ގައުމީ ކްރިކެޓް ޓީމުގެ ވައިސް ކެޕްޓަން، އާދަމް ނާސިފް އުމަރު (އާދަޅޭ)، އިންޓަނޭޝަނަލް މެޗުތަކުގައި 50 ވިކެޓް ހަމަކޮށްފި އެވެ.
މޯލްޑިވްސް ސްޕޯޓްސް އެވޯޑްސް ދިން ތިން ފަަހަރު ވެސް އެންމެ މޮޅު ކްރިކެޓް ކުޅުންތެރިއަކަށް ހޮވުނު އާދަމް، 50 ވަނަ ވިކެޓް ހަަމަކުރީ އިއްޔެ، މިހާރު ކުރިއަށްދާ، ބޫޓާން ޓީ20 ކުއަޑްރަންގިއުލާ ކްރިކެޓް މުބާރާތުގެ ސެމީ ފައިނަލުގައި ބޫޓާން އަތުން ހަތް ވިކެޓުން، ރާއްޖެ މޮޅުވި މެޗުގަ އެވެ. މި މެޗުގައި، އާދަމް ނެގީ ވެސް އެންމެ ވިކެޓް އެކެވެ.
ގައުމީ ޓީމަށް ގިނަ މެޗުތަކެއް ކުޅެފައިވާ އާދަމް އެންމެ ގިނަ ވިކެޓް ނެގީ ވެސް ބޫޓާނާ އެކު ކުޅުނު މެޗުތަކުގަ އެވެ. އެ ގޮތުން، އޭނާ ވަނީ ބޫޓާނާ ދެކޮޅަށް ކުޅުނު އަށް މެޗުން 11 ވިކެޓް ނަގައިފަ އެވެ. ތައިލެންޑާ އެކު ކުޅުނު ހަ މެޗުން ވެސް 11 ވިކެޓް ނެގިއިރު، ގަތަރާ ދެކޮޅަށް ކުޅުނު ފަސް މެޗުން ހަތް ވިކެޓް ނެގި އެެވެ.
އާދަމްގެ ކެރިއަރަށް ބަލާއިރު، ސްކޫލް ލެވަލްގައި ގިނަ މުބާރާތްތަކެއް ކުޅުނެވެ. އޭނާގެ ހުނަރު ފެނި، ކްރިކެޓް ބޯޑްގެ ޑިވެލޮޕްމަންޓް ޕްރޮގްރާމްގެ ތެރެއިން އޭނާ އަށް ފުރުސަތު ލިބުނެވެ. އެ ފަހުން، ދެން، ވިލިމާލޭގައި ކުޅެން އުޅުމުގެ ބަދަލުގައި މާލެ އަށް ގަވާއިދުން، ކްރިކެޓް ބޯޑުން ބާއްވާ ޓްރެއިނިން އަށް އަންނަން ފެށީ އެވެ. މާގިނަ ދުވަހެއް ނުވެ، 2013 ވަނަ އަހަރު އާދަމް އަށް ގައުމީ ޓީމާ އެކު ފަރިތަކުރުމުގެ ފުރުސަތު ފަހިވި އެވެ. އޭނާ ވަނީ ގައުމީ ޓީމުގެ ކެޕްޓަންކަން ވެސް ކޮށްފަ އެވެ.
ހުކުރު ދުވަހު، ރާއްޖޭގެ ކްރިކެޓް ޓީމުން 14 އަހަރު ތެރޭ ކުޅޭ ފުރަތަމަ ފައިނަލަށް، ޓީމާ އެކު، އާދަމް ނުކުންނައިރު، މި ވަގުތު އޭނާ އަކީ ޓީމުގެ ވައިސް ކެޕްޓަނެވެ.
ރާއްޖޭން އެންމެ ފަހުން، އިންޓަނޭޝަނަލް ކްރިކެޓް ފައިނަލެއްގައި ކުޅުނީ 2010 ވަަނަ އަހަރު ތައިލެންޑްގައި ބޭއްވި، އޭސީސީ ޓްރޮފީ ޗެލެންޖް މުބާރާތުގަ އެވެ. އެ މުބާރާތުގެ ފައިނަލުގައި ސައުދީ އަރަބިއްޔާ އަތުން އެއް ވިކެޓުން ވަަނީ މޮޅުވެފަ އެވެ. އެ މެޗުގެ މޮޅު ކުޅުންތެރިއަކީ، އިސްމާއިލް ނިހާދު އެވެ. އޭނާ އަކީ މި ވަގުތު ޓީމުގެ ކޯޗެކެވެ.
