ކްލަބް މޯލްޑިވްސްގެ އަންހެން ޑިވިޝަން، އެއިޓީން ތާޓީ ފުޓްސަލް ފިއެސްޓާގައި ރޭ ކުޅުނު މެޗުން ސްޓެލްކޯ ރެކްރިއޭޝަން ކްލަބް އަތުން 10-0 އިން މޮޅުވެ، ޕޮލިސް ކްލަބް މުބާރާތުގެ ސެމީ ފައިނަލުން ޖާގަ ހޯދައިފި އެވެ.
ގްރޫޕް އޭގައި ވާދަކުރާ ޕޮލިސް ކްލަބުން ފުރަތަމަ މެޗުގައި ޔޫތު ރެކްރިއޭޝަން ކްލަބް ބަލިކުރީ 17-0 އިންނެވެ. ދެ ވަނަ މެޗުގައި ސްޓެލްކޯ ކޮޅަށް 10 ގޯލު ޖެހިއިރު، ބާކީ މެޗެއް އޮއްވައި، ޕޮލިހުން މި ވަނީ ސެމީގެ ޖާގަ ޔަގީންކޮށްފަ އެވެ.
ޕޮލިސް ޓީމަށް ރޭގެ މެޗުގައި، މަރިޔަމް ރިފާ އާއި ފާތިމަތު ތީބާ ވަނީ ހެޓްރިކެއް ހަދައިފަ އެވެ. މި މެޗުގައި ޖެހި ތިން ގޯލާ އެކު ރިފާ މި ފަހަރުގެ މުބާރާތުގައި ޖެހި ގޯލުގެ އަދަދު ވަނީ 12 އަށް އަރައިފަ އެވެ. ރޭގެ މެޗުގައި، ޕޮލިހުގެ އަނެއް ގޯލުތައް ޖެހީ، ފާތިމަތު ސައިނާ، އައިމިނަތު ޒާހިޔާ، ރާނިޔާ އިބްރާހިމް އަދި އައިޝަތު އަމީޝާ ސަލާމް އެވެ.
މި މެޗުގައި، ސްޓެލްކޯގެ އެންމެ މުހިންމު ކުޅުންތެރިޔާ، ފިރުޝާނާ ނަސީރު ނުކުޅެ އެވެ.
ގްރޫޕް އޭގެ އެއް ވަނައިގައި ހަ ޕޮއިންޓާ އެކު ޕޮލިސް އޮތްއިރު، ދެ ވަނައިގައި އޮތް ސްޓެލްކޯ އަށް ވަނީ ތިން ޕޮއިންޓް ލިބިފަ އެވެ. ތިން ވަނައިގައި އޮތް ދަރުމަަވަންތަ އާއި ހަތަރެއްގައި އޮތް ޔޫތު ރެކްރިއޭޝަން ކްލަބަށް އަދި ޕޮއިންޓެއް ނުލިބެ އެވެ.
ގްރޫޕް ބީގައި ރޭ ކުރީގެ ޗެމްޕިއަނެއް ކަމަށްވާ، އެމްޕީއެލް އިން ވަނީ ހެލްތު ރެކްރިއޭޝަން ކްލަބް 8-0 އިން ބަލިކޮށް މި ފަހަރުގެ މުބާރާުތުގައި ފުރަތަމަ މޮޅު ހޯދައިފަ އެވެ. އެމްޕީއެލްގެ ބިދޭސީ ކުޅުންތެރިޔާ، މިރްޒޮއޭވާ ކަރީނާ ފަސް ގޯލު ޖެހިއިރު، އަނެއް ލަނޑުތައް ޖެހީ ފާތިމަތު ތާނީ ލަތީފް، ފަރާ އަހުމަދު އަދި އަައިމިނަތު ޝާމިލާ އެވެ.
މި ގްރޫޕްގައި ތިން ޓީމު ހިމެނޭއިރު، ކޮންމެ ޓީމެއް ކޮންމެ ޓީމަކާ ދެ ފަހަރު ކުޅެ އެވެ. އެ ގޮތުން، ރޭގެ މެޗާ އެކު ކޮންމެ ޓީމެއް ކޮންމެ ޓީމަކާ އެއް މެޗު ވަނީ ކުޅެފަ އެވެ. ވެމްކޯ ކުރީގައި އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް އެމްޕީއެލް އަށް ތިން ޕޮއިންޓް ލިބިފައިވާއިރު، ތިން ވަނައިގައި އޮތް ހެލްތަށް އަދި ޕޮއިންޓެއް ނުލިބެ އެވެ.
