ކްލަބް މޯލްޑިވްސް އެއިޓީން ތާޓީ (އަންހެން ޑިވިޝަން)ގައި ރޭ ހެލްތު ރެކްރިއޭޝަން ކްލަބް 9-0 އިން ބަލިކޮށް، މި މުބާރާތުގެ ޗެމްޕިއަންކަން ، ތިން ފަަހަރު ހޯދާފައިވާ މޯލްޑިވްސް ޕޯޓްސް ލިމިޓެޑް (އެމްޕީއެލް) ސެމީ ފައިނަލަށް ދަތުރުކޮށްފި އެެވެ.
ތިން ޓީމު ވާދަކުރާ ގްރޫޕް ބީގެ ކޮންމެ ޓީމެއް ކޮންމެ ޓީމަކާ ދެ ފަހަރު ކުޅޭއިރު، އެމްޕީއެލްގެ މެޗުތައް ވަނީ ނިމިފަ އެެވެ. މި ގްރޫޕްގެ އެއް ވަނައިގައި އޮތީ ތިން މެޗުން މޮޅުވެ، ނުވަ ޕޮއިންޓް ހޯދާފައިވާ ވެމްކޯ އެވެ. ދެ ވަނައިގައި އޮތް އެމްޕީއެލް އަށް ހަތަރު މެޗުން، ހަ ޕޮއިންޓް ލިބިފައިވާއިރު، ތިން މެޗުން ހެލްތަށް ޕޮއިންޓެއް ނުލިބެ އެވެ.
އެމްޕީއެލް އަށް ރޭގެ މެޗުގައި ލަނޑުތައް ޖަހައިިދިނީ، ކަރީނާ މިރްޒޮއޭވާ އާއި ފަރާ އަހުމަދު ހެޓްރިކެއްގެ އިތުރުން، ފާތިމަތު ނިއުޝާ، ފާތިމަތު ތާނީ ލަތީފް އަދި އަފާ އިސްމާއިލް އެވެ.
ގްރޫޕް އޭގައި ރޭ ކުޅުނު މެޗުން ޔޫތު ރެކްރިއޭޝަން ކްލަބާއި ސްޓެލްކޯ ކްލަބް ވަނީ 2-2 އިން އެއްވަރުވެފަ އެވެ. މި މެޗުގައި ސްޓެލްކޯ އިން ފިރުޝާނާ ނަސީރު ގޯލެއް ޖަހައި ލީޑުނަގައިދީފައިވަނިކޮށް، ޔޫތު ޓީމުގެ އައިމިނަތު އިބްރާހިމް ދެ ގޯލު ޖަހައި، ނަތީޖާ އަނބުރާލި އެވެ. ފުރަތަމަ ހާފުގެ އިތުރު ވަގުތުގައި ސްޓެލްކޯ އަށް އެއްވަރުކޮށްދިނީ، އޭރިއޭބޭރުން، މަރިޔަމް ޝައުފާ ޖެހި ގޯލުންނެވެ.
ގްރޫޕް އޭގެ ތާވަލަށް ބަލާއިރު، ޕޮލިސް ވަނީ ކުޅުނު ތިން މެޗުން މޮޅުވެ، ސެމީ ފައިނަލް ޔަގީންކޮށްފަ އެވެ. ދެ ވަނައިގައި މި ވަގުތު ސްޓެލްކޯ އޮތީ ހަތަރު ޕޮއިންޓާ އެކު އެވެ. ތިން ވަނައިގައި އޮތް ޔޫތު ރެކްރިއޭޝަން ކްލަބަށް ޕޮއިންޓެއް ލިބިފައިވާއިރު، ފިުލިުގައި އޮތް ދަރުމަވަންތަ ހޮސްޕިޓަލަށް އަދި ޕޮއިންޓެއް ނުލިބެ އެވެ.
