ބ. އޭދަފުށި ކައުންސިލުން އެ ރަށުގެ ރައްޔިތުންނަށް ދޫކުރަން ޖެހޭ ގޯތި ދޫނުކޮށް ދިގުލައިގެންދާތީ އެކަމާ ހިތްހަމަނުޖެހުން ފާޅުކޮށް ރައްޔިތުން ރޭ ވެސް އިހުތިޖާޖުކޮށްފި އެވެ.
ސިލްސިލާކޮށް ރައްޔިތުން އިހުތިޖާޖު ކުރަމުން އަންނަތާ ދެ ދުވަސް ވެފައި ވަނީ އެ ރަށުން ދޫކުރާ 158 ގޯތި ލިބުނު މީހުންގެ ލިސްޓު އާންމުނުކުރާތީ، އެކަން އަވަސް ކުރުމަށް ގޮވާލަ އެވެ.
"އިހުތިޖާޖު ކުރަން ޖެހުނީ ގޯތި ލިސްޓު އާންމުނުކޮށް ކައުންސިލުން އެކަން ދިގު ދަންމާތީ ހިތްހަމަނުޖެހިގެން. ކައުންސިލުން އަމަލު ކުރަނީ ވެސް އެކަމުގައި މައްސަލަ ޖެހި ދިގުލައިގެންދާ ގޮތަށް. އެހެންވެ ލިސްޓު އާންމުކޮށް މިކަން އަވަހަށް ނިންމަން އަޑު މި އުފުލަނީ،" އޭދަފުށިން ވާހަކަ ދެއްކި މީހަކު ބުންޏެވެ.
ކައުންސިލުން މިދިޔަ ހުކުރު ދުވަހު ރަށުގެ ރައްޔިތުންނާ ބައްދަލުކޮށް މަޝްވަރާތައް ކުރި ނަމަވެސް، އެ މަޝްވަރާ ބައްދަލުވުން ނިމިފައި ވަނީ ހިޔާލުތަފާތުވުންތަކާ އެކުގަ އެވެ.
އޭދަފުށިން ވާހަކަ ދެއްކި މީހާ ބުނީ ބައްދަލުވުމުގައި ކައުންސިލުން ބުނެފައި ވަނީ ދޫކުރަން ހަމަޖެހިފައިވާ ބައެއް ގޯތިތައް އެހެން ތަނަކަށް ބަދަލުކުރަން ޖެހޭ ކަމަށެވެ.
"ސިލްސިލާ އިހުތިޖާޖުތައް ކުރިއަށް ގެންދާނަން މިކަމަށް ޖަވާބެއް ލިބެންދެން. ރައްޔިތުން ބޭނުމެއް ނުވޭ ގޯތިތައް މިހާރު ލިބޭ ތަން ބަދަލު ކުރާކަށް. ހައުސިން ޔުނިޓްތައް ވެސް އަޅަންވީ. އެކަމަކު އަނެއްކާ އެކަން ވާނެ ދުވަހެއް ވެސް ނޭގޭ. ލޭންޑް ޔޫޒް ޕްލޭން ވެސް އަލުން ބަދަލުވާނެ. ދުވަސްތަކެއް ނަގާނެ އަނެއްކާ. އެހެންވީމަ މިހާރު ލިސްޓު އާންމުކޮށް މިހާރު ވާން އޮތް ކަންތައް ކުރަން ޖެހޭ،" އޭނާ ބުންޏެވެ.
ގޯތިތައް ބަދަލުކުރަން ކައުންސިލުން ހުށަހެޅީ، މި ސަރުކާރުން އެ ރަށުގައި އަޅާ 1،000 ހައުސިން ޔުނިޓް ގޯތި ދޫކުރާ ސަރަހައްދަށް ވަންނާތީ ކަމަށް އޭނާ ބުންޏެވެ.
ނަމަވެސް އޭނާ ބުނީ ރައްޔިތުން ކައުންސިލުން ހުށަހެޅި ދެ ގޮތް ވެސް ބަލައިގަނެފައި ނުވާ ކަމަށެވެ. އެއީ ކައުންސިލުން ހުށަހެޅި ދެ ގޮތުން ވެސް ގޯތިތައް ބަދަލު ކުރަން ޖެހޭތީ ކަމަށް އޭނާ ބުންޏެވެ.
އޭދަފުށިން ގޯތި ދޫކުރަން 2020 ގައި އެ ގޯތިތައް ދޫކުރަން އިއުލާން ކުރި ނަމަވެސް، އެ ފަހަރު ގޯތިތައް ދޫކުރުން ހުއްޓުނީ 662 މީހުންގެ ތެރެއިން ގޯތި ލިބޭ ކަމަށް ކަނޑައެޅި 158 މީހުންގެ ލިސްޓު އާންމު ކުރުމާ ގުޅިގެން ދެ މީހަކު ޕޮއިންޓް ދިން ގޮތާ މެދު ޝަކުވާ ހުށަހެޅުމުން ކޯޓުންނެވެ.
އެ މައްސަލަތައް ބެލުމަށްފަހު އޭރު ކޯޓުން ނިންމީ ޝަކުވާ ހުށަހެޅި ދެ މީހުން ކޮޅަށެވެ. އެ ނިންމުމާ ގުޅިގެން އޭދަފުށި ކައުންސިލުން ގޯތި ލިބޭ މީހުންގެ ލިސްޓު ބާތިލްކޮށް، އަލުން ފޯމް ހުށަހަޅަން ހުޅުވާލީ މިދިޔަ އަހަރުގެ މެއި މަހު އެވެ. އެއާއެކު 700 އަށްވުރެ ގިނަ މީހުން ވަނީ 158 ގޯއްޗަށް ކުރިމަތިލާފަ އެވެ.
3،500 އަށްވުރެ ބޮޑު އާބާދީއެއް އޮންނަ އޭދަފުށިން ގޯތި އެންމެ ފަހުން ދޫކުރީ 1989 ގަ އެވެ. އެފަހަރު ދޫކުރީ 659 ގޯތި އެވެ.
