މޯލްޑިވްސް މީޑީއާ ކައުންސިލް (އެމްއެމްސީ) ގެ އެޑްވައިސަރީ ކޮމިޓީއަށް އެންގުމަކާ ނުލައި އެ ކައުންސިލްގެ ރައީސް އަހުމަދު މުސްތަފާ ބަޔާނެއް ނެރުމުން އެޑްވައިސަރީ ކޮމިޓީގެ މެންބަރުކަމުން ނޫސްވެރިޔާ މޫސާ ރަޝީދު އިސްތިއުފާ ދީފި އެވެ.
އިސްތިއުފާ ދިނުމަށްފަހު މޫސަ ފޮނުވި ސިޓީގައި ބުނީ، އެމްއެމްސީގެ އެޑްވައިޒަރީ ކޮމިޓީ އަކީ އެމްއެމްސީ ނެރޭ ބަޔާންތައް ނެރުމުގަޔާއި އާންމުންނާއި މީޑިއާތަކަށް މައުލޫމާތު ދިނުމުގައި އެ ކައުންސިލުގެ ރައީސަށް ލަފާދިނުމަށް އޮންނަ ކޮމިޓީއެއް ކަމަށެވެ.
"ނަމަވެސް ނޮވެމްބަރު 1، 2024 ގައި ކައުންސިލުން ނެރެފައިވާ ބަޔާނަކީ އެ ކޮމިޓީގެ މަޝްވަރާއެއް ނެތި އަދި އަޅުގަނޑު ހިމެނޭ ގޮތަށް ކޮމިޓީގެ ބައެއް މެންބަރުންނަށް އެނގުމަކާ ނުލާ ނެރެފައިވާ ބަޔާނެއް،" މިހާރު ނޫހުގައި މަސައްކަތްކުރާ ނޫސްވެރިޔާ މޫސަގެ ސިޓީގައިވެ އެވެ.
ކޮމިޓީގެ ލަފައެއް ނެތި ކައުންސިލުން ބަޔާން ނެރޭ ނަމަ އެފަދަ ކޮމިޓީގެ މެންބަރެއްގެ ގޮތުގައި ހުރުމުގެ ބޭނުމެއް ނެތް ކަމަށާއި އިސްތިއުފާ ދޭން ނިންމީ އެ ސަބަބާހުރެ ކަމަށް ވެސް މޫސަ ބުނެފައިވެ އެވެ.
މީޑިއާ ކައުންސިލުން ބުދަ ދުވަހުގެ ރޭ ބޭއްވި 2023 ވަނަ އަހަރުގެ ނޫސްވެރިކަމުގެ އިނާމުގައި ތަހުގީގީ ދާއިރާއިން ނޫސްވެރިކަމުގެ އިނާމު "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ލިބުމާއެކު ސަރުކާރަށް ތާއީދުކުރާ ފަރާތްތަކާއި ޕަބްލިކް ސާވިސް މީޑިއާއިން ވެސް ވަނީ އެކަމާ ދެކޮޅަށް ވާހަކަ ދައްކައިފަ އެވެ.
އެގޮތުން، ޖަލްސާ ލައިވް ކުރަމުން ދަނިކޮށް އެ ޖަލްސާގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު ވީޑިއޯއެއް ދެއްކި ކަމަށް ބުނެ މީޑިއާ ކައުންސިލުގެ މައްސަލަ ޕީއެސްއެމުން ވަނީ ރައްޔިތުންގެ މަޖިލީހަށް ވެސް ފޮނުވައިފަ އެވެ. އެ ބަޔާނާއެކު ޕީއެސްއެމްގެ ވަޒީފާގައި ހުރި އެމްއެމްސީގެ ރައީސް މުސްތަފާ ވަނީ މަގާމުން ވެސް ވަކިކޮށްފަ އެވެ.
ނަމަވެސް، ހުކުރު ދުވަހު އޭނާއަށް ވަނީ އަނބުރާ ވަޒީފާ ދީފަ އެވެ. ވަޒީފާ ދިނުމުން މުސްތަފާ ބުނީ އެވޯޑު ހަފުލާގައި އޭނާގެ ބައިވެރިވުމެއް ނެތް ކަމަށާއި "ސްކީލާން" ޑޮކިއުމެންޓަރީގައި މައްސަލަތަކެއް އުޅޭ ކަމަށެވެ. މޫސަގެ އިސްތިއުފާގެ ސިޓީގައި ރިއާޔަތް ކޮށްފައިވަނީ މި ބަޔާނަށެވެ.
