ކްލަބް މޯލްޑިވްސް އެއިޓީން ތާޓީ (އަންހެން ޑިވިޝަން)ގައި ގްރޫޕް ސްޓޭޖުގެ ފަހު މެޗުތައް ކުޅުނުއިރު، ހެލްތު ރެކްރިއޭޝަން ކްލަބް އަތުން 9-0 އިން ކްލަބް ވެމްކޯ މޮޅުވިއިރު، ދަރުމަވަންތަ ހޮސްޕިޓަލާއި ޔޫތު ރެކްރިއޭޝަން ކްލަބްގެ މެޗު 1-1 އިން އެއްވަރުވުމުން، ސްޓެލްކޯ ރެކްރިއޭޝަން ކްލަބުން ސެމީ ފައިނަލުގެ ފަހު ޖާގަ ހޯދައިފި އެވެ.
ގްރޫޕް އޭގައި ރޭ ދަރުމަވަންތަައާ ކުޅެގެން ޔޫތު ގިނަ ގޯލުތަކެއް ޖަހައި މޮޅުވެގެން ސެމީ އަށް ދެވެން އޮތެވެ. އެކަމަކު، އެ ޓީމު ވަނީ އެއްވަރުވެފަ އެވެ. އައިމިނަތު އިބްރާހިމް ޔޫތަށް ލީޑުނަގައިދީފައިވަނިކޮށް، ދަރުމަވަންތަ އަށް އެއްވަރުކޮށްދިނީ، މަރިޔަމް ޝަފާ ބިންތި އަހުމަދު އަލީ އެވެ.
ގްރޫޕް އޭގެ އެއް ވަަނަ ހޯދީ ތިން މެޗުން މޮޅުވި ޕޮލިސް ކްލަބް އެވެ. އެ ޓީމުން ނުވަ ޕޮއިންޓް ހޯދި އެެވެ. ދެ ވަަނަ ލިބުނު ސްޓެލްކޯ އަށް ވަނީ ހަތަރު ޕޮއިންޓް ލިބިފަ އެވެ. ޔޫތުން ތިން ވަނަ ހޯދީ ދެ ޕޮއިންޓާ އެކު އެވެ. ދަރުމަވަންތަ އިން މުބާރާތް ނިންމާލީ އެއް ޕޮއިންޓާ އެކު އެވެ.
ހެލްތު ކޮޅަށް ރޭ ވެމްކޯގެ ފާތިމަތު އިނާޝާ އާދަމް ހަ ލަނޑު ޖަހައި ދެ ހެޓްރިކް ހެދި އެވެ.
ވެމްކޯގެ އަނެއް ގޯލުތައް ޖެހީ، ޒުލޭހާ ހަބީބު، މަރިޔަމް މަލްޝާ ޝަމީމް އަދި އައިމިނަތު ފަޒްލާ އެވެ.
ގްރޫޕް ބީގެ ހަތަރު މެޗުން ވެމްކޯ މޮޅުވި ނަމަވެސް އެ ޓީމު ދިޔައީ ގްރޫޕްގެ ދެ ވަނަ އެވެ. އެއީ، ކުރިން ތިން މެޗުގައި އެ ޓީމުން، ކުޅެފައިވަނީ ޓީމުގައި ހިމަނަން ގަވާއިދު ތަން ނުދޭ ކުޅުންތެރިއަކު ހިމަނައިގެން ކަމަށްވާތީ، އެ ޓީމަަށް އެ މެޗުތަކުން ލިބިފައިވާ ޕޮއިންޓްތައް އުނިކުރުމަށް ފަހު އެވެ. އެހެންކަމުން، ގްރޫޕް ބީގެ އެއް ވަނަ 12 ޕޮއިންޓާ އެކު، އެމްޕީއެލް އަށް ލިބުނުއިރު، ދެ ވަނަ ދިޔަ ވެމްކޯ އަށް ލިބުނީ ތިން ޕޮއިންޓެވެ. އަދި ހެލްތުން މުބާރާތް ނިންމާލީ ތިން ޕޮއިންޓާ އެކު އެެވެ. ވެމްކޯ ކުރިހޯދީ، ލަނޑުގެ ތަފާތުންނެވެ.
ސެމީ ފައިނަލުގައި ޕޮލިސް ކުޅޭނީ ވެމްކޯއާ އެވެ. އަނެއް ސެމީގައި އެމްޕީއެލް އިން ބައްދަލުކުރާނީ ސްޓެލްކޯއާ އެވެ.
