މާލޭގައި މިއަދު ފެށި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ވޮލީބޯލް ކްލަބް ޗެމްޕިއަންޝިޕްގައި ރާއްޖޭގެ ޗެމްޕިއަން، ކްލަބް ވެމްކޯ އިން ކުޅުނު ފުރަތަމަ މެޗުން ސްރީ ލަންކާގެ އެއާފޯސް ޓީމު އަތުން 3-1 އިން މޮޅުވެއްޖެ އެވެ.
ގައުމީ ޗެމްޕިއަންކަން އެންމެ ފަހުން ހޯދި ވެމްކޯ އަންހެން ޓީމު ވަރުގަދަކޮށް، ކާވާ މުބާރާތާއި ކުރިމަތިލިިއިރު، ގައުމީ އަންހެން ޓީމުގެ ގިނަ ކުޅުންތެރިންގެ އިތުރުން، ބިދޭސީ ދެ ކުޅުންތެރިއަކު ވެމްކޯ ޓީމުގައި ހިމެނެ އެވެ.
އެ ގޮތުން، ގައުމީ ޓީމުގެ ސެޓަރު، ފާތިމަތު ޖޫޒާން ޒަރީރު އާއި އެޓޭކަރު، އައިޝަތު މާޖިދާގެ އިތުރުން، ނަރީމާ އިދުރީސް (ނަންނި) ކުޅެމުން އަންނަނީ ވެމްކޯ އަށެވެ. ވެމްކޯ ޓީމުގައި ހިމެނޭ ބިދޭސީ ކުޅުންތެރިންނަކީ، ކައެޕްވިން ކުތިކާ އާއި އައިޓްބެކޯވާ އައިތުރްގާން އެވެ.
ސްރީ ލަންކާ އެއާފޯސް އަތުން ފަހަތުން އަރައި ވެމްކޯ މޮޅުވި މެޗުގެ ސެޓުތައް ދިޔައީ، 25-20، 23-25، 15-25 އަދި 19-25 އިންނެވެ.
އެއާފޯސް އާއި ވެމްކޯ ކުޅުނު މެޗުގެ ތެރެއިން.--- ފޮޓޯ: އަތޫފް އާތިފް / އަދަދު ސްޕޯޓްސް
މިއީ، އަންހެން ވޮލީގައި ވެމްކޯ ވާދަކުރާ ބައިނަލްއަގުވާމީ ދެ ވަނަ މުބާރާތެވެ. މީގެ ކުރިން، 2019 ވަނަ އަހަރު ލަންކާގައި ބޭއްވި، 33 ވަނަ ތަރުނަސެވާ ރުޕަވަހިނީ ވޮލީބޯޅަ މުބާރާތުގެ އަންހެން ބައިގެ ތިން ވަނަ ވެމްކޯ ޓީމުން ހޯދި އެވެ. އެ ފަހަރު އެ ޓީމަށް ކޯޗުކޮށްދިން، އަހުމަދު އަދީލް (ބޭބެ) އަކީ، މި ފަހަރު ވެސް ވެމްކޯގެ ކޯޗެވެ.
ކާވާގެ ވިމެންސް ވޮލީބޯލް ކްލަބް ޗެމްޕިއަންޝިޕް ކުރިއަށްދަނީ ހަ ޓީމެއްގެ މެދުގަ އެވެ. ވެމްކޯ އާއި އެއާފޯސްގެ އިތުރުން ދެން ހިމެނެނީ، ރާއްޖޭގެ ޕޮލިސް ކްލަބާއި ނޭޕާލްގެ ޕޮލިސް ކްލަބާއި އުޒްބެކިސްތާންގެ ހުމޯ ކްލަބް އަދި ތަޖިކިސްތާންގެ ވީކޭ ޑިއާމެޑް އެވެ.
މުބާރާތުގެ ފޯމެޓް ރޭވިފައިވަނީ، ކޮންމެ ޓީމެއް ކޮންމެ ޓީމަކާ ކުޅުމަށް ފަހު، އެއް ވަނަ އާއި ދެ ވަނައިގެ މެދުގައި، ފައިނަލް ކުޅުމަށް ފަހު، ތިން ވަނަ އާއި ހަތަރު ވަނައިގެ މެދުގައި ބްރޯންޒް މެޑަލް މެޗެއް ކުޅެ، ފަސް ވަނަ އާއި ހަ ވަނައިގެ މެދުގައި ރޭންކިން މެޗެއް ކުޅޭ ގޮތަށެެވެ.
މިއީ، ރާއްޖޭގައި އަންހެން ކުޅުންތެރިންނަށް ހާއްސަކޮށްގެން ކްލަބް ލެވަލްގެ ވޮލީ މުބާރާތެއް ކުޅޭ ފުރަތަމަ ފަހަރެވެ.
