އަމިއްލަވަންތަކަމަށް ލޯބި ނުކުރެވޭ ނަމަ މިނިވަންކަމަށް ވެސް ލޯބި ނުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ދަރުބާރުގޭގައި މިއަދު ބޭއްވި ގައުމީ ދުވަހުގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ގައުމެއް ދިފާއު ކުރެވޭނީ ގައުމެއްގެ އަމިއްލަވަންތަކަން ވެސް ދިފާއުކޮށްގެން ކަމަށެވެ.
"އަމިއްލަވަންތަކަމަށް ލޯބިނުކުރެވޭ ނަމަ މިނިވަންކަމަށް ލޯތްބެއް ނުކުރެވޭނެ. ހަމަ އެހެންމެ އަމިއްލަވަންތަކަން ދިފާއު ނުކުރެވޭ ނަމަ، މިނިވަންކަން ދިފާއެއް ވެސް ނުކުރެވޭނެ. އެހެން ކަމުން ގައުމެއް ދިފާއުކުރުމުގައި އެ ގައުމެއްގެ އަމިއްލަވަންތަކަން ދިފާއުކުރަންޖެހޭ،" ރައީސް މުއިއްޒު ވިދާޅުވި އެވެ.
އެ ޖަލްސާގައި ވާހަކަ ދައްކަވަމުން ރައީސް ވިދާޅުވީ ތަނެއްގެ ބާރާއި ނުފޫޒު އަބަދުވެސް އޮންނާނީ އެތަނެއްގެ މުއްސަނދިކަން ނުވަތަ ރިސޯސްތައް އެބައެއްގެ އަތުގައި ބަޔަކަށް ކަމަށެވެ.
"ތަނެއްގެ ބާރާ ނުފޫޒު އަބަދުވެސް އޮންނާނީ އެތަނެއްގެ މުއްސަނދިކަން ނުވަތަ ރިސޯސްތައް އެބައެއްގެ އަތުގައި އޮތް ބަޔަކަށް. ރިސޯސްތައް އަތްމައްޗަށް އަރާނީ މަސައްކަތްތެރިކަމާއި ހުނަރުވެރިކަމުގެ ތެރޭން،" ރައީސް ވިދާޅުވި އެވެ.
އޭގެ އިތުރުން، ގައުމެއް ދެމިތިބުމަށްޓަކައި އެންމެ އިސްކަމެއް ދޭންޖެހޭނީ އެބައެއްގެ ގައުމު މިލްކުގައި ބާއްވަން ކަމަށް ވެސް ރައީސް ވިދާޅުވި އެވެ.
"ގައުމެއް ދެމި ތިބުމަށް ޓަކާ، ނުވަތަ މާދަމާގެ ސަލާމަތް ކަށަވަރުކުރުމަށް ޓަކާ، އެންމެ އިސްކަމެއް ދެނީ އެބައެއްގެ ރާއްޖެ އެބައެއްގެ މިލްކުގައި ބާއްވާން. މިއީ ވެސް ތަބީއީ ކަމެއް،" ރައީސް ވިދާޅުވި އެވެ.
އެ ޖަލްސާގައި ވާހަކަ ދައްކަވަމުން، ކަސިޔާރު "ފިކުރީ ރާޅުތަކުން" ގައުމު ސަލާމަތް ކުރުމުގެ މުހިންމުކަމާ ގުޅޭ ގޮތުން ވެސް ރައީސް ވާހަކަ ދެއްކެވި އެވެ.
"ކަސިޔާރު ފިކުރީ ރާޅުތަކުން އަޅުގަނޑުމެންގެ ޖީލުތަކުގެ ހިތްތަކާއި ވިސްނުންތައް ސަލާމަތްކުރަން ބުރަ މަސައްކަތްތަކެއް ކުރަން ޖެހޭ. މިކަމުގައި ތިޔައިން ކޮންމެ ބެލެނިވެރިއެއް، ކޮންމެ މުދައްރިސެއް އަދި ކޮންމެ ރައްޔިތެއްގެ އިސްނެންގެވުމަށް އަޅުގަނޑު އިލްތިމާސްކުރަން،" އެމަނިކުފާނު ވިދާޅުވި އެވެ.
މިއަދުގެ ގައުމީ ޖަލްސާގައި ހަތް ބޭފުޅުންނަށް ގައުމީ ޝަރަފުގެ އިނާމު ވަނީ ދީފަ އެވެ. ހިތްވަރު ދިނުމުގެ އިނާމު ނުވަ ބޭފުޅަކަށް އަދި އެ ކުންފުންޏަށް ލިބުނެވެ. އަދި ދިވެހި ގައުމަށް ހިދުމަތް ކުރުމުގެ އެންމެ މަތީ ޝަރަފު ވެސް މިއަދު އެރުވި އެވެ. އެ ޝަރަފު ދެއްވީ ހުސެއިން ސަލާހުއްދީނަށެވެ.
