ކްލަބް މޯލްޑިވްސްގެ އަންހެން ޑިވިޝަން، އެއިޓީން ތާޓީ ފުޓްސަލް ފިއެސްޓާގެ ފުރަތަމަ މެޗުތަކުން، ޕޮލިސް ކްލަބާއި ކްލަބް ވެމްކޯ އިން ތަފާތު ބޮޑު މޮޅެއް ހޯދައިފި އެވެ.
ރޭ ކުޅުނު ގްރޫޕް އޭގެ މެޗުން، ޕޮލިސް ކްލަބުން ވަނީ 17-0 އިން ޔޫތު ރިކްރިއޭޝަން ކްލަބް ބަލިކޮށްފަ އެވެ. އަދި ގްރޫޕް ބީގެ މެޗުން، ހެލްތު ރެކްރިއޭޝަން ކްލަބް އަތުން ކްލަބް ވެމްކޯ މޮޅުވީ، 13-0 އިންނެވެ.
ޕޮލިސް ޓީމުގައި މި ފަހަރު ކުރިން ދިވެހި ސިފައިންގެ ކްލަބަށް ކުޅުނު ކުޅުންތެރިން ހިމެނެ އެވެ. މި ފަހަރުގެ މުބާރާތުގައި ސިފައިންގެ ކްލަބުން ބައިވެރިނުވެ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި މަރިޔަމް ރިފާ ވަނީ ޔޫތު ކޮޅަށް ނުވަ ގޯލު ޖަހައި ތިން ހެޓްރިކް ހަދައިފަ އެވެ. އެ ޓީމުގެ ފާތިމަތު ސައިނާ ވަނީ ހަތަރު ގޯލު ޖަހައިފަ އެވެ. ދެން އެ ޓީމުގެ ލަނޑުތައް ޖެހީ، ފާތިމަތު ޒައިނާ، އާމިނަތު ޒާހިޔާ، އައިޝަތު ރަވީނާ ދެ ގޯލެވެ.
ހެލްތާ ދެކޮޅަށް ކުޅުނު މެޗުގައި ވެމްކޯ ޓީމުގެ ސާލިޔާ ބޯޅަ ފޮނުވާލަނީ.--- ފޮޓޯ: އިމޭޖަސް،އެމްވީ
މި ގްރޫޕްގައި ދެން ހިމެނެނީ، ސްޓެލްކޯ ކްލަބާއި ދަރުމަވަންތަ ހޮސްޕިޓަލް އެވެ.
ރޭ ކުޅުނު ގްރޫޕް ބީގެ މެޗުގައި، ވެމްކޯގެ ފާތިމަތު އިނާޝާ އާދަމް ވަނީ ހަތަރު ގޯލު ޖަހައިފަ އެވެ. އަދި މަރިޔަމް ނޫރާ ވެސް ހަތަރު ގޯލު ޖެހިއިރު، ސަފިއްޔާ ރަފާ، ފާތިމަތު ސާލިޔާ، އައިމިނަތު ފަޒްލާ، ހައްވާ ހަނީފާ އަދި މަރިޔަމް މަލްސާ ޝަމީމް ވެސް ލަނޑު ޖެހި އެވެ.
ވެމްކޯ ޓީމުގައި އެންމެ ފަހުން އެއިޓީން ތާޓީ މުބާރާތް ކާމިޔާބުކުރި ޓީމު ފެނަކައިގެ ކުޅުންތެރިން ހިމެނެ އެވެ. މި ފަހަރުގެ މުބާރާތުގައި ފެނަކަ ވާދަނުކުރެ އެެވެ. މި ގްރޫޕްގައި ދެން ހިމެނެނީ އެމްޕީއެލް އެވެ. އެމްޕީއެލަށް މި މުބާރާތް ގިނަ ފަހަރު ހޯދައިދިން ސާލިޔާ މި ފަހަރު ހުރީ ވެމްކޯގަ އެވެ.
