މެންޗެސްޓާ (ސެޕްޓެމްބަރު 4) - އިނގިރޭސި ޕްރިމިއާ ލީގުގެ ޗެމްޕިއަންކަން ހޯދަން މެންޗެސްޓާ ޔުނައިޓެޑް ތައްޔާރެއް ނޫން ކަމަށް އެ ޓީމުގެ ކެޕްޓަން، ބްރޫނޯ ފެނާންޑޭސް ބުނެފި އެވެ.
މި ސީޒަނުގައި ޔުނައިޓެޑުން ކުޅުނު ހަތަރު މެޗުގެ ތެރެއިން ތިން މެޗުން ވަނީ ބަލިވެފަ އެވެ. އެ ގޮތުން، ޗެރިޓީ ޝީލްޑް މެޗުން ޕެނަލްޓީ ޖަހައިގެން މެންޗެސްޓާ ސިޓީ އަތުން ބަލިވީ އެވެ. ޕްރިމިއާ ލީގުގެ ފުރަތަމަ މެޗުގައި، ފަހު ވަގުތު ލަނޑުޖަހައި، ޔުނައިޓެޑުން ފުލަމް އަތުން 1-0 އިން މޮޅުވި އެވެ. އެކަމަކު، ދެން ކުޅުނު ދެ މެޗުގައި ރަށުންބޭރުގައި ބްރައިޓަން އަތުން 2-1 އިން އަދި އަމިއްލަ ދަނޑުގައި ލިވަޕޫލް އަތުން ވަނީ 3-0 އިން ބަލިވެފަ އެވެ.
ލިވަޕޫލް މެޗަށް ފަހު ދިން އިންޓަވިއުއެއްގައި ފެނާންޑޭސް ބުނީ، ހަގީގަތަކީ ލީގު ހޯދަން ޔުނައިޓެޑުން އަދި މަސައްކަތް ކުރަން ޖެހޭ ކަމަށެވެ.
"ފެންނަން އޮތް ހަގީގަތަކީ ޕްރިމިއާ ލީގުގެ ޗެމްޕިއަންކަން ހޯދަން އަހަރެމެން ތައްޔާރެއް ނޫން. އަހަންނަށް އެކަން އެނގޭ. އެކަމަކު، އަހަރެމެން ތަށި ހޯދަން ފައިޓްކުރާނީ ޔަގީންކަމާ އެކު ހާސިލްކުރެވިދާނެ ކަންކަމަށް ވިސްނައިގެން. އެއީ، ގަދަ ހަތަރެއްގައި ނިންމައި، ޗެމްޕިއަންސް ލީގަށް އަލުން ކޮލިފައިވެގެން،" ޑެޒްން ސްޕޯޓްސް އަށް ދިން އިންޓަވިއުގައި ފެނާންޑޭސް ބުންޏެވެ.
"އެންމެ ބޮޑު ލަނޑުދަނޑިއަށް ވާސިލްވާން މި މަސައްކަތް ކުރަނީ، އެއީ ޗެމްޕިއަންޝިޕް (ލީގު) ކާމިޔާބުކުރަން"
މި މަހު 14 ވަނަ ދުވަހު، އިނގިރޭސި ޕްރިމިއާ ލީގުގައި ސައުތެމްޓަން އަތުން ޔުނައިޓެޑް ބަލިވެއްޖެނަމަ، އެ ވެގެންދާނީ، 1986-1987 ވަނަ ސީޒަނަށް ފަހު ލީގުގައި ޔުނައިޓެޑްގެ އެންމެ ދަށްކޮށް ފަށާ ފަހަރަށެވެ. ވިހި ފަހަރު ޕްރިމިއާ ލީގުގެ ޗެމްޕިއަންކަން ހޯދާފައިވާ ޔުނައިޓެޑުން އެންމެ ފަހުން ލީގު ކާމިޔާބުކުރީ 2013 ވަނަ އަހަރު އެވެ.
