ކްލަބް މޯލްޑިވްސް ކްލަސިކް މުބާރާތުގެ ކުއާޓާ ފައިނަލުން ޓީމު ޑީޖޭއޭ އާއި ކުޅިވަރު ވުޒާރާ ކްލަބް، ތައުލީމީ ގުޅުން އަދި ޓީމު ބަދަހިން ފުރުސަތު ހޯދައިފި އެވެ.
ގަދަ 16 ބުރުގެ މެޗުތައް ރޭ ފެށިގެންދިޔައިރު، އެންމެ ފަހުގެ ޗެމްޕިއަން، ޓީމު ޑީޖޭއޭ އިން ވަނީ ޓްރޭޑް ކްލަބް އަތުން 10-1 އިން ކުރިހޯދައިފަ އެވެ. ކްލަބް ބިނާރާ އަތުން ކުޅިވަރު ވުޒާރާ 7-1 އިން މޮޅުވިއިރު، ޓީމު ދަރުމަވަންތަ އަތުން ތައުލީމީ ގުޅުން މޮޅުވީ 2-1 އިންނެވެ. އަދި ޓީމު ބަދަހިން ވަނީ 2-1 އިން ކްރިމިނަލް ކޯޓު ބަލިކޮށްފަ އެވެ.
ޑީޖޭއޭގެ ތަރި، ސައުދުﷲ އަހުމަދު ހެޓްރިކެއް ހެދިއިރު، އެ ޓީމުގެ އަބްދުﷲ އާމިރު، އިބްރާހިމް ނޫރައްދީން، މުހައްމަދު އަޖުވަދު ސޮލާހު، ކޮންމެ ކުޅުންތެރިއަކު ދެ ގޯލު ޖެހިއިރު، އަނެއް ލަނޑު ޖެހީ، އަބޫބަކުރު މުހައްމަދު އެވެ. ޓްރޭޑް ކްލަބްގެ ހަމައެކަނި ލަނޑު ޖެހީ، ހަސަން އަޒްވާން އެވެ.
ޑީޖޭއޭ ޓީމުގެ ސައުދުﷲ ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
ބިނާރާ ކޮޅަށް ކުޅިވަރު ވުޒާރާގެ ނާއިފް ޝަފީގު (ސީއާރު3) ހެޓްރިކެއް ހެދިއިރު، ސާޖިދު އަހުމަދު އިބްރާހިމް ދެ ގޯލު އަދި މޫސާ ނަދީމް އާއި ފަރުހާން ޔޫސުފް ވަނީ ލަނޑު ޖަހައިފަ އެވެ. ބިނާރާގެ ހަމައެކަނި ލަނޑު ޖެހީ މުހައްމަދު ޝައުޔާ އެވެ.
މިދިޔަ އަހަރުގެ މުބާރާތުގައި މޮޅެއް ނުލިބި ކެޓި، ތައުލީމީ ގުޅުމުން މި ފަހަރު ކުޅުނު ހަތަރު މެޗުން ވެސް މި ވަނީ މޮޅުވެފަ އެވެ. އެ ގޮތުން، އެ ޓީމުން ރޭ ދަރުމަވަންތަ ބަލިކުރިއިރު، ލަނޑުތައް ޖެހީ، މުހައްމަދު އަޒުމޫން އެވެ. ދަރުމަވަންތަ ޓީމުގެ ހަމައެކަނި ލަނޑު ޖެހީ އަލީ ޔާފިއު އެވެ.
މެޗަކުން ބަލިނުވެ، ކޮޅަށް ގޯލެއް ނުވަދެ، ނޮކައުޓަށް އައި ކްރިމިނަލް ކޯޓު ކެޓީ ބަދަހި ކައިރިން ރަނގަޅަށް ނުކުޅެވިގެންނެވެ. ބަދަހިން ރަނގަޅު ކުޅުމެއް ދެއްކި މި މެޗުގައި، އެ ޓީމުގެ ލަނޑުތައް ޖެހީ، މުހައްމަދު ޝުހާން އެވެ. ކްރިމިނަލް ކޯޓުގެ ހަމައެކަނި ލަނޑު ޖެހީ މުހައްމަދު ޝަފްރާޒް އެވެ.
ގަދަ 16 ބުރުގައި މިރޭ ކުޅޭ މެޗުތައް
އެމްއެމްއޭ - އެސްޑީއެފްސީ (20:15)
ޕްރެޒިޑެންޓްސް އޮފީސް - ފެހިފަހި ކްލަބް (20:15)
ހުޅުމާލެ ހޮސްޕިޓަލް - އެޗްޕީއެސްއެން (22:00)
ކްލަބް 220 - ޓީމު މާލެ ސިޓީ ކައުންސިލް (22:00)
