ފަލަސްތީނާ ދެކޮޅަށް ގަތުލުއާންމު ހިންގަމުންދާ އިޒްރޭލުން ފަލަސްތީނުގެ ސެންޓްރަލް ވެސްޓް ބޭންކުގެ ރާމަﷲ ގައި ހުންނަ އަލްޖަޒީރާ އޮފީހަށް ހަތިޔާރާ އެކު ވަދެގަނެ އެ ތަން ބަންދުކުރުން ރައީސް ޑރ. މުހައްމަދު މުއިއްޒު ކުށްވެރި ކުރައްވައިފި އެވެ.
އދ. ގެ 79 ވަނަ އާންމު ޖަލްސާގެ ބަހުސްގައި ތަގުރީރު ކުރައްވަމުން އެމަނިކުފާނު ވަނީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމު ކުށްވެރި ކުރައްވައި އެ ލާއިންސާނީ އަމަލުތައް ދުނިޔެއަށް ގަބޫލުކުރަންވެސް ދަތިވެފައިވާ ކަމަށް ވިދާޅުވެފަ އެވެ. އަދި އެ ހާލަތުގައި ގާޒާ އޮއްވައި އިޒްރޭލުން މިހާރު ދަނީ ލުބުނާނަށް ހަމަލާދެމުން ކަން އެމަނިކުފާނު ފާހަގަކުރެއްވި އެވެ.
ނޫސްވެރިންނަކީ އިންސާނިއްޔަތުގެ ލޯތަކާއި ކަންފަތްތަކުގެ ގޮތުގައި ސިފަކުރައްވާ، އިޒްރޭލުން ނޫސްވެރިންނާއި މީޑިއާތަކާ ދެކޮޅަށް ދެމުންދާ ހަމަލާތައް ވެސް އެމަނިކުފާނު ވަނީ ކުށްވެރިކުރައްވާފަ އެވެ.
"ނޫސްވެރިން މެރުން. ފަލަސްތީނު، ލުބުނާނު އަދި އަލް ޖަޒީރާގެ ނޫސްވެރިން. އަލްޖަޒީރާގެ އޮފީސްތައް ބަންދުކުރުން. މިއީ އިޒްރޭލުން ހިންގަމުންދާ ލާއިންސާނީ އަމަލުތައް ދުނިޔެއަށް ފޮރުވުމަށް ކުރާ ކަންކަން ނޫން ގޮތަކަށް އަޅުގަނޑުމެންނަށް ސިފަކުރެވޭނެ ތޯ؟" ރައީސް ވިދާޅުވި އެވެ.
އިޒްރޭލު ސިފައިން ހަތިޔާރާއެކު، ރާމަﷲ ގައި ހުންނަ އަލްޖަޒީރާގެ އޮފީހަށް ވަދެގަތީ އާދިއްތަ ދުވަހު އެވެ.
"އިޒްރޭލު ސިފައިން އައިސް އޮފީހުގައި ތިބި އަލްޖަޒީރާ މުވައްޒަފުންނަށް އިންޒާރު ދިނީ 10 މިނެޓު ތެރޭގައި އެތަން ހުސް ކުރަން. ދާއިރު އަމިއްލަ ތަކެތި ވެސް ހިފައިގެން ދާން ބުނީ. އެމީހުން ބުނީ 45 ދުވަސް ވަންދެން އެތަން ބަންދު ކުރަން އަމުރު ލިބިފައިވާ ކަމަށް،" މި ހާދިސާއާ ގުޅިގެން އެ މީޑިއާއިން ބުނެފައިވެ އެވެ.
އިޒްރޭލުން މިދިޔަ އަހަރުގެ އޮކްޓޯބަރު މަހުން ފެށިގެން ގާޒާގައި ހިންގަމުންދާ ގަތުލުއާންމަކީ މިހާތަނަށް އިންސާނީ ތާރީހުގައި އެންމެ ގިނަ ނޫސްވެރިން މަރާލި ހަމަލާތައް ދިން ގަތުލުއާންމެވެ. ވޭތުވެދިޔަ 11 މަހުގެ ތެރޭ އިޒްރޭލުން ވަނީ ގާޒާގައި 116 ނޫސްވެރިން މަރާލާފަ އެވެ. އެ ހަމަލާތަކުގައި މަރުވި ޖުމްލަ މީހުންގެ އަދަދު 42،000 އަށްވުރެ މައްޗެވެ.
