ކްލަބް މޯލްޑިވްސް ކަޕްގެ އެންމެ ފަހުގެ ޗެމްޕިއަން، ކްލަބް ވެމްކޯ އާއި މުބާރާތުގެ ކާމިޔާބު އެއް ޓީމު ކަމަށްވާ މޯލްޑިވްސް ޕޯޓްސް ލިމިޓެޑް (އެމްޕީއެލް)، މި ފަހަރުގެ މުބާރާތުގެ އެއް ގްރޫޕެއްގައި ވާދަކުރަން ޖެހިއްޖެ އެވެ.
ކްލަބް މޯލްޑިވްސް މި އަހަރު ބާއްވާ ތިން މުބާރާތް، ކްލަބް މޯލްޑިވްސް ކަޕް، ކްލަބް މޯލްޑިވްސް ކްލަސިކް އަދި އެއިޓީން ތާޓީ ފުޓްސަލް ފިއެސްޓާގެ ގުރުއަތުލުން ރޭ ވަނީ ބާއްވައިފަ އެވެ. ކްލަބް މޯލްޑިވްސް މުބާރާތްތައް ފަށާނީ އާދިއްތަ ދުވަހުގެރޭ ރިސޯޓް ލީގު ޗެމްޕިއަނުން، ޖޯލި ބީން އާއި މިދިޔަ އަހަރުގެ ކްލަބް މޯލްޑިވްސް ކަޕް ޗެމްޕިއަން، ވެމްކޯ އިން ކުޅޭ ކިންގްސް ކަޕް މެޗުންނެވެ.
އެ އަށް ފަހު، ކްލަބް މޯލްޑިވްސް ކްލަސިކް އާއި އެއިޓީން ތާޓީ ފުޓްސަލް ފިއެސްޓާ ފަށާނީ ސެޕްޓެމްބަރު ތިން ވަނަ ދުވަހު އެވެ. އަދި ކްލަބް މޯލްޑިވްސް ކަޕް ފަށަން ތާވަލުކޮށްފައިވަނީ، ސެޕްޓެމްބަރު 23 ވަނަ ދުވަހު އެވެ.
ގްރޫޕްތައް ރޭވިފައިވާ ގޮތަށް ބަލާއިރު، އެންމެ ފަހުގެ ޗެމްޕިއަން، ވެމްކޯ އާއި މުބާރާތުގެ ތަށި ތިން ފަހަރު ހޯދާފައިވާ އެމްޕީއެލްގެ އިތުރުން ގްރޫޕް ޖީގައި ހިމެނެނީ، ކްލަބް އާރްއޯއެލް އާއި އެމްއައިބީ އެސްއެވެ.
މި ފަހަރުގެ ކްލަބް މޯލްޑިވްސް ކަޕްގައި 28 ޓީމެއް ހަތް ގްރޫޕަކަށް ބަހާފައި އޮތްއިރު، ކޮންމެ ގްރޫޕަކުން ގަދަ ދެ ޓީމު އަނެއް ބުރަށް ހޮވޭނެ އެވެ. ނޮކައުޓް ބުރުގެ ފަހު ދެ ޖާގަ ލިބޭނީ ހަތް ގްރޫޕްގެ ތިން ވަަނަ ޓީމުގެ ތެރެއިން އެންމެ ރަނގަޅު ނަތީޖާ ނެރޭ ދެ ޓީމަކަށެވެ.
މިދިޔަ އަހަރުގެ ރަނަރަޕް ރޯޑް ރިކްރިއޭޝަން ކްލަބް (އާރްއާރްސީ) މި ފަހަރު އޮތީ، ގްރޫޕް އެފްގަ އެވެ. އެ ގްރޫޕްގައި ދެން ހިމެނެނީ، މޯލްޑިވިއަން، އުރީދޫ އަދި ފަހި ރެކްރިއޭޝަން ކްލަބް އެވެ. މުބާރާތުގެ އެންމެ ކާމިޔާބު ޓީމު، އެސްޓީއޯ، އޮތީ، ޕްރިސަން ކްލަބް، އޭވިއޭޝަން ސެކިއުރިޓީ ކްލަބް އަދި ޕޮލިސް ކްލަބާ އެކު ގްރޫޕް ސީގަ އެެވެ.
މި ފަހަރުގެ މުބާރާތަށް ވަރުގަދަ އަށް ތައްޔާރުވާ ސްޓެލްކޯ ކްލަބް ހިމެނެނީ، ކަސްޓަމްސް އާއި ކްލަބް އިމިގްރޭޝަން އަދި ދިރާގުއާ އެކު ގްރޫޕް ޑީގަ އެވެ. ގްރޫޕް އޭގައި އޮތީ ކްލަބް އެޗްޑީސީ، ކްލަބް ފެން، ޓީމު އެލައިޑް އަދި ކްލަބް އާސަންދަ އެވެ.
ކްލަބް މޯލްޑިވްސްގެ މުބާރާތްތަކުގެ ތެރެއިން މި ފަހަރު އެންމެ ގިނަ ޓީމު ވާދަކުރަނީ، ކްލަސިކްގަ އެވެ. އެ ގޮތުން މިދިޔަ އަހަރު ފެށި ކްލަސިކް މުބާރާތުގައި މި ފަހަރު 32 ޓީމެއް ވާދަކުރާނެ އެވެ.
މިދިޔަ އަހަރުގެ ޗެމްޕިއަން، ޓީމު ޑީޖީއޭ ހިމެނެނީ، ގްރޫޕް ޑީގަ އެވެ. އެ ގްރޫޕްގައި އޮތީ، ހެލްތު ރެކްރިއޭޝަން ކްލަބާއި މޯލްޑިވްސް ޓޫރިޒަމް ކްލަބް އަދި މާލެ ސިޓީ ކައުންސިލް އެވެ. މިދިޔަ އަހަރުގެ ރަނަރަޕް ކްލަބް 220 ހިމެނެނީ، ޓްރޭޑް ކްލަބް، ކްލަބް އެންޑީއޭ އަދި އެޗްއީއެސް ކްލަބާ އެކު، ގްރޫޕް އެޗްގަ އެވެ.
ކްލަބް މޯލްޑިވްސް އިން މި އަހަރު އަންހެން ޑިވިޝަނަށް ކުރިއަށްގެންދަނީ އެއިޓީން ތާޓީ ފުޓްސަލް ފިއެސްޓާ އެކަންޏެވެ. އެ މުބާރާތުގައި ހަތް ޓީމު ބައިވެރިވެފައިވާއިރު، އެ ހަތް ޓީމު ވަނީ ދެ ގްރޫޕަކަށް ބަހާލައިފަ އެވެ. އެ ގޮތުން، ތިން ޓީމު ހިމެނޭ ގްރޫޕްގައި ކޮންމެ ޓީމެއް ކޮންމެ ޓީމަކާ ދެ ފަހަރު ކުޅޭނެ އެވެ.
އެ ގޮތުން، ގްރޫޕް އޭގައި ހިމެނެނީ، އެންމެ ފަހުގެ ރަނަރަޕް، ޕޮލިސް ކްލަބްގެ އިތުރުން، ޔޫތު ރެކްރިއޭޝަން ކްލަބް، ސްޓެލްކޯ ކްލަބް އަދި ދަރުމަވަންތަ އެވެ. ގްރޫޕް ބީގައި ހިމެނެނީ، މިދިޔަ ފަހަރު އެއިޓީން ތާޓީ ފުޓްސަލް ފިއެސްޓާ ކްލަސިކް ކާމިޔާބުކުރި ވެމްކޯ އާއި އެމްޕީއެލް އަދި ހެލްތު ރެކްރިއޭޝަން ކްލަބް އެވެ.
އެންމެ ފަހުގެ ޗެމްޕިއަން، ޓީމު ފެނަކަ މި ފަހަރުގެ ކްލަބް މޯލްޑިވްސްގެ އެއްވެސް މުބާރާތެއްގައި ބައިވެރިނުވެ އެވެ.
