ކްލަބް މޯލްޑިވްސް ކަޕްގައި ރޭ ރޯޑް ރެކްރިއޭޝަން ކްލަބް (އާރްއާރްސީ) އިން ކުޅުނު މެޗުގައި 2-1 އިން މޯލްޑިވިއަން އަތުން މޮޅުވިއިރު، ބެންކް އޮފް މޯލްޑިވްސްގެ ފުރަތަމަ މެޗުގައި ދިވެހި ސިފައިންގެ ކްލަބް (ޑީއެސްސީ)އާ 2-2 އިން އެއްވަރުވެއްޖެ އެވެ.
މުބާރާތުގެ ޗެމްޕިއަންކަން، 2021 ވަނަ އަހަރު ހޯދި އާރްއާރްސީން މި ފަހަރު ވެސް ވަރުގަދަ އަށް ނުކުތްއިރު، އެ ޓީމުން އުނދަގޫ މޮޅެއް ހޯދީ ފަހަތުން އަރަ އެވެ. މޯލްޑިވިއަން ޓީމުގެ އަހުމަދު އަފްލާޒް ގޯލެއް ޖަހާފައިވަނިކޮށް، އާރްއާރްސީ ފަހަތުން އަރައި މޮޅުވީ، އަބްދުﷲ މިދުހަތު ފަހުމީ (ބިޗަޑް) ޖެހި ދެ ގޯލުންނެވެ. މެޗުގެ މޮޅު ކުޅުންތެރިއަކީ އާރްއާރްސީގެ އިބްރާހިމް އަސްވަދު (ގަބޭ) އެވެ.
މި ގްރޫޕްގެ އަނެއް މެޗުން، އުރީދޫން ވަނީ ފަހި ދިރިއުޅުން ކޯޕަރޭޝަން އަތުން 2-1 އިން މޮޅުވެފަ އެވެ. އުރީދޫގެ ލަނޑުތައް ޖެހީ، މެޗުގެ މޮޅު ކުޅުންތެރިއަކަށް ހޮވުނު މުހައްމަދު ރާއިފް ފަޒީލް އެވެ. އަދި ފަހިގެ ގޯލު ޖެހީ، ސަމްހު ޝާއިން މުހައްމަދު އެވެ.
ސިފައިންގެ ޓީމުގެ ތިން ކުޅުންތެރިން ކައިރިން ބީއެމްއެލްގެ ސައްޓު ބޯޅަ ހިފައިގެންދަނީ.---- ފޮޓޯ: އިމޭޖަސް.އެމްވީ
މީގެ ކުރިން މުބާރާތުގެ ޗެމްޕިއަންކަން ދެ ފަަހަރު ހޯދާފައިވާ ބީއެމްއެލް އިން ރޭގެ މެޗުގައި ލަނޑުތައް ޖެހީ، އަހުމަދު މަހްދޫމް އާއި ޒައިން ޒަފަރު އެވެ. ސިފައިންގެ ޓީމުގެ ލަނޑުތައް ޖެހީ، ފަހުމާން އަބްދުލް ހަމީދު އާއި މުހައްމަދު މަފާޒް އެވެ. މެޗުގެ މޮޅު ކުޅުންތެރިއަކީ، ބީއެމްއެލް ޓީމުގެ އިޝާން އިބްރާހިމް (ސައްޓު) އެވެ.
އޭޑީކޭ އިން ވަނީ އެމްޓީސީސީ އަތުން 5-0 އިން މޮޅުވެފަ އެވެ. އޭޑީކޭ ޓީމުގެ އަލީ ހުޝާމް ދެ ލަނޑު ޖެހިއިރު، އަލީ އިކްރާމް، ޝައުފް ވަލީދު އާއި މުހައްމަދު އިރާޝް ކޮންމެ ކުޅުންތެރިއަކު ގޯލެއް ޖެހި އެވެ. މެޗުގެ މޮޅު ކުޅުންތެރިއަކީ އޭޑީކޭގެ ހުޝާމް އެވެ.
ކްލަބް މޯލްޑިވްސް ކަޕްގައި މިރޭ ދެ މެޗެއް ކުޅޭނެ އެވެ.
