ކްލަބް މޯލްޑިވްސްގެ އަންހެން ޑިވިޝަން، އެއިޓީން ތާޓީގެ ޗެމްޕިއަންކަން ޕޮލިސް ކްލަބުން ވަނީ ފުރަތަމަ ފަހަރަށް ހޯދައިފި އެވެ.
މި ފަަހަރުގެ ފައިނަލުގައި، ތިން ފަހަރު ޗެމްޕިއަންކަން ހޯދި މޯލްޑިވްސް ޕޯޓްސް ލިމިޓެޑް (އެމްޕީއެލް) އަތުން ޕޮލިސް މޮޅުވީ 8-3 އިންނެވެ.
މިދިޔަ އަހަރުގެ މުބާރާތުގެ ފައިނަލުން ޕޮލިސް ވަނީ ފެނަކަ އަތުން ބަލިވެފަ އެވެ. މި ފަހަރުގެ މުބާރާތުގައި ފެނަކަ ވާދައެއް ނުކުރެ އެވެ.
ހަތް ޓީމު ވާދަކުރި މި ފަހަރުގެ އެއިޓީން ތާޓީ މުބާރާތް ފެނުނީ މައްސަލަ ބޮޑު މުބާރާތެއްގެ ގޮތުގަ އެވެ. އެ ގޮތުން، ވެމްކޯ އަށް ވަނީ ދެ ފަހަރެއްގެ މަތިން ފިޔަވަޅު އަޅައިފަ އެވެ. ފުރަތަމަ ފަހަރަށް ވެމްކޯ އަށް ފިޔަވަޅު އެޅީ ގްރޫޕް ސްޓޭޖުގެ ފުރަތަމަ ތިން މެޗުގައި، ގަވާއިދުގައި ބުނާ ކަންކަން ފުރިހަމަަނުވާ، ވަޒީފާ އަދަކުރާތާ، 60 ދުވަސް ހަމަނުވާ މުވައްޒަފެއް ކުޅުވުމުންނެވެ. ވެމްކޯގެ ތިން މެޗުގައި ލިބުނު ޕޮއިންޓްތައް އުނިކުރިއިރު، ގްރޫޕް ސްޓޭޖުގެ ފަހު މެޗުގައި، ވެމްކޯ އިން ހެލްތު ރެކްރިއޭޝަން އަތުން އަތުން ތަފާތު ބޮޑުކޮށް މޮޅުވި އެވެ.
ފައިނަލް މެޗުގައި، ވެމްކޯ އާއި އެމްޕީއެލް ކުޅެން ފުރުސަތު ހޯދާފައިވަނިކޮށް، އަނެއްކާ ވެސް ވެމްކޯގެ މައްސަލައެއް ކުރިމަތިވެގެން، މި ފަހަރު އެ ޓީމު ޑިސްކޮލިފައިކުރުމަށް ފަހު، ފައިނަލް މެޗުގައި ފުރުސަތު ދިނީ ސެމީގައި ވެމްކޯ އަތުން 5-4 އިން ބަލިވި ޕޮލިހަށެވެ. ދެ ފަހަރު ވެސް ވެމްކޯ އަށް ފިޔަަވަޅު އެޅީ އެއްކަހަލަ މައްސަލައެއްގަ އެވެ.
ލަނޑު ޖެހުމަށް ފަހު ޕޮލިހުގެ ކުޅުންތެރިން އުފާފާޅުކުރަނީ.--- ފޮޓޯ: އިމޭޖަސް.އެމްވީ
އިއްޔެ ހަވީރު ކުޅުނު ފައިނަލް މެޗުގައި، ޕޮލިހުގެ ރާނިޔާ އިބްރާހިމް ހެޓްރިކެއް ހެދިއިރު، މި ފަހަރުގެ މުބާރާތުގައި އަނިޔާގެ ސަބަބުން އޭނާ ކުޅުމާ ދުރަށް ދާން ވެސް ޖެހުނެވެ. ޕޮލިހުގެ އަނެއް ލަނޑުތައް ޖެހީ، މަރިޔަމް ރިފާ ދެ ގޯލާއި ނީޝާ ސަމީރު އަދި އައިޝަތު ރަވީނާ އެވެ. އެމްޕީއެލްގެ އައިމިނަތު ޝާމިލާ ދެ ގޯލު ޖެހިއިރު، އަނެއް ލަނޑު ޖެހީ، ފާތިމަތު ޖޫޒާން ޒަރީރު އެވެ.
މިދިޔަ އަހަރުގެ ފައިނަލުގައި ފެނަކައިން ވަނީ 3-1 އިން ޕޮލިސް ބަލިކޮށްފަ އެވެ. މި ފަހަރުގެ ޕޮލިސް ޓީމުގައި ދިވެހި ސިފައިންގެ ކްލަބްގެ ކުޅުންތެރިން ހިމެނެ އެވެ. އެއީ، ސިފައިންގެ ޓީމު ބައިވެރިނުވާތީ އެވެ.
މުބާރާތުގެ ޑްރީމް ޓީމުގައި ހިމެނެނީ، ޕޮލިހުގެ ހަތަރު ކުޅުންތެރިން ކަމަށްވާ ފާތިމަތު ތީބާ، އައިމިނަތު ލީޒާ، ފާތިމަތު ސައިނާ، ރިފާގެ އިތުރުން، އެމްޕީއެލްގެ ބިދޭސީ ކުޅުންތެރިޔާ، ކަރީނާ އެވެ. ކުއީން އޮފް ފުޓްސަލް އަށް މުބާރާތުގެ އެންމެ ގިނަ ގޯލު ޖެހި ކުޅުންތެރިޔާ، ރިފާ ހޮވުނުއިރު، އެންމެ މޮޅު ކޯޗަކީ، ޕޮލިހުގެ މުހައްމަދު އާތިފް (އާތީ) އެވެ.
ފެއާޕްލޭ ކުޅުންތެރިއަކީ ސްޓެލްކޯ ކްލަބްގެ ފިރުޝާނާ ނަސީރު އެވެ. އަދި ފެއާޕްލޭ ޓީމަކީ ސްޓެލްކޯ އެވެ.
