ކްލަބް މޯލްޑިވްސް ކްލަސިކްގެ އެންމެ ފަހުގެ ޗެމްޕިއަން، ޓީމު ޑީޖޭއޭ އާއި މުޅިން އަލަށް ވާދަކުރާ ކްލަބް އެސްޑީއެފްސީ އަދި ތައުލީމީ ގުޅުން މުބާރާތުގެ ދެ ވަނަ ބުރުގެ ޖާގައެއް ހޯދުމާ ގާތަށް ޖެހިލައިފި އެވެ.
މި ތިން ޓީމުން ވަނީ، މި ފަހަރުގެ ކްލަސިކް މުބާރާތުގައި ކުޅުނު ދެ ވަނަ މެޗުން މޮޅުވެ، ގަދަ 16 އިން ފުރުސަތު ބޮޑުކޮށްފަ އެވެ. އެ ގޮތުން، ގްރޫޕް ޑީގައި ރޭ ޑީޖޭއޭ އިން ވަނީ ޓޫރިޒަމް ކްލަބް އަތުން 10-4 އިން މޮޅުވެފަ އެވެ.
ގްރޫޕް އޭގައި ތައުލީމީ ގުޅުމުން ވަނީ 3-1 އިން ޓްރާންސްޕޯޓް ރެކްރިއޭޝަން ކްލަބް ބަލިކޮށްފަ އެވެ. އަދި މުޅިން އަލަށް ވާދަކުރާ އެސްޑީއެފްސީން ވަނީ، ގްރޫޕް ބީގައި 7-1 އިން ޓީމު ހާރިޖީ ބަލިކޮށްފަ އެވެ.
ރޭގެ މެޗުގައި ޑީޖޭއޭގެ ކެޕްޓަން، ސައުދުﷲ އަހުމަދު ވަނީ ހެޓްރިކެއް ހަދައިފަ އެވެ. އިބްރާހިމް ނައީމް، މުހައްމަދު ސަލީމް، ކޮންމެ ކުޅުންތެރިއަކު ދެ ގޯލު ޖެހިއިރު، އަނެއް ލަނޑުތައް ޖެހީ، މުހައްމަދު އަޖުވަދު ސޮލާހު، އިބްރާހިމް ނޫރައްދީން .(އެންޑިން) އަދި އަބްދުލް ސަމީއު އަލީ އެވެ. ޓޫރިޒަމް ޓީމުގެ ލަނޑުތައް ޖެހީ، މިނިސްޓަރު، އިބްރާހިމް ފައިސަލް ދެ ގޯލާއި އަލީ އަހްލާމް އަދި މުހައްމަދު ރިފްހާން އެވެ.
ޑީޖޭއޭ ޓީމުގެ އަޖުވަދު (ކ) އަތުން ޓޫރިޒަމް ޓީމުގެ މިނިސްޓަރު ފައިސަލް ބޯޅަ ހޯދަން މަސައްކަތް ކުރަނީ.-- ފޮޓޯ: އިމޭޖަސް،އެމްވީ
ތައުލީމީ ގުޅުމަށް ރޭގެ މެޗުގައި، ލަނޑުތައް ޖަހައިދިނީ އަބްދުﷲ އިލްހާމް، އިބްރާހިމް ހަސަން އަދި އުމަރު ފާރޫގު އެވެ. ޓްރާންސްޕޯޓްގެ ހަމައެކަނި ލަނޑު ޖެހީ، އަބްދުﷲ މިއުޝާދު އެވެ.
އެސްޑީއެފްސީ އަށް ރޭގެ މެޗުގައި ހުސެއިން ފައުޒާން ހެޓްރިކެއް ހެދިއިރު، އަނެއް ލަނޑުތައް ޖަހައިިދިނީ، އިބްރާހިމް އަހުޒަމް ދެ ގޯލުގެ އިތުރުން، އިޒުއާން އަބްދުލް ރައްޒާގު އާއި އިސްމާއިލް ޒިޔާން ޒުހައިރު އެވެ. ހާރިޖީގެ ހަމައެކަނި ލަނޑު ޖެހީ އެ ޓީމުގެ ކެޕްޓަން، ހުސެއިން ސިނާހު އެވެ.
ގްރޫޕް އެފްގައި އެމްއެމްއޭ ސޯޝަލް ކްލަބާއި ކްރިމިނަލް ކޯޓު ކުޅުނު މެޗު ވަނީ ލަނޑެއް ނުޖެހި އެއްވަރުވެފަ އެވެ.
އިއްޔެ ހަވީރު ކުޅިވަރު ވުޒާރާ ކްލަބުން ވަނީ 9-1 އިން ޓްރޭޑްނެޓް ބަލިކޮށްފަ އެވެ. ކުޅިވަރު ވުޒާރާ ކްލަބްގެ ސާޖިދު އަހުމަދު އިބްރާހިމް އާއި ނާއިފް ޝަފީގު (ސީއާރް3) ކޮންމެ ކުޅުންތެރިއަކު ހަތަރު ގޯލު ޖެހިއިރު، އަނެއް ލަނޑު ޖެހީ، އަހުމަދު ސާޖިދު އެވެ. ޓްރޭޑްނެޓްގެ ހަމައެކަނި ގޯލު މެޗުގެ ފަހު ވަގުތު ޖެހީ، ކީޕަރު، އިސްމާއިލް އިހުތިރާމް އެވެ.
ކުޅިވަރު ވުޒާރާ ޓީމުގެ ނާއިފް އާއި ސާޖިދު ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ
ގްރޫޕް އެޗްގައި، ކްލަބް އެންޑީއޭ އާއި ހަޔާ އެޑިއުކޭޝަން ކުޅުނު މެޗު ނިމުނީ 2-2 އިން އެއްވަރުވެގެންނެވެ. މި މެޗުގައި، ހަޔާ އެޑިއުކޭޝަނުން އަހުމަދުﷲ މައުތޫފް އިބްރާހިމް އާއި ހަސަން މަލާޒް ލަނޑުތައް ޖެހިއިރު، އެންޑީއޭގެ ދެ ލަނޑު ވެސް ޖެހީ، ޖަޒްލާން މުހައްމަދު އެވެ.
އެޗްޕީއެސްއެން އިން ވަނީ ފަހަތުން އަރައި، ޔޫތު ރެކްރިއޭޝަން ކްލަބް 4-2 އިން ބަލިކޮށް ފުރަތަމަ މޮޅު ހޯދައިފަ އެވެ. މި މެޗުގައި ޔޫތުން ލީޑުނެގީ އެޗްޕީއެސްއެންގެ އަހުމަދު ރިލްވާން އަތުން ބައިކޮޅަށް ވަން ގޯލުންނެވެ. އެޗްޕީއެސްއެން އިން ދެ ވަނަ ހާފުގައި ނަތީޖާ އަނބުރާލިއިރު، މި މެޗުގައި އެ ޓީމުގެ ލަނޑުތައް ޖެހީ، އިޝާން އަބްދުﷲ، މުހައްމަދު ޖައިޝަމް، އަހުމަދު ވަދީއުގެ އިތުރުން، ޔޫތު ޓީމުގެ މަހުމޫދު ސިޔާމް އަތުން ބައިކޮޅަށް ވަން ގޯލެކެވެ. ޔޫތު ޓީމުގެ ފަހު ލަނޑު ޖެހީ މުހައްމަދު ޝާފިއު އެވެ.
ޕްރެޒިޑެންޓްސް އޮފީސް ސްޕޯޓްސް ކްލަބުން ވަނީ 5-1 އިން ފިނޭންސް ރެކްރިއޭޝަން ކްލަބް ބަލިކޮށްފަ އެވެ. މި މެޗުގައި ނައިބު ރައީސް ހުސެއިން މުހައްމަދު ލަތީފް (ސެމްބެ) ދެ ލަނޑު ޖެހިއިރު، ހުސެއިން ނަޖީބު، މުހައްމަދު އަޝްރަފު އަދި މުހައްމަދު ރިފާއު ވަނީ ލަނޑު ޖަހައިފަ އެވެ. ފިނޭންސްގެ ހަމައެކަނި ލަނޑު ޖެހީ، މުހައްމަދު އަޒާން ފަތުހުﷲ އެވެ.
މިއަދު ކްލަބް މޯލްޑިވްސް ކްލަސިކްގެ ހަ މެޗަކާއި އެއިޓީން ތާޓީ ފުޓްސަލް ފިއެސްޓާގެ ދެ މެޗެއް ކުޅޭނެ އެވެ.
