ކްލަބް މޯލްޑިވްސްގެ އަންހެން ޑިވިޝަން، އެއިޓީން ތާޓީ ފުޓްސަލް ފިއެސްޓާގެ މި ފަހަރުގެ މުބާރާތުގައި ކްލަބް ވެމްކޯ އިން ކުޅުނު ދެ ވަަނަ މެޗުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)، 3-1 އިން ބަލިކޮށް ސެމީ ފައިނަލާ ގާތަށް ޖެހިލިއިރު، ސްޓެލްކޯ ކްލަބުން ވަނީ 4-0 އިން ޓީމު ދަރުމަވަންތަ ހޮސްޕިޓަލް ބަލިކޮށް، މޮޅަކުން ފަށައިފި އެވެ.
ގްރޫޕް ބީގައި ހިމެނޭ ވެމްކޯ އިން ކުޅުނު ފުރަތަމަ މެޗުން 13-0 އިން ހެލްތު ރެކްރިއޭޝަން ކްލަބް ބަލިކުރިއިރު، ރޭ އެމްޕީއެލް އަތުން މޮޅުވެ، މި ވަނީ ހަ ޕޮއިންޓް ހޯދައިފަ އެވެ.
ބާކީ ދެ މެޗުން، ވެމްކޯ އަށް މަދުވެގެން އެއް ޕޮއިންޓް ލިބިގެން ވެސް ސެމީ އަށް ދެވޭނެ އެވެ. އެ ޓީމަަށް މުބާރާތުގައި ކުރިއަށް ނުދެވޭނީ، އަދި އެއް ފަހަރު، ހެލްތާއި އެމްޕީއެލްއާ ކުޅޭ މެޗުތަކުން ތަފާތު ބޮޑުކޮށް ބަލިވެއްޖެނަމަ އެވެ.
ސްޓެލްކޯ ޓީމުގެ ފިރުޝާނާ (ވ) ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ
ރޭގެ މެޗުގައި ވެމްކޯގެ ލަނޑުތައް ޖެހީ، ފާތިމަތު އިނާޝާ އާދަމް، ފާތިމަތު ސާލިޔާ އަދި މަރިޔަމް ނޫރާ އެވެ. މީގެ ތެރެއިން ސާލިޔާ އަކީ، މީގެ ކުރިން، އެމްޕީއެލް އަށް މި މުބާރާތުގެ ތަށި ގިނަ ފަހަރުތަކެއްގެ މަތިން ހޯދާފައިވާ ކުޅުންތެރިއެކެވެ. އެމްޕީއެލްގެ ހަމައެކަނި ގޯލު މި މެޗުގައި ޖެހީ، އައިމިނަތު ޝާމިލާ އެވެ.
ގްރޫޕް އޭގެ ދެ ވަނަ މެޗުގައި، ސްޓެލްކޯ އިން ރޭ ދަރުމަވަންތަ ބަލިކުރިއިރު، ލަނޑުތައް ޖެހީ، ފިރުޝާނާ ނަސީރު ދެ ގޯލާއި ވިޝާޔާ ވިލްދާން އަދި ފާތިމަތު ތުހުފާ އެވެ.
ކްލަބް މޯލްޑިވްސް އެއިޓީން ތާޓީ ފުޓްސަލް ފިއެސްޓާގައި މި ފަހަރު ވާދަކުރަނީ ހަތް ޓީމެކެވެ.
