ރާއްޖޭގެ މުޅި ޕޮލިޓިކަލް ސިސްޓަމް ހަލާކުވެ ފުޅަ އަޅައި، ވެރިކަމަށް ގެންނަ ބުދެއް ކަހަލަ މީހާ ވަށާލައިގެން މުޅި ދައުލަތް ލޫޓުވަމުންދާ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
"އަދަދު" އަށް ދެއްވި ހާއްސަ އިންޓަވިއުއެއްގައި އުމަރު ވިދާޅުވީ ރާއްޖޭގައި އޮތް މުޅި ޕޮލިޓިކަލް ސިސްޓަމަކީ ހަލާކުވެ ފުޅަ އަޅާފައި އޮތް ސިސްޓަމެއް ކަމަށާއި އެ ސިސްޓަމް ތެރޭގައި ތިބި ގިނަ މީހުންނަކީ ވަގުން ކަމަށެވެ.
"މި ހުރިހާ އެންމެން އެއްވެގެން މި ތައްޔާރުކޮށް އުފައްދަނީ ވެރިކަމަށް ގެންނަން ބުދެއް. އެ ބުދު ވެރިކަމަށް ގެނެސްފައި ހުރިހާ އެންމެން ބުދު ވަށައިގެން ތިބެގެން މުޅި ދައުލަތް ލޫޓުވާލަމުން ނުގެންދަނީ،" އުމަރު ވިދާޅި އެވެ.
ރާއްޖޭގެ ތިން ބާރު ވަކިކޮށްފައި އޮތް ނަމަވެސް، މިއަދު ހުރިހާ ކޮމިޝަނެއް ވެސް އޮތީ އަމާންދީގެންކަން ކަމަށާއި ރިޝްވަތު ދިނުމާއި ހިފުމުގެ ކަންކަން ކުރިއަށްދާއިރު އެކަމާ ސުވާލު ކުރާނެ ބަޔަކު ނެތް ކަމަށް ވެސް އޭނާ ވިދާޅުވި އެވެ.
ރިޝްވަތު ދިނުމަކީ އާންމު ކަމަކަށް ހަދައިގެން ނުހައްގު ފައިސާއިން ދައުލަތް ހިންގަމުންދާ ކަމަށާއި ވެރިކަމަށް އަންނަ ކޮންމެ ބަޔަކު މަޖިލިސް މެންބަރުންނާއި ވޯޓުތައް ވެސް ގަންނަމުންދާ ކަމަށް އުމަރު ވިދާޅުވި އެވެ.
"ހަމަ ހީކުރެއްވަނީ ރާއްޖޭގެ ވެރިކަމަށް ވަޑައިގަންނަވާ ބޭފުޅުން ހަމަ ތިމަންނާމެން ފައިސާ ދީފައި ގަންނަންވީއޭ، ރައްޔިތުންގެ މަޖިލިސް މެންބަރުން ވެސް ގަންނަންވީއޭ، ފައިސާ ދީފައި ވޯޓު ވެސް ގަންނަންވީއޭ. ކޮންކަހަލަ ނުބައި މެސެޖެއްތޯ މިއީ. ކޮންތާކުން ހޯދާ ފައިސާއެއްތޯ އެއީ ރައްޔިތުންގެ މަޖިލިސް މެންބަރުންނަށް ބަހަން،" އުމަރު ވިދާޅުވި އެވެ.
އުމަރު ވިދާޅުވީ ސަރުކާރަށް މިހާރު ލިބިފައި އޮތް ސުޕަ މެޖޯރިޓީ ކުރިއަށް އޮތް ދުވަސްތަކުގައި ގެއްލޭނެ ކަމަށާއި ސަރުކާރުގެ މެންބަރުން މަޖިލީހުގައި މިހާރު ތިބީ ރުހިގެން ނޫން ކަމަށެވެ.
އެގޮތުން ސަރުކާރަށް ކުރިއަށް އޮތް ދުވަސްތަކުގައި ގޮންޖެހުންތައް ކުރިމަތިވާނެ ކަމަށާއި ޕީއެންސީގެ ބައެއް މެންބަރުން މަޑު ކޮށްލައިގެން ތިބީ ސަރުކާރުގެ އާކޮޅު ސަރުކާރާ ދެކޮޅުވާން ބޭނުން ނުވާތީ ކަމަށް އުމަރު ވިދާޅުވި އެވެ.
