަކަތަ އުފެއްދޭނެ ގޮތްތަކެއް ހޯދުމާއެކު، ސޯލާއަށްވުރެ ބޮޑަށް އެކަން ފުޅާކޮށް ދެމެހެއްޓިނިވި ގޮތެއްގައި މަސައްކަތްތައް ކުރެވޭނެ މަގުތައް ހުޅުވިގެންދާނެ ކަމަށެވެ.
"މަޝްރޫއުގެ ދަށުން ކަނޑުގެ ރާޅުތަކަކީ ފައިދާހުރި ހަކަތައިގެ ވަސީލަތެއްގެ ގޮތުގައި އޮތުމުގެ ފުރުސަތު ދެނެގަތުމަށް ހަރުދަނާ ޑޭޓާ އެއްކުރުމާއި އެނަލައިޒް ކުރުން ހިމެނޭ،" ފަހުމީ ވިދާޅުވި އެވެ.
ފަހުމީ ވިދާޅުވީ ކަނޑުގެ ރާޅުތަކަކީ އިރުގެ ހަކަތައަށްވުރެ މޫސުމުގެ ހާލަތުގެ އަސަރު ކުޑަ ރާޅުތަކަކަށްވާތީ، ހަކަތައިގެ ސަޕްލައި މިހާރަށްވުރެ ހަރުދަނާ ގޮތެއްގައި ފޯރުކޮށްދެވިދާނެ ކަމަށެވެ.
ދިރާސާގެ އަލީގައި ސްޓެލްކޯގެ އަމާޒަކީ މިހާރު ހުރި އިއާދަކުރަނިވި ވަސީލަތްތައް ފުރިހަމަ ކުރާނެ ގޮތް ދެނެގަނެ، މިހާރަށްވުރެ ހަރުދަނާ އިތުބާރު ކުރެވޭ ހަކަތައިގެ ގްރިޑެއް ގާއިމު ކުރުން ކަމަށް ވެސް ފަހުމީ ވަނީ ވިދާޅުވެފަ އެވެ.
ރާއްޖޭގައި ބޭނުންކުރާ ކަރަންޓުގެ 33 ޕަސަންޓަކީ އިޔާދަ ކުރަނިވި ހަކަތައިން ބޭނުންކުރާ ކަރަންޓަށް 2028 ގައި ހެދުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
