ރިޔާދް، ސައުދީ އަރަބިއްޔާ (އޮގަސްޓް 27) - ރިޓަޔާކުރުމަށް ފަހު ފުޓުބޯޅައިގެ ކަންކަމުން ދުރުވުން އެއީ މި ވަގުތު ވިސްނާ ގޮތް ކަމަށް ދުނިޔޭގައި އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާ، ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ބުނެފި އެވެ.
ރޮނާލްޑޯ، 39, ސައުދީގެ ކުލަބް އަލް ނަސްރުގެ ކޮންޓްރެކްޓް އަންނަ އަހަރުގެ ހޫނު މޫސުމުގައި ހަމަވާނެ އެވެ. އެކަމަކު އަދި އިތުރު ދެ އަހަރެއްވަރު, ފުޓުބޯޅަ ކުޅޭނެ ކަމަށް ރޮނާލްޑޯ ބުންޏެވެ.
ދުނިޔޭގެ މޮޅު ފުޓްބޯޅަ ކުޅުންތެރިޔާ އަށް ދޭ އެވޯޑްތައް ގިނަ ފަަހަރުތަކެއް މަތިން ހޯދާފައިވާ، ރޮނާލްޑޯ ބުނީ އޭނާ ފުޓުބޯޅައިން ރިޓަޔާ ވާނީ އަލް ނަސްރުގެ ކުޅުންތެރިއެއްގެ ގޮތުގައި ކަމަށެވެ.
"އަހަރެން އަކަށް ބުނާކަށް ނޭނގޭ އަހަރެން އަވަހަށް ރިޓަޔާވާނެ ކަމެއް. ދޭއް ނޫނީ ތިން އަހަރު ފަހުން ރިޓަޔާ ވާނީ. އެކަމަކު އަހަންއަށް ހީވަނީ އަހަރެން ރިޓަޔާ ވާނީ އަލް ނަސްރުގައި ހެން. އަހަރެން އަށް ސައުދީ ކަމުދޭ." ދާދި ފަހުން ރަސްމީ ޔޫޓިއުބް ޗެނަލް ލޯންޗްކުރި ރޮނާލްޑޯ ބުންޏެވެ.
ރިޓަޔާ ވުމަށްފަހު ފުޓުބޯޅައިގެ ކަންކަމުގައި އުޅުމުގެ ވިސްނުމެއް ނެތް ކަމަށް ރޮނާލްޑޯ ވަނީ ބުނެފަ އެވެ. ހާއްސަކޮށް ކުލަބެއްގެ ކޯޗެއްގެ ގޮތުގައި ފެނުން އެއީ ދުރު ކަމެއް ކަމަށް ރޮނާލްޑޯ ވަނީ ބުނެފަ އެވެ.
"ކޯޗެއްގެ ގޮތުގައި އަހަރެން ފެނުން އެއީ ދުރު ކަމެއް. ވިސްނުމުގައި ހުރީ ބޮޑަށް ފުޓުބޯޅައިގެ ކަންކަމުން ދުރުވާން" ރޮނާލްޑޯ ބުންޏެވެ.
ރޮނާލްޑޯ އަންނަނީ މިހާރުވެސް ފުޓުބޯޅައިގެ ބޭރުން ގިނަ ވިޔަފާރިތައް ކުރަމުންނެވެ. އެގޮތުން އޭނާގެ އަމިއްލަ ބްރޭންޑް "ސީއާރް7" ގެ ދަށުން ހެދުން ވިއްކުމާއި, ހޮޓާތަކުގެ އިތުރުން ރިއަލް އެސްޓޭޓް ވިޔަފާރިވެސް ރޮނާލްޑޯ އަންނަނީ ކުރަމުންނެވެ.
މީގެ އިތުރުން އޭނާގެ ސޯޝަލް މީޑިއާ ޕްލެޓްފޯމުތަކުންވެސް މިލިއަންނަށްވުރެ ގިނަ ޑޮލަރު އޭނާ އަށް މަހެއްގެ މައްޗަށް ލިބެ އެވެ.
