ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ކުލަބް ޗެމްޕިއަންޝިޕުގައި ޕޮލިސް ކުލަބް ސީދާ ތިން ސެޓުން ބަލިކޮށް ކުލަބް ވެމްކޯ އިން އެ ޓީމުގެ ފޯމު ދަމަހައްޓައިފި އެވެ.
މިއީ ބައިނަލްއަގުވާމީ މުބާރާތެއްގައި، ރާއްޖޭގެ އަންހެން ދެ ކްލަބްގެ ފުރަތަމަ ކުރިމަތިލުމެވެ. މި މެޗުން ކުރިހޯދައި ވެމްކޯ މި ވަނީ ފައިނަލްގެ އުންމީދު ދަމަހައްޓައިފަ އެވެ.
މި މުބާރާތުގެ ފުރަތަމަ މެޗުގައި ވެމްކޯ އިން ވަނީ ސްރީ ލަންކާގެ އެއާފޯސްގެ މައްޗަށް 3-1 ސެޓުން ކުރިހޯދައިފަ އެވެ. ޕޮލިހުން ވެސް ވަނީ އެ ޓީމުން ކުޅުނު ފުރަތަމަ މެޗުގައި ކިރްގިސްތާންގެ ވީސީ ޑިއަމެޑްގެ މައްޗަށް ސީދާ ތިން ސެޓުން ކުރިހޯދައިފަ އެވެ.
ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު މެޗުގެ ސެޓުތައް ވެމްކޯ އިން ގެންދިޔައީ, 25-15, 25-18 އަދި 25-20 އިންނެވެ.
މި މެޗުގެ ފުރަތަމަ ސެޓު ފަށައިގެން ވެމްކޯ އިން ވަނީ 10 ޕޮއިންޓްގެ ލީޑެއް ނަގާފަ އެވެ. އެއާއެކު, ޕޮލިހަށް އެ ފަރަގު ކުޑަކުރެވޭ ގޮތް ނުވެ, މި ސެޓު ފަސޭހަކަމާއެކު 25-15 އިން ވެމްކޯ ކާމިޔާބުކުރީ އެވެ.
ދެވަނަ ސެޓު ފަށައިގެން ޕޮލިހުން ގޭމުގެ ތެރެއަށްވަދެ, ވެމްކޯގެ މައްޗަށް ކުރިހޯދޭތޯ މަސައްކަތްކުރި އެވެ. އެކަމަކު, މި ސެޓުގެ ވަކި ހިސާބަކުން ވެމްކޯގެ ޖޫޒާން ޒަރީރް, ނަރީމާ އިދުރީސް (ނަންނި) އަދި އައިޝަތުގެ މާޖިދާގެ މޮޅު ކުޅުން ފެނިގެންދިޔަ އެވެ. މީގެ އިތުރުން މި ސެޓުގައި ވެމްކޯގެ ބިދޭސީ ދެ ކުޅުންތެރިންވެސް ވަނީ ގިނަ ޕޮއިންޓްތަކެއް އެ ޓީމަށް ސްކޯކޮށްދީފަ އެވެ. އެއާއެކު، މި ސެޓު ވެމްކޯ އިން ގެންދިޔައީ, 25-18 އިންނެވެ.
މި މެޗުގެ ދެވަނަ ސެޓުގައި, ޕޮލިހުގެ ޝަހާ ޝާމިން ކުޅެން އެރުވި އެވެ. "އަދަދު ސްޕޯޓްސް" އަށް އެނގިފައިވާ ގޮތުން ޝަހާ ފުރަތަމަ މެޗުގައި ނުކުޅުނީ އަނިޔާގައި ހުރުމުންނެވެ. އަދި ޝަހާ އަދިވެސް އަނިޔާ އިން މުޅިން ރަނގަޅުވެފައި ނުވެ އެވެ.
ތިންވަނަ ސެޓުގައި ވެމްކޯ އިން ކޮންމެސް ވަރަކަށް ބެންޗުގައި ތިބި ކުޅުންތެރިންނަށް ފުރުސަތު ދީފައިވެ އެވެ. އެކަމަކު މި ސެޓުގައި ވެސް ޕޮލިހަށް ވެމްކޯގެ މައްޗަށް ކުރިހޯދޭ ގޮތް ނުވި އެވެ. މި ސެޓު ވެމްކޯ އިން ގެންދިޔައީ, 25-20 އިންނެވެ.
