މިދިޔަ ބޮޑު އީދުގައި ބ. ކަމަދޫގައި ބޭއްވި އީދު ކުޅިވަރުތަކުން މަޝްހޫރުވި އައިމިނަތު ޒާރާ، 23، އާއި ރާއްޖޭގެ މަޝްހޫރު ވިޔަފާރިވެރިޔާ އަހުމަދު ސިޔާމް މުހައްމަދު، 55، މިއަދު ކައިވެނިކޮށްފި އެވެ.
ސިޔާމް އާއި ޒާރާ ކައިވެެނި ކުރީ މިއަދު ސިޔާމްގެ އޮޅުވެލިފުށި ރިސޯޓުގަ އެވެ. ކައިވެނި ޕާޓީ އޮންނާނީ މިރޭ ހަމަ އެ ރިސޯޓުގަ އެވެ. ކައިވެނީގެ ރަނެއްގެ ގޮތުގައި ކިޔާފައި ވަނީ 2024ރ. އެވެ.
ޒާރާ އާއި ސިޔާމް ކައިވެނި ކުރުމުގެ މުނާސަތަށް މިރޭ. ކަމަދޫގައި ޖާފަތެއް ބާއްވާ ކަމަށްވެ އެވެ. ސިޔާމް ގެންގުޅުއްވާ ތިން އަހެއް ވެސް އެ ރަށަށް ވަނީ ގެންގޮސްފަ އެވެ.
މިވަގުތު އިތުރު ކައިވެންޏެއް ވެސް ކުރައްވައިގެން އުޅޭ ސިޔާމްއަކީ ރާއްޖޭގެ އެންމެ މުއްސަނދިންގެ ލިސްޓުގައި ހިމެނޭ ބޭފުޅެކެވެ. ސިޔާމް މަޖިލީހަށް ހުށަހަޅުއްވާފައިވާ މާލީ ބަޔާނަކުން އެނގޭ ގޮތުގައި އަހަރެއްގެ ތެރޭގައި އޭނާއަށް ގާތްގަނޑަކަށް 35 މިލިއަން ޑޮލަރު ލިބެ އެވެ. އެއީ 539 މިލިއަން ދިވެހި ރުފިޔާ އެވެ.
މިވަގުތު ހަ ރިސޯޓެއް ސިޔާމްގެ ކުންފުނިން ހިންގަ އެވެ. އެއީ ސިޔާމް ވޯލްޑާއި އިރުފުށި ރިސޯޓާއި އިރުވެލި ރިސޯޓާއި ވިލު ރީފް ރިސޯޓާއި އޮޅުވެލި ރިސޯޓު އަދި ޕަސިކުޑާ ރިސޯޓެވެ. ޕަސިކުޑާއަކީ އަވައްޓެރި ސްރީ ލަންކާގައި ހިންގާ ރިސޯޓެކެވެ.
އޭގެ އިތުރުން ސިޔާމްގެ ތިން ގެ ހުރެ އެވެ. އެއީ މާލޭގައި ހުންނަ ހ. ސަން އާއި ގ. ސަންސެޓް އެވެ. އަދި މެލޭޝިޔާގެ ކުއާލާލަމްޕޫރުގައި ވެސް ސިޔާމްގެ ގެއެއް ހުރެ އެވެ.
