ހައުސިން ޑިވެލޮޕްމަންޓު ކޯޕަރޭޝަނުގެ މުވައްޒަފުން ވެރިކަންކުރާ ޕީޕަލްސް ނޭޝަނަލް ކޮންގްރެސް އަށް ސޮއިކުރަން މަޖުބޫރު ކުރަމުން ގެންދާކަން އެނގިއްޖެ އެވެ.
"އަދަދު" އަށް މައުލޫމާތު ދިން އެޗްޑީސީގެ މުވައްޒަފުން ބުނީ އެ ކުންފުނީގެ މުވައްޒަފުން ލައްވައި ޕީއެންސީއަށް ސޮއިކުރަން މަޖުބޫރު ކުރަމުން ދަނީ މިހާރު އެ ޕާޓީން ކުރިއަށް ގެންދާ މެމްބަޝިޕް ޑްރައިވްގެ ތެރެއިން ކަމަށެވެ.
އެއީ އެ ކުންފުނީގެ ވެރިއަކު އިސްވެ ހުންނަވައިގެން ކުރައްވާ ކަމެއް ކަމަށް ސޯޝަލް މީޑިއާގައި ވަނީ އަޑުފެތުރިފަ އެވެ. އޭނާ ބޭނުންވަނީ މި މަހުގެ ނުވައެއްގެ ކުރިން ރައީސް ޑރ. މުހައްމަދު މުއިއްޒު އަށް ގިނަ އަދަދެއްގެ މެމްބަޝިޕް ފޯމު ހުށަހެޅުމަށް ކަމަށް ދައުރުވަމުންދާ ޕޯސްޓުގައި ބުނެފައިވެ އެވެ.
ޕީއެންސީން މިހާރު ހިންގާ މެމްބަރުން އިތުރުކުރުމުގެ ހަރަކާތުގައި އެ ޕާޓީގެ ލީޑަޝިޕުގައި ހިމެނޭ ވަޒީރުންނާއި ކުންފުނިތަކުގެ އިސްވެރިން ދަނީ ހަރަކާތްތެރިވަމުންނެވެ. އެ ބޭފުޅުންގެ މެދުގައި ރައީސްގެ ތާއީދު ހޯދުމަށް ވާދަވެރިކަމެއް އޮތް ކަމަށް ވެސް އެ ޕާޓީގެ އެކި މަސްދަރުތަކުން މި ނޫހަށް މައުލޫމާތު ދީފައިވެ އެވެ.
މީގެ އަހަރެއް ކުރިން ޕީއެންސީގައި ތިބީ އެންމެ 3،000 އެއްހާ މެންބަރުންނެވެ. އެއިރު އެ ޕާޓީ އޮތީ ޕީއެންސީ/ޕީޕީއެމް ކޯލިޝަނުގެ ކުޑަ ޕާޓީގެ ގޮތުގަ އެވެ. ނަމަވެސް އިލެކްޝަންސް ކޮމިޝަނުގެ ދަފުތަރުގައި މިވަގުތު އެ ޕާޓީގެ މެންބަރުންގެ ގޮތުގައި 28،704 މީހުން އެބަތިއްބެވެ. ޕާޓީއަށް ސޮއިކުރި މީހުންގެ އަދަދު އެއަށްވުރެ ގިނަވާނެ ކަމަށް އެ ޕާޓީގެ އިސްވެރިން މީގެކުރިން ބުނެފައިވެ އެވެ.
ޕީއެންސީއަށް މެންބަރުން އިތުރުކުރުމުގެ މަސައްކަތް މީގެ މަހެއްހާ ދުވަސް ކުރިން ފެށީ، ޕީޕީއެމް އުވައިލުމުގެ މަސައްކަތް ފަށައިގެން ކުރިއަށް ގެންދާ ކަމަށް މައުލޫމާތު ލިބިފައިވަނިކޮށެވެ.
ޕީޕީއެމް އުވައިލުމުގެ މަސައްކަތް ފެށީ ރައީސް ޑރ. މުހައްމަދު މުއިއްޒު އާއި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ބޭނުންވެގެން ކަމަށް، އެކަމާ ގުޅޭ ގޮތުން "އަދަދު" ނޫހާ ވާހަކަ ދެއްކި ޕީޕީއެމް/ޕީއެންސީގެ މެންބަރުން ވިދާޅުވި އެވެ.
