ކްލަބް މޯލްޑިވްސް ކަޕްގައި މުބާރާތުގެ އެންމެ ކާމިޔާބު އެއް ޓީމު، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އެންމެ ފަހުގެ ޗެމްޕިއަން، ކްލަބް ވެމްކޯ 1-0 އިން ބަލިކުރިއިރު، ރާއްޖެ އޮންލައިން (އާރްއޯއެލް) އިން 7-0 އިން މޯލްޑިވްސް އިސްލާމިކް ބޭންްކް (އެމްއައިބީ) އަތުން މޮޅުވެއްޖެ އެވެ.
ގްރޫޕް ޖީގައި ރޭ ކުޅުނު ދެ މެޗާ އެކު، މި ފަހަރުގެ ކްލަބް މޯލްޑިވްސް ކަޕްގައި ކުޅޭ 28 ޓީމުން މި ވަނީ ފުރަތަމަ މެޗުތައް ނިންމާލައިފަ އެވެ.
ހުޅުމާލެ ރެހެންދި ފުޓްސަލް ދަނޑުގައި ރޭ އެމްޕީއެލް އިން ވެމްކޯ ބަލިކުރިއިރު، މެޗުގެ ހަމައެކަނި ލަނޑު ޖެހީ، އެމްޕީއެލްގެ ގޯލްކީޕަރު، އިސްމާއިލް ފާތިހު (ތާޑޭ) އެވެ. އޭނާ އަމިއްލަ އޭރިއާތެރޭގައި ހުރެފައި ޖެހި ބޯޅަ ގޯލަށް ވަނީ ވެމްކޯގެ ކީޕަރު، އަބްދުﷲ ޒިމާމް އަތްމަތިން ގޮހެވެ. މެޗުގެ މޮޅު ކުޅުންތެރިއަކަށް ވެސް ހޮވުނީ ތާޑޭ އެވެ.
އާރްއޯއެލްގެ ނަބީ ގޯލުގެ ތެރެއަށް ބޯޅަ ފޮނުވާލަނީ.---- ފޮޓޯ: އިމޭޖަސް.އެމްވީ
ލަނޑެއް ޖެހޭތޯ މި މެޗުގައި ވެމްކޯ އިން ކުރި މަސައްކަތް ހުއްޓުވުމުގައި އެމްޕީއެލްގެ ކުޅުންތެރިން ވަނީ މޮޅު ޑިފެންސެއް ކޮށްފަ އެވެ.
މި ގްރޫޕްގެ އަނެއް މެޗުގައި، އާރްއޯއެލް އިން ތަފާތު ބޮޑު މޮޅެއް ހޯދިއިރު، އެމްއައިބީ ކޮޅަށް ލަނޑުތައް ޖެހީ، މެޗުގެ މޮޅު ކުޅުންތެރިޔާ، މުހައްމަދު ނަބީހު (ނަބީ) ދެ ގޯލުގެ އިތުރުން، އައިރޫން އަހުމަދު، އަހުމަދު މާހިރު މުހައްމަދު، އަޝްހަމް އިބްރާހިމް މުހައްމަދު، އަހުމަދު ވަޖީހު އާއި ހުސެއިން ފަޔާޒް އެވެ.
ކްލަބް މޯލްޑިވްސް ކަޕްގައި މިރޭ ހަތަރު މެޗެއް ކުޅޭނެ އެވެ.
މި ފަހަރުގެ ކްލަބް މޯލްޑިވްސް ކަޕްގެ ހަތް ގްރޫޕުން ކޮންމެ ޓީމެއްގެ ގަދަ ދެ ޓީމެއް، ގަދަ 16 ބުރަށް ދަތުރުކުރާއިރު، އެ ބުރުގެ ބާކީ ދެ ޖާގަ ކަނޑައަޅާނީ، ހުރިހާ ގްރޫޕެއްގެ ތިން ވަނަ އަށް ދާ ޓީމުތަކުގެ ރޭންކިންގެ ތެރެއިން އެންމެ ރަނގަޅު ދެ ޓީމެއް އަނެއް ބުރުން ފުރުސަތު ލިބޭ ގޮތަށެވެ.
