ރާއްޖޭގައި ބާއްވާ އެންމެ ގިނަ ދުވަސްވީ މަޝްހޫރު ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ފައިނަލަަށް އެންމެ ފަހުގެ ޗެމްޕިއަން، ކްލަބް ވެމްކޯ އިން މިރޭ ނުކުންނައިރު، އެ ޓީމު އޮތީ ޓީމެއްގެ ގޮތުގައި ތައްޔާރަށް ކަމަށް ވެމްކޯ ޓީމުގެ ހެޑް ކޯޗު، އަހުމަދު ތޯހާ ބުނެފި އެވެ.
ކްލަބް މޯލްޑިވްސް ކަޕްގެ ފައިނަލަށް ވެމްކޯ އިން ޖެހިޖެހިގެން ދެ ވަނަ އަހަރު ދަތުރުކުރިއިރު، ދެ ފަހަރު ވެސް ކުޅެން ޖެހިފައި މި ވަނީ ރޯޑް ރެކްރިއޭޝަން ކްލަބް (އާރްއާރްސީ)އާ އެވެ. މިދިޔަ އަހަރުގެ ފައިނަލުގައި އާރްއާރްސީ އަތުން ވެމްކޯ މޮޅުވީ 5-3 އިންނެވެ.
މި ފަހަރުގެ ކްލަބް މޯލްޑިވްސް މުބާރާތްތައް ފަށަން ކުޅުނު، ކިންގްސް ކަޕް ޗެމްޕިއަންކަން ޖޯލި މޯލްޑިވްސް ބަލިކޮށް ވެމްކޯ އިން ހޯދި އެވެ. އެހެން ނަމަވެސް، އެންމެ ރަނގަޅަށް ތައްޔާރީތައް ގެންދަން އެކި ސަބަބުތަކާ ހެދި ފުރުސަތު ނުލިބުނުކަން، ފައިނަލުގެ ކުރިން، "އަދަދު ސްޕޯޓްސް" އަށް ދިން އިންޓަވިއުގައި ތޯހާ ފާހަގަކުރި އެވެ.
ތޯހާ ބުނީ، ތައްޔާރީތައް ދިޔައީ ބޭނުންވި ގޮތަށް ނޫން ކަމަށާއި އޭގެ ސަބަބުތަކެއް ވެސް އެބަހުރި ކަމަށެވެ.
"ޕްރެޕަރޭޝަން އެއީ ވަރަށް މުހިންމު ކަމެއް އެއީ. ދެ ފަހަރު ފައިނަލް ކުޅުނަސް ތިން ފަހަރު ފައިނަލް ކުޅުނަސް، މި ފަހަރު ވެސް ޕްރެޕަރޭޝަން ބައި ވަރަށް ދަށްކޮށް މިދިޔަައީ. އަސްލު ފެސިލިޓީސް، ފުޓްސަލް މި ދަނޑުތަކާއި މި ކަންކަމަކީ ތާށިކޮށް ހުންނަ ކަންކަން ވީމަ އެކަންކަމަށް ހަމަ ވަރަށް ބުރޫ އަރަމުން މި ދަނީ ޕްރެކްޓިސް ސެޝަންތަކާ އެއްޗެހި ބޭއްވުމާ ކަންކަމަށް،" ފުޓްސަލްގައި ގިނަ އަހަރުތަކެއް މަސައްކަތްކޮށްފައިވާ ތޯހާ ބުންޏެވެ.
މީގެ ކުރިން، 2021 ވަނަ އަހަރުގެ ކްލަބް މޯލްޑިވްސް ކަޕް ކާމިޔާބުކޮށްފައިވާ އާރްއާރްސީން ހަތަރު ވަރަކަށް އަހަރު ތެރޭ ތިން ވަނަ ފައިނަލަށް ނުކުންނައިރު، އެ ޓީމު ވެސް އޮންނާނީ ފައިނަލަށް ރަނގަޅަށް ތައްޔާރުވެފައި ކަމަށް ތޯހާ ދެކެ އެވެ.
"އާރްއާރްސީ ވެސް ހަމަ ރަނގަޅަށް ތައްޔާރުވެފައި ކަމަށް މި ބަލަނީ ހަމަ އަސްލު. އަޅުގަނޑުމެން ވެސް (ވެމްކޯ ވެސް) ފައިނަލަށް ދިޔައިރު ހަމަ ބުނެވޭނީ ފައިނަލަށް ހަމަ 90 ޕަސެންޓް ވަރު ރެޑީގައޭ. މެޗު ފެށުނީމަ އެނގޭނީ، ކޮންމެ ގޮތެއް ވިޔަސް ދެކޮޅުގައި އެ ތިބީ މި ގައުމުގެ އެންމެ މޮޅު ފުޓްސަލް ކުޅުންތެރިން. ދެން މި އޮންނަނީ ދަނޑުތެރޭގައި މި ކުރާ މަސައްކަތް. ދެން ޓެކްނިކަލް ކަންތައްތައް، ދެ ކޯޗުން ނަގާ ޑިޒިޝަންތައް، ދެން ހަމަ ކުޅެލީމަ އެނގޭނީ މި ނަތީޖާ،" ތޯހާ ބުންޏެވެ.
މި ފަހަރުގެ ކްލަބް މޯލްޑިވްސް ކަޕްގައި ވެމްކޯ ފަށަން ޖެހުނީ އެންމެ ބޭނުންވި ގޮތަކަށް ނޫނެވެ. އެއީ، ގްރޫޕް ސްޓޭޖުގެ ފުރަތަމަ މެޗުގައި، އެމްޕީއެލް އަތުން 1-0 އިން ބަލިވުމުންނެވެ. އެކަަމަކު، އޭގެ ފަހުން މެޗުން މެޗަށް ކުރިއެރުން ހޯދަމުން އައިސް، ނޮކައުޓް ބުރުގައި، ވެމްކޯ އިން ވަނީ ވަރުގަދަ ޓީމުތައް ކަމަށްވާ އެސްޓީއޯ އާއި މޯލްޑިިވިއަން އަދި ސްޓެލްކޯ ފަދަ ޓީމުތައް ބަލިކޮށްފަ އެވެ.
ތޯހާ ބުނީ، ފުރަަތަމަ މެޗުގައި އެމްޕީއެލް އޮތީ ވެމްކޯއާ ކުޅެން ބެލިއިރު، ރަނގަޅަށް ތައްޔާރުވެފައި ކަމަށެވެ.
"އެމްޕީއެލް އަސްލު ވަރަށް ރަނގަޅަށް ރެޑީވެފައި އޮތީ. ދެން ލަކް ވެސް އަންނާނެ. މަސައްކަތް ކުރާ ބަޔަކަށް ކާމިޔާބުވާނީ ކިތަންމެ މޮޅު ބައެއް ގޮވައިގެން އުޅުނަސް،" ތޯހާ ބުންޏެވެ.
ގައުމީ ފުޓްސަލް ޓީމުގައި ވެސް މަސައްކަތްކޮށްފައިވާ ތޯހާ ދެކޭގޮތުގައި އޭނާ އަށް ވެމްކޯގައި އޮތް އެޑްވާންޓޭޖަކީ ތިން އަހަރު އެއް ބައެއް ގޮވައިގެން އުޅުން ކަމަށެވެ. ދެން، އޭގެ އަށް އިތުރުވި، އެންމެ މުހިންމު ކުޅުންތެރިއަކީ، ކްލަބް މޯލްޑިވްސް ކަޕް ދެ ފަހަރު ހޯދާފައިވާ މުހައްމަދު އައްޒާމް ކަމަށާއި އޭނާ ޓީމުގެ ސިސްޓަމުގެ ތެރެއަށް ގެންނަން ފަށައިގެން އުނދަގޫތަކެއް ހުރި ކަމުގައި ވިޔަސް މިހާރު އެ އަށް ވެސް ބޭނުންވާ ހައްލު ގެނެވިފައިވާ ކަމަށް ތޯހާ ފާހަގަކުރި އެވެ.
"ކޯޗަށް ދުވަސްކޮޅެއް ނެގި އައްޒާމް ވެސް މީގެ ތެރެއަށް ލާން އަސްލު، މި ޓީމަކީ ތަންކޮޅެއް އަވަހަށް ކޯޗު ކުޅެން ބޭނުންވާ ޓީމަކަށް ވެފައި، ތިބެގެން ކުޅޭ ސްޓައިލެއް ނޫން ވެމްކޯ މިއީ. ހުރިހާ އެންމެން ދުވެގެން ފިޓްނަސް ވެސް ރަނގަޅުވާންޖެހޭ މެންޓަލީ ވެސް ހުރިހާ ކަމެއް އެބަޖެހޭ ހުންނަން، އައްޒާމްގެ ސްޓައިލަކީ އެހެން ސްޓައިލެއް ވީމަ ކުޑަކުޑަކޮށް އުނދަގޫވެގެން ދިޔަ މީގެ ތެރެއަށް އައްޒާމް ވައްދަން ވެސް، އެހެންވުމާ އެކު، ތައްޔާރުވުމުގައި ޓީމެއް ރެޑީކުރަން ދުވަސްކޮޅެއް ނަގައިގެން ދިޔައީ. އިންޖަރީތައް ވެސް އައީ،" ތޯހާ ބުންޏެވެ.
އެންމެ ބޮޑު އަނިޔާގެ މައްސަލައެއްގެ ގޮތުގައި އައީ، މުބާރާތާ ކައިރިކޮށް، އަހުމަދު ވިޖުދާން (ވިޖުއްކޮ) އަށް އަނިޔާވުމެވެ.
ވަރުގަދަ ފައިނަލަކަށް ތައްޔާރުވާކަން ފާހަގަކޮށް، ތޯހާ ވަނީ އެ ޓީމު ތައްޔާރު ކަމަށް ބުނެފަ އެވެ.
"ވެމްކޯ ޓީމެއްގެ ގޮތުގައި މީނީ ރެޑީގައޭ. މިހާރު ކޯޗަށް އެއްވެސް އުނދަގުލެއް ނުލައި ޑިޒިޝަން ނެގިގެންދާނެއޭ ދަނޑުތެރެއިން ވާ ކަންކަމަށް،" ތޯހާ ބުންޏެވެ.
ކްލަބް މޯލްޑިވްސް ކަޕް ފައިނަލުގައި ވެމްކޯ އާއި އާރްއާރްސީ ކުޅޭ މެޗު ފަށާނީ މިރޭ 21:00 ގަ އެވެ.
