ޕެރިސް (އޮކްޓޫބަރު 7) - ފްރެންޗް ލީގުގައި ރޭ ނީސްއާ 1-1 އިން އެއްވަރުވެ، ޕީއެސްޖީ އަށް ލީގުގެ އެއް ވަނަ ގެއްލުނު ނަމަވެސް ކަންބޮޑުނުވާ ސަބަބަކީ އެ ޓީމަށް ލީގުގައި ކޮންޓްރޯލް ނެގުމުގެ ފުރުސަތު އޮތުން ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.
އަމިއްލަ ދަނޑުގައި ކުޅުނު ނީސްގެ އަލީ އަބްދީގެ ގޯލުން އެ ޓީމު ލީޑުނަގާފައިވަނިކޮށް، ދެ ވަނަ ހާފުގައި ޕީއެސްޖީން އެއްވަރުކުރީ ނޫނޯ މެންޑޭސް ޖެހި ގޯލުންނެވެ.
މި ނަތީޖާއާ އެކު، ޕީއެސްޖީ ލީގުގެ ދެ ވަނަ އަށް ވެއްޓުނީ ލީގުގެ އެއް ވަނައިގައި އޮތް މޮނާކޯ އަށް ވުރެ ދެ ޕޮއިންޓް ފަހަތަށެވެ. މޮނާކޯ އަށް ހަތް މެޗުން 19 ޕޮއިންޓް ލިބިފައިވާއިރު، އެ އަދަަދަށް މެޗު ކުޅެގެން، ޕީއެސްޖީގެ އޮތީ 17 ޕޮއިންޓެވެ.
އެންރީކޭ ވަނީ ނީސްއާ ދެކޮޅަށް ވަރަށް ދަށްކޮށްދިޔަ ފުރަތަމަ ހާފަކަށް ފަހު، ޕީއެސްޖީން ދެ ވަނަ ހާފުގައި ކުރި މަސައްކަތާ މެދު ވަރަށް ހިތްހަމަޖެހޭ ކަމަށެވެ.
"މިއީ ސީޒަނެއްގެ ކުރީކޮޅު، އަހަންނަށް ވަރަށް އުންމީދީ ފެށުމެއް މިއީ، މެޗަކުން ބަލިނުވެ މި އޮތީ. އަދިވެސް އަތުގައި ކޮންޓްރޯލް މި އޮތީ. އެހެންވީމަ އަަހަރެން ދެކޭގޮތުގައި އަދި ކަންކަން މި ދަނީ ރަނގަޅަށް،" ރޭގެ މެޗަށް ފަހު އެންރީކޭ ބުންޏެވެ.
ފެށުން ރަނގަޅު ނަމަވެސް އެންރީކޭ ވަނީ އެ ޓީމުން ހަދަމުން އަންނަ ގޯސްތައް ރަނގަޅުކުރަން ޖެހޭކަން ފާހަގަކޮށްފަ އެވެ. އެ ގޮތުން، ފަސޭހައިން ކަންކަން ކުރެެވެން އޮއްވައި، އުނދަގޫ ޕާސްތަކެއް ޖަހައިގެން އެޓޭކްކުރަން އުޅުމަކީ އާންމުވަމުން އަންނަ ކަމެއް ކަމަށް ވެސް އެންރީކޭ ވަނީ ބުނެފަ އެވެ.
"ވަނަތައް ހޮވަނީ ސީޒަން ނިމުނީމަ، އޮތީ ކޮން ހިސާބެއްގައިތޯ ބަލާނީ ވެސް ސީޒަން ނިމުނީމަ. މިހާރު އެންމެ މުހިންމު ކަަމަކީ، ހުރިހާ ތަށްޓަކަށް ވާދަކުރެވޭ ލެވަލެއްގައި ޓީމު ބޭއްވުން،" އެންރީކޭ ބުންޏެވެ.
