ބާރުވެރި ގައުމުތަކުން ކުދި ގައުމުތަކުގެ މައްޗަށް ބާރުފޯރުވުމަށް ބޭނުންކުރާ އުކުޅުތަކުގެ ތެރެއިން ގައުމުތަކުގެ ވެރިންގެ އަގުވައްޓާލަން މަސައްކަތް ކުރާ ކަަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މި އަހަރުގެ ގައުމީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ރައީސް ވިދާޅުވީ، ގައުމެއްގެ މީހުންނާއި ދީނާއި މިނިވަންކަމާ ދެކޮޅަށް ކުރެވޭ އެތައް ކަމެއް ހުންނަ ކަމަށެވެ. އެގޮތުން މި ފަހުން އެންމެ ފާހަގަކޮށްލެވެނީ ގްލޯބަލައިޒޭޝަންގެ "ތޫފާނުގެ" ތެރެއިން ގައުމުތައް "އެފުށް މިފުށަށް" ޖެހެމުންދާ ދިއުން ކަމަށް ވެސް އެމަނިކުފާނު ވިދާޅުވި އެވެ.
މިކަންކަމުގެ އެންމެ ފުނުގައި ހުންނަނީ ބާރުގަދަ ގައުމުތަކުން އިތުރަށް ބާރުވެރިވުމަށް އެކަށައަޅާފަ ހުންނަ އެޖެންޑާތައް ކަމަށާއި އެފަދަ އެޖެންޑާތައް ދަށުން އުފެދޭ ފިކުރީ އޮއެވަރުތަކުގައި ޒުވާން ޖީލުތައް ޖެހެމުންދާކަން އެނގެނީ ވަރަށް މަދު ބަޔަކަށް ކަމަށް ވެސް ރައީސް މިއަދު ވިދާޅުވި އެވެ.
"މިފަދަ އޮއެވަރުތަކުގައި ގައުމުގެ ދީނަށް ހަމަލާދޭވޭ. ގައުމުގެ އެއްބައިވަންތަކަށް ފުނޑުފުނޑުކޮށްލެވޭ. އެކަމަށްޓަކައި އެތަނެއްގެ ގަދަރުވެރިންނާއި ދީނުގެ އިލްމުވެރިންގެ އަގުވައްޓާލެވޭ. ދީން ދިފާއުކުރުމުގެ އެންމެ ބޮޑު ގާނޫނީ ބާރެއް އޮންނަނީ ގައުމުގެ ވެރިންގެ ކިބައިގައި ކަމަށްވާތީ ވެރީންގެ އަގު ވައްޓާލެވޭ. މުއައްސަސާތަކަށް ގުރުބާން ކޮށްލެވޭ،" އެމަނިކުފާނު ވިދާޅުވި އެވެ.
ރާއްޖެއަށް ދިމާވެފައިވާ އެންމެ ބޮޑު ނުރައްކާތައް ކަމަށްވާ ރަށްގިރުމާއި އުދައެރުމުން ގައުމު ސަލާމަތްކުރަން މަސައްކަތް ކުރާ ގޮތަށް "ކަސިޔާރު ފިކުރީ ރާޅުތަކުން" ދިވެހި ޖީލުތަކުގެ ހިތްތަކާއި ވިސްނުން ސަލާމަތް ކުރަން ބުރަ މަސައްކަތްތަކެއް ކުރަންޖެހޭ ކަމަށް ވެސް ރައީސް ވިދާޅުވި އެވެ.
"ކަސިޔާރު ފިކުރީ ރާޅުތަކުން އަޅުގަނޑުމެންގެ ޖީލުތަކުގެ ހިތްތަކާއި ވިސްނުންތައް ސަލާމަތްކުރަން ބުރަ މަސައްކަތްތަކެއް ކުރަން ޖެހޭ. މިކަމުގައި ތިޔައިން ކޮންމެ ބެލެނިވެރިއެއް، ކޮންމެ މުދައްރިސެއް އަދި ކޮންމެ ރައްޔިތެއްގެ އިސްނެންގެވުމަށް އަޅުގަނޑު އިލްތިމާސްކުރަން،" އެމަނިކުފާނު ވިދާޅުވި އެވެ.
މިއަދުގެ ގައުމީ ޖަލްސާގައި ހަތް ބޭފުޅުންނަށް ގައުމީ ޝަރަފުގެ އިނާމު ވަނީ ދީފަ އެވެ. ހިތްވަރު ދިނުމުގެ އިނާމު ނުވަ ބޭފުޅަކަށް އަދި އެ ކުންފުންޏަށް ލިބުނެވެ. އަދި ދިވެހި ގައުމަށް ހިދުމަތް ކުރުމުގެ އެންމެ މަތީ ޝަރަފު ވެސް މިއަދު އެރުވި އެވެ. އެ ޝަރަފު ދެއްވީ ހުސެއިން ސަލާހުއްދީނަށެވެ.
