ހިއުމަން ރައިޓްސް ކޮމިޝަނުން އިސްނަގައިގެން، އިންޓަރނޭޝަނަލް ފައުންޑޭޝަން ފޯ އިލެކްޓޯރަލް ސިސްޓަމް (އައިއެފްއެސް) ގުޅިގެން ޔޫއެސްއެއިޑްގެ އެހީގައި ނުކުޅެދުންތެރިކަން ހުންނަ ފަރާތްތަކުގެ ހައްގުތަކާ ގުޅޭ ހާއްސަ ސްޓޭކްހޯލްޑާ ފޯރަމެއް ބާއްވައިފި އެވެ.
އެ ފޯރަމްގައި ދައުލަތުގެ ބައެއް މުއައްސަސާތަކުންނާއި، ސަރުކާރު ހިއްސާވާ ކުންފުނިތަކުންނާއި ޖަމްއިއްޔާ ޖަމާއަތްތަކުން ޖުމްލަ 70 އެއްހާ ބައިވެރިން ބައިވެރިވި އެވެ.
ފޯރަމް ޝަރަފްވެރި ކޮށްދެއްވައި ރައްޔިތުންގެ މަޖިލީހުގެ ހުރާ ދާއިރާގެ މެމްބަރު އަދި ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީގެ މެންބަރު ޑރ. އަނާރާ ނައީމް ވިދާޅުވީ ނުކުޅެދުންތެރިކަން ހުންނަ ފަރާތްތަކުގެ ހައްގުތައް ހިމާޔަތް ކުރުމަށް މަޖިލީހުގެ ފަރާތުން އެއްބާރުލުން ދޭނެ ކަމަށެވެ.
"ހާއްސަ ގޮތެއްގައި ތައުލީމު ލިބުމުގައި ނުކުޅެދުންތެރިކަން ހުންނަ ކުދީންނަށް ހުރި ގޮންޖެހުންތަކަށް ހައްލު ލިބެންޖެހޭނެ،" އަނާރާ ވިދާޅުވި އެވެ.
ހިއުމަން ރައިޓްސް ކޮމިޝަނުގެ މެންބަރު މުއުމިނާ ވަހީދު ވިދާޅުވީ ނުކުޅެދުންތެރިކަން ހުންނަ ފަރާތްތަކުގެ ހާލަތާމެދު މުޖުތަމައު ހޭލުންތެރިވާންޖެހޭނެ ކަމަށާއި ތަފާތުކުރުމެއްނެތި ނުކުޅެދުންތެރިކަން ހުންނަ ފަރާތްތައްވެސް މުޖުތަމައުގައި ހަރަކާތްތެރިވެ އުޅުމަށް މަގުފަހިވާންޖެހޭ ކަމަށެވެ.
އެ ފޯރަމްގެ މަގްސަދުތަކުގެ ތެރޭގައި ނުކުޅެދުންތެރިކަން ހުންނަ ފަރާތްތަކުގެ ހައްގުތައް ކުރިއެރުވުމަށް ކުރާ މަސައްކަތްތަކަކީ އިދާރާތައް ގުޅިގެން ކުރެވޭ މަސައްކަތަކަކަށް ހެދުމާއި، ހައްގުތައް ކުރިއަރުވައި އެ ހައްގުތައް ފޯރުކޮށްދިނުމުގައި ހުރި ގޮންޖެހުންތައް ދެނެގަނެގަތުމާއި، ނުކުޅެދުންތެރިކަން ހުންނަ ފަރާތްތަކަށް ލިބިދޭންޖެހޭ އެންމެހާ ހައްގުތައް ފޯރުކޮށްދިނުމަށް ބާރު އެޅުން ހިމެނެ އެވެ.
އޭގެއިތުރުން ނުކުޅެދުންތެރިކަން ހުންނަ ފަރާތްތަކަށް މިހާރު ކުރިމަތިވަމުންދާ ގޮންޖެހުންތައް ހައްލުކުރުމަށް ދައުލަތުގެ ކަމާއިގުޅޭ އިދާރާތަކުން ކުރެވިދާނެ ކަންތައްތަކެއް ފާހަގަކޮށް އެކަމާއި ގުޅޭގޮތުން ބައިވެރިންގެ މެދުގައި މަޝްވަރާކޮށް މުއައްސަސާތަކަށް ހުށަހަޅާނޭ ކަރުދާހެއް އެކުލަވާލުމުގެ މަސައްކަތް ކުރި އެވެ.
