ރޭ ފެށުނު ކްލަބް މޯލްޑިވްސް ކްލަސިކް 2024 ގައި ފުރަތަމަ ކުޅުނު މެޗުތަކުން، ކްލަބް އެސްޑީއެފްސީ އާއި ތައުލީމީ ގުޅުން އަދި ޓީމު ބަދަހި އިން މޮޅުވެއްޖެ އެވެ.
މި ފަހަރުގެ ކްލަބް މޯލްޑިވްސް މުބާރާތްތަކުގެ ތެރެއިން އެންމެ ގިނަ ޓީމު ވާދަކުރާ މުބާރާތަކީ ކްލަސިކް އެވެ. އެ މުބާރާތުގައި 32 ޓީމު ވަނީ ބައިވެރިވެފަ އެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ މުބާރާތް ފެށިގެންދިޔައިރު، ގްރޫޕް އޭގައި ތައުލީމީ ގުޅުމުން 5-2 އިން ފެހިފަހި ކްލަބް ބަލިކުރިއިރު، މި ގްރޫޕްގެ އަނެއް މެޗުން ޓްރާންސްޕޯޓް ރެކްރިއޭޝަން ކްލަބާއި ޓީމު ޕެމާ ވަނީ 1-1 އިން އެއްވަރުވެފަ އެވެ.
ގްރޫޕް ބީގައި، އެގްރި އާރްސީ އަތުން 2-0 އިން ކްލަބް އެސްޑީއެފްސީ މޮޅުވިއިރު، އެ ގްރޫޕްގެ އަނެއް މެޗުގައި، ޓީމު ބަދަހި އިން ވަނީ 7-2 އިން ހާރިޖީ ބަލިކޮށްފަ އެވެ.
ފެހިފަހި ކްލަބާއި ތައުލީމީ ގުޅުން ބައްދަލުކުރި މެޗުގެ ތެރެއިން.---- ފޮޓޯ: އިމޭޖަސް.އެމްވީ
ޕެމާ އިން ރޭގެ މެޗުގައި، މުހައްމަދު ނިއުޝާދު ޖެހި ގޯލުން ލީޑުނަގައިފައިވަނިކޮށް، މެޗުގެ ފަހު ވަގުތުގައި، ޓްރާންސްޕޯޓަށް އެއްވަރުކޮށްދިނީ، ނަސާތު ނަސީމް އެެވެ.
ތައުލީމީ ގުޅުމަށް ރޭގެ މެޗުގައި ލަނޑުތައް ޖަހައިދިނީ، އުމަރު ފާރޫގު ދެ ގޯލުގެ އިތުރުން، އިބްރާހިމް ހަސަން، މުހައްމަދު އަޒުމޫން އަދި އަލީ އަފުރާދު ގޯލެކެވެ. ފެހިފަހި ކްލަބްގެ ލަނޑުތައް ޖެހީ، އީމާން އިސްމާއިލް އަދި އަހުމަދު މުއާދު އެވެ.
މުޅިން އަލަށް ކްލަސިކް މުބާރާތުގައި ކުޅުނު އެސްޑީއެފްސީ މޮޅުކޮށްދިން ލަނޑުތައް ޖެހީ، ހުސެއިން ފައުޒާން ދެ ގޯލެވެ. އަދި މި ގްރޫޕްގެ އަނެއް މެޗުގައި، ބަދަހިން ހާރިޖީ ކޮޅަށް ލަނޑުތައް ޖެހީ، އާސިފް ހަނީފް ފަސް ގޯލާއި އަލީ ރިޒްވީން އަދި މުހައްމަދު ޝުހާން އެވެ. އަދި ހާރިޖީގެ ލަނޑުތައް ޖެހީ، މުހައްމަދު ދާނިޝް ނިމާލް އެވެ.
ކްލަބް މޯލްޑިވްސް ކްލަސިކްގެ ހަ މެޗެއް މިރޭ ވެސް ކުޅޭނެ އެވެ.
