މީގެ ދެތިން ރޭ ކުރިން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ވަޑައިގަތީ، އާރަށުގައި ފުޓުބޯޅަ ކުޅުއްވަނިކޮށް ލިބުނު އަނިޔާއަކާ ގުޅިގެން ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ޕީއެންސީން ބޭއްވި ހަރުގެ ޖަލްސާގައި ރައީސް މުއިއްޒު މިހެން ވިދާޅުވީ، އެ މަނިކުފާނު އާރަށުގެ ފާހާނާތެރެއަށް ވެއްޓިގެން ހޮސްޕިޓަލަށް ގެންދެވި ކަމަށް ސޯޝަލް މީޑިއާގައި ވާހަކަ ފެތުރިގެން ގޮސްފައި ވަނިކޮށެވެ.
މީގެ ކުރިން ރައީސް މުއިއްޒުގެ ސިއްހީ ހާލަތުގެ ވާހަކައެއް ރައީސް އޮފީހުން ވެސް ހާމަކޮށްފައެއް ނެތެވެ.
"އަޅުގަނޑު މީގެ ދެތިން ދުވަސް ކުރިން ދިޔައިން ހޮސްޕިޓަލަށް. އަޅުގަނޑަކީ މާ ކުޅިވަރުގެ މީހެއް ނޫނަސް ހަފްތާއަކު ތިން ދުވަހު ފުޓުބޯޅަ ކުޅެވޭތޯ ބަލަން އާ ރަށުގައި އޮންނަ ދަނޑުގައި. އެންމެ ފަހުން ކުޅުނު ރޭ އަޅުގަނޑަށްވީ ގޮތަކުން އިންޖަރީއެއްވީ،" ރައީސް މުއިއްޒު ވިދާޅުވި އެވެ.
ހަސަންކުރުސީގެ ނަމުގައި ހިންގާ އެކްސް އެކައުންޓުން ބުނެފައިވާ ގޮތުގައި ރައީސް މުއިއްޒަށް ރޭ ވަރަށް ބޮޑަށް މައިގްރޭންގެ ތަދު އައިސްގެ މިރޭ ސިންގަޕޫރަށް ވަޑައިގަތުމަށް ވަނީ ނިންމައިފަ އެވެ.
އެ ވާހަކަތަކަށް ރައްދެއްގެ ގޮތުގައި ރައީސް މުއިއްޒު ވިދާޅުވީ މިރޭ ސިންގަޕޫރަށް ފުރާވަޑައިގަންނަވަނީ މައިގްރޭން ތަދުގެ ފަރުވާ އަށް ނޫން ކަމަށާއި، ފުޓުބޯޅަ ކުޅުއްވަނިކޮށް ލިބުނު އަނިޔާއާ ގުޅިގެންނާއި މީގެ ދެ އަހަރެންހާ ދުވަސްކުރިން ކުރި ސާރަޖީއަކާ ގުޅިގެން ކަމަށެވެ.
މާލޭ ސިޓީގެ މޭޔަރަކަށް މުއިއްޒު ހުންނެވިއިރު ސިންގަޕޫރުން ކުރީ ކޮން ކަހަލަ ސާޖަރީއެއް ކަމެއް މިހާތަނަށް ހާމަކޮށްފަ އެއް ނުވެ އެވެ.
ރައީސް މުއިއްޒު ވިދާޅުވީ އެ މަނިކުފާނާ ގުޅޭ ގޮތުން ފަތުރަމުން ދަނީ ގޮތު ވާހަކަތައް ކަމަށެވެ.
