މޯލްޑިވްސް މީޑިއާ ކައުންސިލުން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމުގައި "އަދަދު" ނޫހަށް ހަތަރު ދާއިރާއަކުން އިނާމު ލިބިއްޖެ އެވެ.
ސިޔާސީ ދާއިރާއިން ނޫސްވެރިކަމުގެ އިނާމު ހާސިލުކުރީ "އަދަދު" ގެ އެސޯސިއޭޭޓް އެޑިޓަރު ހަސަން މުހައްމަދު އެވެ. އެއީ "ޕްރޮކްސީ ވޯޓު، ދަފްތަރުގެ މައްސަލަ އަދި ބަހުސް: ފުރަތަމަ ޕްރައިމަރީގެ ތާރީހީ ތަޖުރިބާ" ގެ ސުރުހީގެ ދަށުން އޭނާ ލިޔެފައިވާ ލިޔުމަކަށެވެ.
ކުޅިވަރު ދާއިރާއިން ނޫސްވެރިކަމުގެ އިނާމު ހާސިލުކުރީ "އަދަދު" ގެ އެސޯސިއޭޓް އެޑިޓަރު އައްޒާމް އަލިފުޅު އެވެ. އެއީ, "އިހުމާލުވެފައި އޮތް ފުޓްސަލް ބަަދަލުވީ ނުފޫޒުގަދަ ކުޅިވަރަަކަށް!" ގެ ސުރުހީގައި އޭނާ ލިޔެފައިވާ ރާއްޖޭގެ ފުޓްސަލްގެ ހާލަތާ ގުޅޭ ރިޕޯޓެކެވެ.
ވީޑިއޯ ޑޮކިއުމެންޓަރީގެ ދާއިރާއިން އިނާމު ލިބުނީ މުހައްމަދު މިރާން ނާޝިމްއަށެވެ. އެއީ "ކަނދޮޅުދޫން؛ ފަނޑުނުވި ހަނދާންތަކެއް، މަސްހުނި އިހުސާސްތަކެއް" ނަމުގައި ތައްޔާރުކުރި ޑޮކިއުމެންޓަރީއަށް ލިބުނު އިނާމެކެވެ. މިއީ 2004 ވަނަ އަހަރުގެ ސުނާމީގެ ސަބަބުން ރ. ކަނދޮޅުދޫން ބަދަލުވި މީހުންގެ ތެރެއިން ބައެއްގެ މީހުންގެ ތަޖުރިބާތަކާ ގުޅޭގޮތުން ތައްޔާރުކުރި އުފެއްދުމެކެވެ.
އޭގެ އިތުރުން ތަހުގީގީ ދާއިރާއިން ނޫސްވެރިކަމުގެ އިނާމު "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ވެސް ވަނީ ލިބިފަ އެވެ.
