ވެރިކަމާ ހަވާލުވެވަޑައިގެންނެވި ދުވަހުން ފެށިގެން މިއަދާ ހަމައަށް ވެސް ދިވެހި އަސްކަރީ އަދި ދިފާއީ ބާރު ވަރުގަދަ ކުރުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށް ވިދާޅުވެ، އެ މަސައްކަތް އިތުރަށް ފުޅާ ކުރައްވައި އިތުރު ޑްރޯންތަކެއް ގަންނަން އުޅޭ ކަމުގެ އިޝާރާތެއް ރައީސް ޑރ. މުހައްމަދު މުއިއްޒު މިރޭ ދެއްވައިފި އެވެ.
ނަސްރުގެ ދުވަސް ފާހަގަ ކުރުމަށް ދަރުބާރުގޭގައި ބޭއްވި ޖަލްސާގައި ރައީސް ވިދާޅުވީ ފާއިތުވި އަހަރުގެ ތެރޭގައި މި ޒަމާނަށް ފެތޭ ގޮތަށް އަދި ކުރިއަށް އޮތް ދުވަސްތަކުގައި ވެސް މުހިންމު ފެންވަރަކަށް އަސްކަރިއްޔާގެ ބާރު ގަދަ ކުރުމުގެ މަސައްކަތްތަކެއް ކުރެވުނު ކަމަށެވެ. އަދި އެ މަސައްކަތް އިތުރަށް ފުޅާ ކުރައްވައި އިތުރު ޑްރޯންތަކެއް ގަނެފާނެ ކަމުގެ އިޝާރާތެއް އެމަނިކުފާނު ދެއްވި އެވެ.
"އެހެންވީމާ އެގޮތުން އެއާ ކޯ ގާއިމު ކުރެވުނު މި ޒަމާނުގެ އެންމެ ޒަމާނީ ޓެކްނޮލޮޖީ ހިމެނޭ ޔޫއޭވީތައް ގެނެވި އަޅުގަނޑުމެންގެ ބޮޑު އިކޮނޮމިކް ޒޯނު ބެލެހެއްޓޭނެ ފަދަ ގާބިލިއްޔަތު އަޅުގަނޑުމެންގެ ސިފައިންގެ ކިބައިގައި ގާއިމު ކުރެވިގެންދިޔަ އިރާދަކުރެއްވީތީ، އަދި އެ މަޝްރޫއު އިތުރަށް ފުޅާ ކުރެވިގެން އެ ދަނީ،" ރައީސް ވިދާޅުވި އެވެ.
ދިވެހިރާއްޖޭގެ އަސްކަރިއްޔާގައި ފުރަތަމަ ފަހަރަށް އެއާ ކޯ އުފައްދަވައި ތިން ޑްރޯން ގެނައީ މި އަހަރުގެ މާޗު މަހުހަ އެވެ. އެ ޑްރޯންތަކުގެ ތަފުސީލު ހާމަ ނުކުރި ނަމަވެސް، ގަނެފައި ވަނީ ތުރުކީގެ ބައިކާރު ކުންފުނިން އުފައްދާ ބައިރަކުތާރު ޓީބީ - 2 ޑްރޯންތަކެކެވެ.
ރައީސް ވިދާޅުވީ މިއަދު އިފުތިތާހު ކުރި ކޯސްޓުގާޑުގެ ބޯޓު ސްކޮންޑްރަން އަކީ ވެސް އަސްކަރިއްޔާގެ ބާރު އިތުރު ކުރުމަށް ގެންގުޅުއްވާ ސިޔާސަތުގެ ތެރެއިން ކުރެއްވި ކަމެއް ކަމަށެވެ. އެގޮތުން ކޯސްޓުގާޑު ދެގުނަ ކުރުމުގެ މަސައްކަތް މިހާރު ކުރަމުންދާ ކަމަށް ރައީސް ވިދާޅުވި އެވެ.
"ކަނޑުއޮތްގިރި އެ ވަނީ މިހާރު ސިފައިންނާ ކޯސްޓުގާޑާ ހަވާލު ކުރެވިފައި، އެ ތަނަކީ ކޯސްޓުގާޑުގެ މި ދެންނެވިހެން ފްލީޓު ބޮޑުކޮށް ދެމެހެއްޓުމުގައި މައި މަސައްކަތް ކުރާނެ ތަނަށް ވާނެ،" ރައީސް ވިދާޅުވި އެވެ.
އޭގެ އިތުރުން ރައީސް ވިދާޅުވީ ރާއްޖޭގެ އެކި ކަންކޮޅުގައި ހުރި އަސްކަރީ މަރުކަޒުތައް ހުރީ އެންމެ ރަނގަޅަށް ނުބެލެހެއްޓުމުގެ ސަބަބުން ވަރަށް ބޮޑަށް ވީރާނާވެފައި ކަމަށެވެ. އެހެންކަމުން އެތަންތަން އަލުން މަރާމާތު ކުރުމަށް ބޭނުންވާ ފައިސާ ހޯދުމަށް ބައެއް ގައުމުތަކުގައި އެހީއަށް އެދިފައިވާ ކަމަށް ރައީސް ވިދާޅުވި އެވެ.
"އެތަންތަން ވެސް އިރާދަކުރެއްވީތީ، އެކުވެރި ދައުލަތްތަކުގެ އެހީތެރިކަމަށް މިހާރު ވާނީ އެދިފައި، އިރާދަކުރެއްވީތީ މި އަންނަ އަހަރު ތެރޭގައި މި ދެންނެވި ހުރިހާ މަރުކަޒުތައް އެފަދަ ފަރާތްތަކުގެ އެހީތެރިކަމާ އެކީގައި ހެދިގެން ދާނެ، އަދިވެސް ވަރަށް ގިނަ ކަންތައްތަކެއް އަޅުގަނޑުމެން ކުރުމަށް މިވަނީ ފަށާފައި،" ރައީސް ވިދާޅުވި އެވެ.
ކިޔެވުމުގެ ފެންވަރު ދަށް ވުމުގެ ސަބަބުން މަތީ ތައުލީމުގެ ފުރުސަތުތަކާއި ވަޒީފާތަކުން ބާކީވެފައި ތިބި ފުރާވަރު އުމުރުފުރައިގެ ޒުވާނުން ސިފައިންނާއި ފުލުހުންގެ ގޮތުގައި ތަމްރީނުކުރަން އަންނަ އަހަރު ފަށްޓަވާނެ ކަމަށް ވެސް ރައީސް މިރޭ އިއުލާނު ކުރެއްވި އެވެ. މި ޕްރޮގްރާމުގެ ދަށުން ކުރިއަށް އޮތް ހަތަރު އަހަރުގެ ތެރޭގައި ސިފައިންގެއަށް 4000 ޒުވާނުން އަދި ފުލުހުންގެ ވަޒީފާއަށް 1000 ކުދިން އިތުރު ކުރައްވާނެ ކަމަށް ރައީސް ވިދާޅުވި އެވެ.
