މިހާރު ކުރިއަށްދާ ކްލަބް މޯލްޑިވްސް ކްލަސިކް މުބާރާތުގެ ކުއާޓާ ފައިނަލުން އެމްއެމްއޭ ސޯޝަލް ކްލަބާއި ޕްރެޒިޑެންޓްސް އޮފީސް ސޯޝަލް ކްލަބް، ހައުސް ފޯ ޕީޕަލް ވިތު ސްޕެޝިއަލް ނީޑްސް (އެޗްޕީއެސްއެން) އަދި ކްލަބް 220 (ޕީޖީ އޮފީސް) ފުރުސަތު ހޯދައިފި އެވެ.
އެމްއެމްއޭ އިން ޕެނަލްޓީ ޖަހައިގެން، 3-1 އިން އެސްޑީއެފްސީ ބަލިކުރިއިރު، ރައީސް އޮފީހުން ފެހިފަހި ކްލަބް ބަލިކުރީ، 5-2 އިންނެވެ. އެޗްޕީއެސްއެން އިން ފަހަތުން އަރައި، 3-3 އިން ހުޅުމާލެ ހޮސްޕިޓަލާ އެއްވަރުކޮށް، ޕެނަލްޓީ ޖަހައިގެން ވަނީ 8-7 އިން މޮޅުވެފަ އެވެ. އަދި އެންމެ ފަހުގެ ރަނަރަޕް، ކްލަބް 220 އިން ޓީމު މާލެ ސިޓީ ކައުންސިލް އަތުން މޮޅުވީ 2-1 އިންނެވެ.
ރައީސް އޮފީސް ކުޅުންތެރިން ރޭގެ މެޗުގައި ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ
އެމްއެމްއޭ އިން ތިން ޕެނަލްޓީ ކާމިޔާބުކުރީ މުހައްމަދު ނާއިފް، މުހައްމަދު މޫމިން އަދި މުހައްމަދު އައްފާން އެވެ. އެ ޓީމުގެ އަހުމަދު ފާރިޝް ޖެހި ޕެނަލްޓީ ވަނީ ނާކާމިޔާބުވެފަ އެވެ. އެސްޑީއެފްސީގެ މުހައްމަދު އައްފާން، އިބްރާހިމް އަހްޒަމް އަދި ހުސެއިން ފައުޒާން ޖެހި ޕެނަލްޓީތައް އެމްއެމްއޭ ކީޕަރު، އިބްރާހިމް ސަމީއު ވަނީ މަތަކޮށްފަ އެވެ. އެސްޑީއެފްސީން ޕެނަލްޓީ ކާމިޔާބުކުރީ، އިސްމާއިލް ޒިޔާން ޒުހައިރު އެވެ.
ކުއާޓާގައި އެމްއެމްއޭއާ ދެކޮޅަށް ކުޅޭ ރައީސް އޮފީސް ޓީމަށް ރޭގެ މެޗުގައި ލަނޑު ޖަހައިދިނީ، އައިމަން ތައުފީގު ދެ ލަނޑާއި، ނައިބު ރައީސް، ހުސެއިން މުހައްމަދު ލަތީފް (ސެމްބެ)، އިބްރާހިމް ޝިފާގު އާއި ހުސެއިން ނަޖީބު، ކޮންމެ ކުޅުންތެރިއަކު އެއް ގޯލެވެ. އަދި ފެހިފަހި ކްލަބުން ލަނޑުތައް ޖެހީ، އަބްދުﷲ އަބްދުލް ކަރީމް އާއި މައުމާން އަބްދުލް ރަޝީދު އެވެ.
އެޗްއެސްޕީއެންގެ ކީޕަރު ސަމީރު ޕެނަލްޓީން މޮޅުވުމަށް ފަހު އުފާފާޅުކުރަނީ.---- ފޮޓޯ: އިމޭޖަސް،އެމްވީ
ގްރޫޕް ސްޓޭޖުގައި ފުރިހަމަ ރެކޯޑަކާ އެކު އައި، ހުޅުމާލެ ހޮސްޕިޓަލުން ރޭ ފުރަތަމަ ހާފުގައި ލީޑުނެގި އެވެ. ހުޅުމާލެ ޓީމުގެ އަލީ ޝާޒް ހިލްމީ އާއި ހަަސަން ސޮލާހު އަދި އަބްދުﷲ ނާސިފް އެ ޓީމަށް ލަނޑުތައް ޖަހައިދިންއިރު، ފުރަތަމަ ހާފުގައި އެޗްޕީއެސްއެންގެ ލަނޑު ޖެހީ، އަހުމަދު ރިލްވާން އެވެ.
ދެ ވަނަ ހާފުގައި އެޗްޕީއެސްއެންގެ މުހައްމަދު ސޮލާހު އާއި އިޝާން އަބްދުﷲ ލަނޑު ޖަހައި، މެޗު ޕެނަލްޓީ އަށް ގެންދިޔައީ އެވެ. ޕެނަލްޓީގައި، ހުޅުމާލެ ހޮސްޕިޓަލް ޓީމުގެ ހުސެއިން ޝަރީފްގެ ޕެނަލްޓީ އެޗްޕީއެސްއެންގެ ކީޕަރު، އަހުމަދު ސަމީރު ވަނީ މަތަކޮށްފަ އެވެ.
ސިޓީ ކައުންސިލް ޓީމުގެ އަފްޒަލް (ކ) ކައިރިން ކްލަބް 220 ގެ އަހުނަފް ބޯޅަ ހިފައިގެންދަނީ.--- ފޮޓޯ: އިމޭޖަސް،އެމްވީ
ކްލަބް 220 އިން ފުރަތަމަ ހާފުގައި، ހުސެއިން އަހުނަފް އަލީ އާއި މުހައްމަދު ނިޝާހުގެ ލަނޑުތަކުން ލީޑުނަގާފައިވަނިކޮށް ދެ ވަނަ ހާފުގައި ސިޓީ ކައުންސިލްގެ ހުސެއިން އަސީލް ލަނޑު ޖެހި ނަމަވެސް، އިތުރު ގޯލެއް ޖަހައި ނަތީޖާ ހަމަހަމަކުރެވޭ ގޮތެއް ނުވި އެވެ.
ކްލަބް މޯލްޑިވްސްގެ ކްލަސިކް މުބާރާތުގެ ކުއާޓާ ފައިނަލް ދެ މެޗުގެ އިތުރުން، އެއިޓީން ތާޓީގެ ސެމީ ފައިނަލް ދެ މެޗު މިރޭ އޮންނާނެ އެވެ. އެ ގޮތުން، އެއިޓީން ތާޓީގެ ސެމީގެ އެއް މެޗުގައި ޕޮލިހާއި ވެމްކޯ ކުޅޭއިރު، އަނެއް ސެމީ ފައިނަލުގައި ސްޓެލްކޯ ކުޅޭނީ އެމްޕީއެލްއާ އެވެ. ކްލަސިކް ކުއާޓާގައި، ތައުލީމީ ގުޅުމާއި ޓީމު ބަދަހި އެއް މެޗުގައި ކުޅޭއިރު، ކުއާޓާގެ އަނެއް މެޗުގައި، ޓީމު ޑީޖޭއޭ އިން ބައްދަލުކުރާނީ ކުޅިވަރުގެ ވުޒާރާއާ އެވެ.
