މިހާރު ކުރިއަށްދާ ކްލަބް މޯލްޑިވްސް ކްލަސިކް މުބާރާތުގައި ރޭ ކުޅުނު ގްރޫޕް އެފްގެ ފަހު މެޗުތަކުން މޮޅުވެ، ކްރިމިނަލް ކޯޓާއި އެމްއެމްއޭ ސޯޝަލް ކްލަބް މުބާރާތުގެ ގަދަ 16 ބުރުން ޖާގަ ހޯދައިފި އެވެ.
ރޭ ކުޅުނު މެޗުން ކްރިމިނަލް ކޯޓުން ވަނީ 1-0 އިން މިރާ ރެކްރިއޭޝަން ކްލަބް ބަލިކޮށްފަ އެވެ. އެ ގްރޫޕްގެ އަނެއް މެޗުން އެމްއެމްއޭ އިން ވަނީ ސިވިލް ކޯޓުގެ މައްޗަށް 14-1 އިން ކުރިހޯދައިފަ އެވެ.
މި ގްރޫޕްގެ އެއް ވަނަ ހޯދީ އެމްއެމްއޭ އެވެ. އެއީ ހަތް ޕޮއިންޓާ އެކު، ފައިދާ 14 ގޯލު އޮތުމުންނެވެ. ދެ ވަނައިގައި އޮތް، ކްރިމިނަލް ކޯޓަށް ވަނީ ހަތް ޕޮއިންޓާ އެކު، ފައިދާ ނުވަ ގޯލު ލިބިފަ އެވެ. ތިން ވަނައިގައި އޮތް މީރާ އަށް ތިން ޕޮއިންޓް ލިބުނުއިރު، ހަތަރެއްގައި ނިންމާލި ސިވިލް ކޯޓަށް ޕޮއިންޓެއް ނުލިބެ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުތަކަށް ބަލާއިރު، ކްރިމިނަލް ކޯޓަށް ރޭގެ މެޗުގައި ހަމައެކަނި ގޯލު ޖަހައިދިނީ ޔައިޝް މުސްތަފާ އެވެ. މި މެޗުގައި މީރާގެ ކުޅުންތެރިން ފޮނުވާލި ނުވަ ޝޮޓެއް، ކްރިމިނަލް ކޯޓުގެ ކީޕަރު، ހުސެއިން ސަބީލް ވަނީ މަތަކޮށްފަ އެވެ. އަދި ކްރިމިނަލް ކޯޓުން ލީޑުފުޅާކުރަން، ފޮނުވާލި ހަމަލާތައް މީރާގެ ކީޕަރު މުހައްމަދު ޝާން ވެސް ވަނީ މަތަކޮށްފަ އެވެ.
އެމްއެމްއޭ އަށް ރޭގެ މެޗުގައި ލަނޑުތައް ޖަހައިދިނީ، މުހައްމަދު ނާއިފް ހަތް ގޯލާއި އަބްދުﷲ ނާސިފް ދެ ގޯލާއި ހުޝާމް އިބްރާހިމް، މުހައްމަދު މުބީން، އަހުމަދު ފާރިޝް، އަލީ ޔަޒީދު އަދި ޒަޔާން ޝާނިޒް ގޯލެކެވެ. ސިވިލް ކޯޓުގެ ގޯލު ޖެހީ، އަލީ ފަޒްލީން އެވެ.
ކްލަސިކްގެ ހަ ގްރޫޕެއްގެ ކުޅުން ނިމިފައިވާއިރު، ގަދަ 16ގެ 14 ޖާގައެއް ވަނީ ޔަގީންވެފަ އެވެ. ގަދަ 16 ގެ ފުރުސަތު ހޯދާފައިވަނީ، ގްރޫޕް އޭ އިން، ތައުލީމީ ގުޅުމާއި ފެހިފަހި ކްލަބް، ގްރޫޕް ބީ އިން، ޓީމު ބަދަހި އާއި ކްލަބް އެސްޑީއެފްސީ، ގްރޫޕް ސީ އިން ކްލަބް ބިނާރާ އާއި އެޗްޕީއެސްއެން، ގްރޫޕް ޑީ އިން، ޓީމު ޑީޖޭއޭ އާއި ޓީމު މާލެ ސިޓީ ކައުންސިލް، ގްރޫޕް އީ އިން، ރައީސް އޮފީސް އާއި ޓީމު ދަރުމަވަންތަ، ގްރޫޕް އެފް އިން، އެމްއެމްއޭ އާއި ކްރިމިނަލް ކޯޓު އަދި ބާކީ މެޗެއް އޮއްވައި، ގްރޫޕް ޖީ އިން ހުޅުމާލެ ހޮސްޕިޓަލް އަދި ގްރޫޕް އެޗް އިން ކްލަބް 220 އެވެ.
މިރޭ އޮތީ ގްރޫޕް ޖީގެ ފަހު ދެ މެޗާއި ގްރޫޕް އެޗްގެ ފަހު ދެ މެޗެވެ.
