ގިނަ ބަޔަކު ވޯޓުލާން ނިކުތް ސްރީލަންކާގެ ރިޔާސީ އިންތިހާބުގައި ވޯޓުލުން އަމާންކަމާ އެކު މިއަދު ނިންމާލައިފި އެވެ.
އިންތިހާބުގައި ވޯޓުލުން ކުރިއަށް ގެންދިޔައީ ލަންކާ ގަޑިން ހެނދުނު 7:00 އިން ފެށިގެން ހަވީރު 4:00 ޖެހުމާ ހަމައަށެވެ.
އިންތިހާބުގައި ވޯޓުލުމުގެ ހައްގު ލިބިފައިވާ 17 މިލިއަނެެއްހާ މީހުންގެ ތެރެއިން 70 ޕަސެންޓެއްހާ މީހުން ވަނީ ވޯޓުލައިފަ އެވެ.
ލަންކާގައި ރެކޯޑު އަދަދަކަށް މީހުން ނިކުމެ ވޯޓު ލާފައި ވަނީ 2019 ގެ ރިޔާސީ އިންތިހާބުގަ އެވެ. އެފަހަރު ޖުމްލަ 83.72 ޕަސަންޓު މީހުން ވޯޓުލި އެވެ.
އިންތިހާބާ ގުޅިގެން ހުށަހެޅި ޝަކުވާގެ އަދަދު ނިސްބަތުން މަދުއިރު ބައެއް ތަންތަނުގައި ވޯޓު ކަރުދާސް ދެއްކުމުން ކޮންމެ ވެސް ވަރެއްގެ ހަމަ ނުޖެހުންތައް ހިނގާފައިވެ އެވެ. ނަމަވެސް ޖުމްލަ ގޮތެއްގައި ވޯޓުލުން ކުރިއަށް ގެންގޮސްފައި ވަނީ އަމާން ކަމާ އެކުގަ އެވެ.
އިންތިހާބުގައި ލަންކާގެ ރައީސް ރަނިލް ވިކްރަމްސިންހު އާއި އެ ގައުމުގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސައިގެ އިތުރުން އިދިކޮޅު ވަރުގަދަ ލީޑަރެއް ކަމަށްވާ ސަޖިތު ޕްރެމަދަސާ ވާދަކުރައްވަ އެވެ.
އޭގެއިތުރުން އިންތިހާބުގައި ޖުމްލަ 38 ކެންޑިޑޭޓުން ރައީސް ކަމަށް ވާދަ ކުރައްވަ އެވެ.
އިންތިހާބުގެ ނަތީޖާ އިއުލާން ކުރަން ފަށާނީ މިރޭ ދަންވަރުން ފެށިގެން ކަމަށް އެ ގައުމުގެ އިލެކްޝަންސް ކޮމިޝަނުން ބުންޏެވެ.
