އިއްޔެ ރާއްޖޭގައި ފެށި، ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ވޮލީބޯލް ކްލަބް ޗެމްޕިއަންޝިޕްގައި ކައިރިކައިރީގައި މެޗު ކުޅެން ޖެހުން އެއީ ކުޅުންތެރިންނަށް އޭގެ ސަބަބުން ގެއްލުންވާނެ ކަމެއް ކަމަށާއި, އޭގެ ގެއްލުން ކުލްބަ ވެމްކޯ ޓީމަށްވެސް ކޮށްފައިވާ ކަމަށް އެ ޓީމުގެ ކޯޗު އަހުމަދު އަދީލް (ބޭބެ) ބުނެފި އެވެ.
ވެމްކޯ އިން ވަނީ ކާވާ ވިމެންސް ކުލަބް ޗެމްޕިއަންޝިޕުގައި އެ ޓީމުން ކުޅުނު ފުރަތަމަ މެޗުގައި 3-1 ސެޓުން ލަންކާގެ އެއާ ފޯސްގެ މައްޗަށް ކުރިހޯދައިފަ އެވެ.
އެ މެޗަށް ފަހު "އަދަދު ސްޕޯޓްސް" އާ ވާހަކަ ދައްކަމުން އަދީލް ބުނީ, މުބާރާތައް ތައްޔާރުވާން ވަގުތު ނުލިބުނު ކަމަށެވެ. އޭގެ ސަބަބުން ބޭރު ކުޅުންތެރިންނާ ދިވެހި ކުޅުންތެރިންގެ ކޮމްބިނޭޝަން ފުރަތަމަ ސެޓުގައި ދަށްވި ކަމަށެވެ. އެކަމަކު، ފަހު ތިން ސެޓުގައި އެކަންކަން ރަނގަޅުކޮށް ކުޅެވުނު ކަމަށް އަދީލް ފާހަގަކުރި އެވެ.
އަދީލް ބުނީ މި މުބާރާތައް ނުކުތީ ގައުމީ ޓީމުގެ ކުޅުންތެރިން ކައިރިކައިރީ ގިނަ މެޗުތަކެއް ކުޅެފައި ކަމަށާއި އެހެންވެ، ޓީމުގައި އަނިޔާގެ މައްސަލަތައް ވެސް އެބަހުރި ކަމަށެވެ. އަދި ކުރިއަށް އޮތްތަނުގައި މި ކަހަލަ މުބާރާތްތައް ބާއްވާއިރު, އެކަންކަމަށް ވިސްނާނެ ކަމަށް އުންމީދުކުރާ ކަމަށް އަދީލް ބުނެފައިވެ އެވެ.
"ގައުމީ ޓީމުގެ ކުޅުންތެރިން މި މުބާރާތައް މިއައީ ކައިރިކައިރީ ގިނަ މެޗުތަކެއް ކުޅެފަ. އެހެންވެ, އެ ކުޅުންތެރިންނަށް ޕާފޯމްނުކުރެވިދާނެ. އަޅުގަނޑު މިބަލަނީ ކުރިއަށް އޮތްތަނުގައި މިފަދަ މުބާރާތްތައް ބާއްވާއިރު, މި ކަންކަމަށް ވިސްނާނެ ކަމަށް." އަދީލް ފާހަގަކުރި އެވެ.
ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ވޮލީބޯލް ކްލަބް ޗެމްޕިއަންޝިޕް، އިއްޔެ ފެށިއިރު، ދުވާލަކު ތިން މެޗު ކުޅޭ ގޮތަށް ޝެޑިއުލްކޮށްފައިވާ މި މުބާރާތް، 21 ވަނަ ދުވަހުގެ ނިޔަލަށް ކުރިއަށްދާނެ އެވެ.
ގައުމީ އަންހެން ޓީމުގެ ހެޑް ކޯޗުކަމާއި އެސިސްޓަންޓް ކޯޗުކަން ވެސް ކޮށްފައިވާ އަދީލް ބުނީ މި މުބާރާތައް ވެމްކޯ އިން ނުކުތީ ފައިނަލަށް ދިޔުމުގެ އަޒުމުގައި ކަމަށާއި، އެކަން ހާސިލްކުރެވޭނެ ކަމުގެ އުންމީދު އެބައޮތް ކަމަށެވެ. އަދި ވެމްކޯ އިން އޮތީ ރަން މެޑަލް ހޯދަން ތައްޔާރަށް ކަމަށް އަދީލް ބުންޏެވެ.
މިއީ، އަދީލް، ވެމްކޯ އަންހެން ޓީމެއް ގޮވައިގެން އިންޓަނޭޝަނަލް މުބާރާތެއްގައި ކުޅޭ ދެ ވަނަ ފަހަރެވެ. މީގެ ކުރިން، 2019 ވަނަ އަހަރު ލަންކާގައި ބޭއްވި، 33 ވަނަ ތަރުނަސެވާ ރުޕަވަހިނީ ވޮލީބޯޅަ މުބާރާތުގެ އަންހެން ބައިގެ ތިން ވަނަ ވެމްކޯ ޓީމުން ހޯދި އެވެ. އެ ފަހަރު އެ ޓީމަށް ކޯޗުކޮށްދިނީ އަދީލް އެވެ.
