އޮކްޓޯބަރު 28، ގައި މޯލްޑިވްސް މީޑިއާ ކައުންސިލުން ދިން ނޫސްވެރިކަމުގެ އިނާމަށް އިންސާފުކުރި ފަނޑިޔާރުން އެކި ދާއިރާތަކަށް ދިން މާކްސްތަކުގެ ތަފުސީލާއި ރުބްރިކްސް އަދި ރުބްރިކްސް އަދި ފަނޑިޔާރުންގެ ރިޕޯޓު މޯލްޑިވްސް މީޑިއާ ކައުންސިލް (އެމްއެމްސީ) އިން އާންމުކޮށްފި އެވެ.
އެމްއެމްސީން މިރޭ އެކްސްގައި ކުރި ޕޯސްޓެއްގައި މި ތަފުސީލުތައް އާންމުކުރީ، އިނާމުގެ އިންސާފުވެރިކަމާ ގުޅުވައި އެވޯޑުގެ ފަނޑިޔާރުންގެ ގޮތުގައި މަސައްކަތް ކުރެއްވި ބޭފުޅުން ނެރުއްވި ބަޔާނުގައި ކޮށްފައި ހުރި ތުހުމަތުތައް އެ ކައުންސިލުން ދޮގުކުރިތާ 24 ގަޑިއިރު ފަހުންނެވެ.
އެގޮތުން ހަ ފަނޑިޔާރުން އެކުލަވާލި ރިޕޯޓާއި ކޮންމެ ދާއިރާއަކަށް ހުށަހެޅުނު ލިޔުންތަކާއި އުފެއްދުންތަކަށް ލިބިފައިވާ މާކްސް އަދި ވަކި ވަކި ދާއިރާތަކަށް ކޮންމެ ފަނޑިޔާރަކު މާކްސް ދިނުމުގައި ބޭނުންކުރި ރުބްރިކްސްގެ ކޮޕީ އެމްއެމްސީން މިރޭ ވަނީ އާންމުކޮށްފަ އެވެ.
މިދިޔަ އަހަރު ދިން ހިޔާލުތައް އެމްއެމްސީން ބަލައިގަނެ ބައެއް ކަންކަން ރަނގަޅު ކޮށްފައިވާ ކަމަށާއި ނަމަވެސް އަންނަ އަހަރަށްވެސް ރަނގަޅު ކުރަން ޖެހޭ ބައެއް ކަންކަން ފަނޑިޔާރުންގެ ރިޕޯޓުގައި ފާހަގަކޮށްފަ އެވެ.
މި އަހަރުގެ އެވޯޑުގައި އެންމެ ބޮޑަށް މަޝްހޫރު ވެގެންދިޔައީ، ރައީސް ޑރ. މުހައްމަދު މުއިއްޒުގެ ދޮންމަންމަ، ސްރީ ލަންކާގެ ރައްޔިތެއްކަމުގައިވާ، ޖީ ސްކީލާން ރާއްޖޭން ބްލެކްލިޓުކޮށް ޑީޕޯޓުކޮށްލި ގޮތާއި އޭނާ ކުރި ތުހުމަތުތަކުގެ މައްޗަށް އަދަދު ނޫހުން ތައްޔާރުކުރި "ސްކީލާން" ގެ ނަމުގައި "އަދަދު" ނޫހުން ގެނެސްދިން ޑޮކިއުމެންޓަރީއަށް ވީޑިއޯ އޯޑިއޯ ކެޓެގަރީން ތަހުގީގީ ނޫސްވެރިކަމުގެ ދާއިރާގެ އެވޯޑު ލިބުމެވެ.
އެ އެވޯޑު ދިނީ އެ ކެޓެގަރީއަށް އިންސާފު ކުރި ޕެނަލުގައި ހިމެނުނު ހުރިހާ ފަނޑިޔާރުން ސޮއިކޮށް ކައުންސިލަށް ފޮނުވި މާކުސް ޝީޓުގައި އެވޯޑު ލިބޭ ވަރަށް މާކުސް ލިބިފައި އޮތުމުން ކަމަށެވެ. އެކަން މިރޭ ނެރުނު ލިޔުންތަކުން ވަނީ ކަށަވަރުވެފަ އެވެ. ފަނޑިޔާރުން ސްކީލާން ޑޮކިއުމެންޓަރީއަށް ވަނީ ޖުމްލަ 69 މާކްސް ދީފަ އެވެ. އެވޯޑުގެ އުސޫލުގައިވާ ގޮތުން އެވޯޑު ލިބޭ އުފެއްދުމަކަށް އެންމެ މަދުވެގެން ލިބެން ޖެހެނީ 65 މާކުހެވެ.
މީގެއިތުރުން، ތަހުގީގީ ނޫސްވެރިކަމުގެ ރޮނގުން ނޫސްވެރިން ރިސްކީ، ބުރަ މަސައްކަތްތަކެއް ކޮށް ފެންވަރުމަތީ އުފެއްދުންތަކެއް ހުށަހަޅާފައިވާ ކަމަށްވެސް ފަނޑިޔާރުން ވަނީ އެ ފަރާތްތަކުގެ ރިޕޯޓުގައި ވިދާޅުވެފަ އެވެ.
މި ލިޔުންތައް އެމްއެމްސީން އާންމުކޮށްފައިވާއިރު، ނޫސްވެރިކަމުގެ އިނާމާ ގުޅޭ މައްސަލަތަކެއް ތަހުގީގު ކުރަން ކަމަށް ބުނެ އެންޓި ކޮރަޕްޝަން ކޮމިޝަނުން (އޭސީސީ) އިންވެސް އިއްޔެ ވަނީ އެ ކައުންސިލަށް ވަދެ މި ލިޔެކިޔުންތަކުގެ ކޮޕީތަކެއް ގެންގޮސްފަ އެވެ.
އަދި، މި މަހު 10 ގެ ކުރިން އެވޯޑާ ގުޅޭ އާންމު ރިޕޯޓެއް އެކުލަވާލާ ސްކީލާން ޑޮކިއުމެންޓަރީއަށް ދިން އެވޯޑު އަތުލުމާމެދު ގޮތެއް ނިންމަންވެސް އެމްއެމްސީން ވަނީ ނިންމާފަ އެވެ. އެ ރިޕޯޓު އަދި އާންމެއް ނުކުރެ އެވެ.
