ލިޒްބަން (އޮކްޓޫބަރު 30) - ސްޕޯޓިން ލިޒްބަންގެ ކޯޗު، ރުބެން އަމޮރިމް އަށް އެ ޓީމު ދޫކޮށް، މެންޗެސްޓާ ޔުނައިޓެޑްގެ ކޯޗުކަމާ ހަވާލުވެވޭނީ ނޯޓިސް މުއްދަތެއް ފުރިހަމަ ކުރުމަށް ފަހު ކަމަށް އެއްބަސްވުމުގައި އޮތް ނަމަވެސް އެއާ މެދު ގޮތެއް ނިންމަން ސްޕޯޓިން އިން ތައްޔާރުވެފައިވާ ކަމަށް ޕޯޗުގަލްގެ މީޑިއާ ރިޕޯޓްތައް ބުނެފި އެވެ.
ޔުނައިޓެޑްގެ ކޯޗަކަށް ހުރި އެރިކް ޓެން ހާގް، ދެ އަހަރާއި ބައިގެ މުއްދަތަކަށް ފަހު ޓީމުގެ ކޯޗުކަމުން ވަކިކުރިއިރު، ޔުނައިޓެޑުން ވަނީ ބަދަލެއްގެ ގޮތުގައި ބަހާލައިގެން ޓެން ހާގަށް 20 މިލިއަން ޑޮލަރު ދައްކަން ނިންމައިފަ އެވެ. އަދި ޔުނައިޓެޑުން އާ ކޯޗަކަށް ގެންނަން މަސައްކަތްކުރަމުން އަންނަ އަމޮރިމް، 39، އެ ޓީމަށް ގެންނަަން ސްޕޯޓިން އަށް ދައްކަން ޖެހޭ ފީ 10 މިލިއަން ޑޮލަރު ދޭން އެއްބަސްވެފައިވާއިރު، ކުރިން ބެލެވިފައި އޮތީ އަމޮރިމް ވަރަށް އަވަަހަށް ޔުނައިޓެޑާ ގުޅޭނެ ކަމަށެވެ.
އެކަމަކު، ޕޯޗުގަލްގެ މީޑިއާ ރިޕޯޓްތައް ބުނާގޮތުން، އަމޮރިމްގެ ކޮންޓްރެކްޓްގައިވާ ގޮތުން، ކޮންމެ ހާލަތެއްގައި ވިޔަސް، އޭނާ އަށް ސްޕޯޓިން ދޫކޮށްލެވޭނީ ނޯޓިސް މުއްދަތެއް ފުރިހަމަ ކުރުމަށް ފަހު ކަމަށެެވެ.
ޕޯޗުގަލްގެ މީޑިއާތަކުން ރިޕޯޓްކުރާގޮތުގައި، އަމޮރިމް އަށް ޔުނައިޓެޑާ ގުޅެވޭނީ އަންނަ މަހުގެ އިންޓަނޭޝަނަލް ބްރޭކަށް ފަހު އެވެ. އެކަމަކު، ޔުނައިޓެޑްގެ ހާއްސަ އެދުމަކާ އެކު، ސްޕޯޓިން އިން އަންނަނީ ނޯޓިސް މުއްދަތު ކުޑަކުރެވޭތޯ ކްލަބްގެ މެނޭޖްމަންޓްގައި މަޝްވަރާތައް ފަށައިފަ އެވެ.
ލިވަޕޫލާއި ވެސްޓް ހޭމް ޔުނައިޓެޑާ ހަވާލުވުމުގެ ވާހަކަތައް މީގެ ކުރިން ދެކެވުނު އަމޮރިމް، ޔުނައިޓެޑްގެ ހުށަހެޅުމަށް އެއްބަސްވެފައިވާއިރު، އޭނާ އެ ޓީމުގެ ޒިންމާތަކާ ހަވާލުވަންދެން، ޔުނައިޓެޑްގެ ކޯޗުގެ މަގާމު އަދާކުރާނީ ރޫޑް ވެން ނިސްޓަލްރޫއި އެވެ. ކުރިން ޔުނައިޓެޑަށް ކުޅުނު ފޯވާޑް ނިސްޓަލްރޫއި، ޔުނައިޓެޑްގެ ކޯޗިން ޓީމާ ގުޅުނީ މި ސީޒަނުގަ އެވެ.
