ބޫޓާނުގައި މިހާރު ކުރިއަށްދާ ޓީ20 ކުއަޑްރަންގިއުލާ ކްރިކެޓް މުބާރާތުގައި، މިއަދު ކުޅުނު މެޗުން ބޫޓާން އަތުން ރާއްޖެ ބަލިވެއްޖެ އެވެ.
މިއީ، ބޫޓާނުން އެ ގައުމުގައި ކުޅެ، ބައިނަލްއަގުވާމީ ކްރިކެޓް މެޗަކުން މޮޅުވި ފުރަތަމަ ފަހަރެވެ. މި މުބާރާތަކީ ބޫޓާނުގައި އަލަށް ގާއިމްކުރި ކްރިކެޓް ސްޓޭޑިއަމް ހުޅުވަން އެ ގައުމުން ބާއްވާ މުބާާރާތެކެވެ. މި މުބާރާތުގައި ބޫޓާނުން ކުޅުނު ފުރަތަމަ މެޗުގައި ތައިލެންޑް އަތުން ބަލިވީ، 77 ލަނޑުންނެވެ. ދެ ވަނަ މެޗުގައި، މިއަދު ބޫޓާނުން މި ވަނީ ރާއްޖެ އަތުން ހަތަރު ވިކެޓުން މޮޅުވެފަ އެވެ.
ޓޮސް ދިމާވުމުން، ބޫޓާނުން ނިންމީ ހޮވާށެވެ. ރާއްޖޭން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ހެދުނީ 112 ލަނޑެވެ. ރާއްޖެ ޓީމަށް އެންމެ ރަނގަޅު ކުޅުމެއް ދެއްކީ، 55 ބޯޅައިން 58 ލަނޑު ހެދި، ޓީމުގެ ކެޕްޓަން، ޔޫސުފް އަޒްޔާން ފަރުހަތު އެވެ. ރާއްޖޭގެ ވިކެޓް ކީޕަރު، މުހައްމަދު އައްޒާމް ވަނީ 26 ބޯޅައިން 25 ލަނޑު ހަދައިފަ އެވެ.
ބޫޓާން މޮޅުވީ، ޖަވާބުގައި ކުޅެން އަރައި، 18 އޯވަރުގެ ތެރޭގައި ހަ ކުޅުންތެރިން ނުބައިިވިއިރު، 113 ލަނޑު ހަދައި މެޗުން މޮޅުވީ އެވެ. މި އިނިންސްގައި ރާއްޖޭގެ އިބްރާހިމް ރިޒާން ވަނީ ތިން ވިކެޓް ނަގައިފަ އެވެ.
ބައިނަލްއަގުވާމީ ކްރިކެޓަށް 2003 ވަނަ އަހަރު ނުކުތް ބޫޓާނުން ފުރަތަމަ މެޗު ކުޅުނީ ރާއްޖެއާ ދެކޮޅަށެވެ. މުބާރާތެއްގައި ކުޅުނު އެ މެޗުން ރާއްޖެ މޮޅުވިއިރު، ޓީ20 ގައި ބޫޓާނުން ފުރަތަމަ ފެނިގެންދިޔައީ، 2019 ގެ ސައުތު އޭޝިއަން ގޭމްސްގެ ކްރިކެޓްގަ އެވެ. އެ ފަހަރު ރާއްޖޭން ވަނީ ބޫޓާން ބަލިކޮށްފަ އެވެ. އެހެންކަމުން، މިއަދު ބޫޓާނުން ބައިނަލްއަގުވާމީ ލެވަލްގައި ރާއްޖެ އަތުން މި ހޯދި ފުރަތަމަ މޮޅަކީ އެ ގައުމަށް ތާރީހީ ކަމެކެވެ.
މުބާރާތުގައި ރާއްޖޭން ކުޅޭ ތިން ވަނަ މެޗުގައި، އަންގާރަ ދުވަހު ކުޅޭނީ ތައިލެންޑާ އެވެ.
ސެމީ ފައިނަލް މި މަހުގެ 23 ގައި ކުޅޭއިރު، ތިން ވަނަ ހޮވާ މެޗު 24 ގައި ކުޅުމަށް ފަހު ފައިނަލް މެޗު ކުޅޭނީ، މި މަހުގެ 25 ވަނަ ދުވަހު އެވެ.
