ލިޒްބަން (ސެޕްޓެމްބަރު 6) - ޔުއެފާ ނޭޝަންސް ލީގުގައި ރޭ ކުޅުނު މެޗުގައި، ޕޯޗުގަލްގެ ކެޕްޓަން، ކްރިސްޓިއާނޯ ރޮނާލްޑޯ، އޭނާގެ ފުޓްބޯޅަ ކެރިއަރުގައި 900 ވަނަ ގޯލު ޖެހިއިރު، 2-1 ގެ ނަތީޖާ އަކުން ކްރޮއޭޝިއާގެ މައްޗަށް ޕޯޗުގަލް އިން ކުރިހޯދައިފި އެވެ.
މި މެޗުގެ ކުރިން ޕޯޗުގަލް އިން ވަނީ އެ ޓީމުގެ ލެޖެންޑަރީ ޑިފެންޑަރު ޕެޕޭ ކުޅުން ހުއްޓާލުމާ ގުޅިގެން ޕެޕޭގެ އަގުވަޒަންކޮށްފަ އެވެ.
މި މެޗު ފަށައިގެން ހަތް ވަނަ މިނެޓުގައި ޕޯޗުގަލް އިން ވަނީ ގޯލު ޖަހާ ލީޑު ނަގައިފަ އެވެ. ބްރޫނޯ ފެނާންޑޭސްގެ އެހީތެރިކަމާ އެކު، މި ގޯލު ޕޯޗުގަލް އަށް ޖަހާދިނީ ޑިއޯގޯ ޑަލޮޓް އެވެ. މި ލަނޑަށް ފަހު ވެސް ޕޯޗުގަލް އިން ވަނީ މެޗުގެ ކޮންޓްރޯލް އެ ޓީމުގެ އަތުގައި ބާއްވައި ކްރޮއޭޝިއާގެ އަށް ނުރައްކާކޮށްފަ އެވެ.
ޕޯޗުގަލް އިން ޖެހި ދެ ވަނަ ގޯލު މެޗުގެ 34 ވަނަ މިނެޓުގައި އެ ޓީމަށް ޖަހައިދިނީ ރޮނާލްޑޯ އެވެ. މިއީ ރޮނާލްޑޯ އޭނާގެ ކެރިޔަރުގައި ޖެހި 900 ވަނަ ގޯލެވެ. އަދި މި ގޯލާ އެކު، ރޮނާލްޑޯ ވެގެންދިޔައީ އޮފިޝަލް މެޗުތަކުގައި 900 ގޯލު ޖެހި ފުރަތަމަ ކުޅުންތެރިޔާ އަށެވެ.
އެކަމަކު، ފުރަތަމަ ހާފު ނިމުމުގެ ކުރިން ކްރޮއޭޝިއާ އިން ވަނީ ފަރަގު ކުޑަކޮށްފަ އެވެ. މިއީ ޑަލޮޓް އަތުން ބައިކޮޅުން ވަން ގޯލެކެވެ.
ރޮނާލްޑޯގެ 900 ވަނަ ލަނޑާ އެކު، ގިނަ ބަޔަކު އަންނަނީ އޭނާ އަށް މަރުހަބާ ކިޔަމުންނެވެ. އެގޮތުން, އޭނާގެ ކުރީގެ ކްލަބް ރެއާލް މެޑްރިޑުން ވެސް ވަނީ އެކަމަށް މަރުހަބާ ކިޔާފަ އެވެ.
"900 ގޯލު ޖެހުން އެއީ ފަސޭހަކަމެއް ނޫން. އެކަމަކު ރޮނާލްޑޯ ފަދަ ކުޅުންތެރިޔަކަށް އެއީ ނުވާނެ ކަމެއް ވެސް ނޫން. ރެއާލް މެޑްރިޑް އަދި މި ކްލަބްގެ ސަޕޯޓަރުންގެ ފަރާތުން ރޮނާލްޑޯ އަށް މަރުހަބާ" ރެއާލްގެ ބަޔާނުގައި ބުންޏެވެ.
ރޮނާލްޑޯގެ 900 ގޯލަކީ، ސްޕޯޓިން ލިޒްބަން އަށް ޖެހި ފަސް ގޯލާއި، މެންޗެސްޓާ ޔުނައިޓެޑަށް 145 ގޯލާއި ރެއާލް މެޑްރިޑަށް 450 ގޯލާއި ޔުވެންޓަސް އަށް 101 ގޯލާއި އަލް ނަސްރަށް 67 ގޯލުގެ އިތުރުން ޕޯޗުގަލް އަށް 131 ގޯލެވެ.
ނޭޝަންސް ލީގުގައި ރޭ ސްޕެއިނާއި ސާބިއާ ވަނީ 0-0 އިން އެއްވަރުވެފަ އެވެ. އަދި ސެން މެރީނޯ އިން ވަނީ ލިޗެސްޓައިން އަތުން 1-0 އިން މޮޅުވެ، 20 އަހަރު ފަހުން މެޗަކުން މޮޅުވެފަ އެވެ. ސެން މެރީނޯ އެންމެ ފަހުން މެޗަކުން މޮޅުވީ ވެސް ލިޗެސްޓައިން އަތުންނެވެ. އެއީ، 2004 ވަނަ އަހަރު އެވެ.
