ކްލަބް މޯލްޑިވްސް ކަޕްގެ އެންމެ ފަހުގެ ޗެމްޕިއަން، ކްލަބް ވެމްކޯ އިން މި ފަހަރުގެ މުބާރާތުގައި ވެސް ނުކުންނާނީ ޓީމުގައި އީރާނުގެ އަލީ ރެޒާ ޝެއިކްލާރު ހިމަނައިގެން ކަމަށް އެ ޓީމުން ބުނެފި އެެވެ.
ރޯޑް ރެކްރިއޭޝަން ކްލަބް އަތުން 5-3 އިން މޮޅުވެ، ވެމްކޯ އިން މިދިޔަ އަހަރުގެ ކްލަބް މޯލްޑިވްސް ކަޕްގެ ޗެމްޕިއަންކަން ހޯދިއިރު، އެ މުބާރާތުގައި އެ ޓީމުގެ އިރާނުގެ ތަރި، އަލީ ރެޒާ ވަނީ މޮޅު ކުޅުމެއް ދައްކައިފަ އެވެ.
މުބާރާތުގައި ތިން ގޯލު ޖަހައި، އެއް މެޗުގެ މޮޅު ކުޅުންތެރިއަކަށް ހޮވުނު އަލީ ރެޒާގެ ކުޅުން މެޗަކަށް ފަހު މެޗެއް ރަނގަޅުވަމުން ދިއުމަކީ، ވެމްކޯ އަށް މުބާރާތުގައި ކާމިޔާބު ހޯދުމަށް ކުރިމަތިވި އެއް ފަސޭހަ އެވެ.
ކްލަބް މޯލްޑިވްސް މުބާރާތްތައް ފެށުމުގެ ގޮތުން، މިރޭ، ކިންގްސް ކަޕްގެ ނަމުގައި ވަރުގަދަ މެޗެއް ކުޅޭނެ އެވެ. މި މެޗުގައި ކްލަބް މޯލްޑިވްސް ކަޕްގެ ޗެމްޕިއަނުން ކަމަށްވާ ވެމްކޯ ބައްދަލުކުރާނީ ރިސޯޓް ޗެމްޕިއަންސް ލީގުގެ ޗެމްޕިއަން، ޖޯލި މޯލްޑިވްސްއާ އެވެ.
ވެމްކޯ ޓީމުގައި އަލީ ރެޒާގެ އިތުރުން، ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) ހިމެނެ އެވެ. ކުރިން މޯލްޑިވްސް ޕޯޓްސް ލިމިޓެޑް (އެމްޕީއެލް)އާ އެކު، ކްލަބް މޯލްޑިވްސް ކަޕް ކާމިޔާބުކުރި ދަގަނޑޭ، ވެމްކޯ ޓީމަށް ކުޅޭނީ ކިންގްސް ކަޕްގައި އެކަންޏެވެ.
ވެމްކޯ އިން ދެކެނީ، އެ ކްލަބްގެ ޖޯޒީގައި ދަގަނޑޭ މި ހާއްސަ މެޗު ކުޅުމަކީ ޝަރަފެއްގެ ގޮތުގަ އެވެ.
ކްލަބް މޯލްޑިވްސް މި އަހަރު ބާއްވާ ތިން މުބާރާތަކީ ކްލަބް މޯލްޑިވްސް ކަޕް، ކްލަބް މޯލްޑިވްސް ކްލަސިކް އަދި އެއިޓީން ތާޓީ ފުޓްސަލް ފިއެސްޓާ އެވެ. ކްލަބް މޯލްޑިވްސް މުބާރާތްތައް ފަށާނީ އާދިއްތަ ދުވަހުގެރޭ ރިސޯޓް ލީގު ޗެމްޕިއަނުން، ޖޯލި ބީން އާއި މިދިޔަ އަހަރުގެ ކްލަބް މޯލްޑިވްސް ކަޕް ޗެމްޕިއަން، ވެމްކޯ އިން ކުޅޭ ކިންގްސް ކަޕް މެޗުންނެވެ.
ކްލަބް މޯލްޑިވްސް ކްލަސިކް އާއި އެއިޓީން ތާޓީ ފުޓްސަލް ފިއެސްޓާ ފަށާނީ އަންގާރަ ދުވަހު އެވެ. އަދި ކްލަބް މޯލްޑިވްސް ކަޕް ފަށަން ތާވަލުކޮށްފައިވަނީ، ސެޕްޓެމްބަރު 23 ވަނަ ދުވަހު އެވެ.
ކިންގްސް ކަޕް މެޗު މިރޭ ފަށާނީ 21:45 ގަ އެވެ. އޭގެ ކުރިން، އޮންނާނީ ކްލަބް މޯލްޑިވްސްގެ އޯޕަނިން ސެރެމަނީ އެވެ. ޓީމުތަކުގެ ޖޯޒީތައް ތައާރަފްކުރުމާއި އެހެނިހެން ހަރަކާތްތައް ފަށާނީ މިރޭ 20:30 ގަ އެވެ.
