އަލް މަރްހޫމް ހުސައިން ސަލާހުއްދީންގެ ހަނދާނަށް ދިވެހި ގައުމިއްޔަތަށް ހިދުމަތް ކުރުމުގެ އެންމެ މަތީ ޝަރަފު އެރުވުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.
ރައީސް އޮފީހުން ބުނީ އެ ޝަރަފު ސަލާހުއްދީންގެ ހަނދާނަށް އެރުވުމަށް ރައީސް ނިންމެވީ ދިވެހި ގައުމިއްޔަތުގެ އެންމެ އިސް ބަހާތައް ކަމުގައިވާ ދިވެހީންގެ ދީނާއި ދިވެހީންގެ ދިވެހި ބަހާއި ތަރިކަ އާއި ސަގާފަތް ފަދަ ރޮނގުތަކުން ދިވެހީންގެ ވިސްނުމާއި ފިކުރީ ތަރައްގީއަށް މަގުފަހި ކޮށްދެއްވައި އިލްމުގެ ނޫރު ފެތުރުއްވުމަށް ހުސައިން ސަލާހުއްދީން ކުރައްވާފައިވާ ގައުމީ ހިދުމަތަށްޓަކައި ކަމަށެވެ.
1948 ގައި އަވަހާރަވި ހުސައިން ސަލާހުއްދީނަކީ ދިވެހި ތާރީހު ދުށް އެންމެ ހިދުމަތްތެރި އެއް އަދީބެވެ. އެގޮތުން އެތައް ރޮނގަކުން ސަލާހުއްދީން ވަނީ ޅެމާއި ރައިވަރާއި މަޒުމޫނުތަކުގެ އިތުރުން ވާހަކަތަކާއި ދީނީ ފޮތްތައް ލިޔުއްވައިފަ އެވެ.
ސަލާހުއްދީން ލިޔުއްވި މަޝްހޫރު ފޮތްތަކުގެ ތެރޭގައި، އައްސީރަތުއް ނަބަވިއްޔާ އަލްމުތަރުޖަމަތި ބިއްލުގަތިލް މަހަލްދީބިއްޔާ (ރަސޫލާގެ ސީރަތު) އާއި ތަސްޖީދުލް އުޒުހާނި ފީ ތަޖްވީދުލް ގުރުއާނި އާއި އައްތުހްފަތުލް އަދަބިއްޔާ ލިއްތުއްލާބިއް ލުގަތިލް މަހަލްދީބިއްޔާ ފަދަ ފޮތްތައް ހިމެނެ އެވެ.
ދިވެހި ގައުމިއްޔަތަށް ހިދުމަތް ކުރުމުގެ އެންމެ މަތިވެރި ޝަރަފު ހުސައިން ސަލާހުއްދީންގެ ހަނދާނަށް އެރުވުން އޮންނާނީ ގައުމީ ދުވަހުގެ މުނާސަބަތުގައި މާދަމާ ހެނދުނު 9:00 ގައި ބާއްވާ ރަސްމީ ޖަލްސާގައި ކަމަށް ރައީސް އޮފީހުން ބުންޏެވެ. ގައުމިއްޔަތަށް ހިދުމަތް ކުރުމުގެ އެންމެ މަތިވެރި ޝަރަފުގެ ގޮތުގައި ރައީސް ދެއްވާނީ ޝަރަފުގެ އައްޑަނަ އެކެވެ.
ދިވެހި ގައުމިއްޔަތަށް ހިދުމަތް ކުރުމުގެ އެންމެ މަތިވެރި ޝަރަފަކީ ދިވެހި ގައުމިއްޔަތަށް ފާހަގަ ކޮށްލެވޭ ފަދަ ހިދުމަތްތަކެއް ކުރައްވާފައިވާ ބޭފުޅުންނަށް ރައީސް ދެއްވާ އެންމެ މަތިވެރި ޝަރަފެވެ. މި ހާއްސަ ޝަރަފު ދެއްވުމަށް ރައީސް ކަނޑައެޅުއްވީ ދިވެހި ރާއްޖޭގެ އިއްޒަތުގެ ގާނޫނުގެ ހަވަނަ މާއްދާގެ ދަށުން ރައީސްއަށް ލިބިވަޑައިގަންނަވާ އިހުތިޔާރުގެ ދަށުންނެވެ.
މާދަމާ އޮންނަ ގައުމީ ދުވަހުގެ ރަސްމީ ޖަލްސާގައި ޝަރަފުވެރިކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު ދެއްވުން އޮންނާނެ އެވެ. ޝަރަފުވެރިކަމުގެ ގައުމީ އިނާމު މިއަހަރު ލިބިވަޑައިގަންނަވަނީ ހަތް ބޭފުޅަކަށް ކަމަށް ރައީސް އޮފީހުން ބުންޏެވެ.
އެގޮތުން އެ ބޭފުޅެއްގެ އަޑުން ސިޔަރަތު ވިދާޅުވެފައިވާ ހ. ހާޖަރާގޭ، އަލް މަރުހޫމް މުހައްމަދު ތައުފީގުގެ ހަނދާނަށް ވެސް ޝަރަފުގެ އިނާމު އެރުވުމަށް ރައީސް ވަނީ ނިންމަވައިފަ އެވެ.
މި އަަހަރުގެ ހިތްވަރު ދިނުމުގެ އިނާމު ލިބިވަޑައިގަންނަވަނީ 10 ބޭފުޅަކަށް ކަމަށް ވެސް ރައީސް އޮފީހުން ބުންޏެވެ. ގައުމީ އިނާމުގެ ގޮތުގައި ރައީސް ދެއްވާނީ ޝަރަފުގެ އައްޑަނަ އާއި ޝަރަފުގެ ބެޖުގެ އިތުރުން ހަނދާނީ ލިޔުމެކެވެ.
ހިތްވަރު ދިނުމުގެ ގައުމީ އިނާމުގެ ގޮތުގައި ރައީސް ދެއްވާނީ ހަނދާނީ ފިލައަކާއި ހަނދާނީ ލިޔުމެކެވެ.
