ރާއްޖޭގެ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަކުރަން ނިންމި ނިންމުން ބަދަލު ކޮށްފައިވާ ކަމަށް ބުނެ ފަތުރަމުން ދަނީ ހަގީގަތެއް ނެތް ވާހަކައެއްކަން އެނގިއްޖެ އެެވެ.
ބީއެމްއެލުން މިއަދު ގެނައި ބަދަލަކީ އެ ކުންފުނީގެ ޑިރެކްޓަރުންގެ ބޯޑުން ފާސް ކޮށްގެން ގެނައި ބަދަލެކެވެ. އެ ނިންމުން ބަދަލު ކުރެވޭނީ ވެސް އެ ކުންފުނީގެ ބޯޑު ބައްދަލުވުމެއް ބާއްވައިގެންނެވެ.
ބީއެމްއެލްގެ ނިންމުމަށް ބަދަލެއް ގެންނަން އެ ކުންފުނީގެ ބޯޑު ބައްދަލުވުމެއް އަދި ބާއްވާފައި ނުވާކަން، އިތުބާރު ހުރި މަސްދަރުތަކުން "އަދަދު" އަށް ވަނީ ކަށަވަރު ކޮށްފީފަ އެވެ.
"ބޯޑުގެ ބައްދަލުވުމެއް އަދި ނު ބާއްވާ، އެކަހަލަ ނިންމުމެއް ކުރިއަށް އޮތްތަނުގައި ނިންމުމުގެ ވިސްނުމެއް ވެސް ބޯޑުގެ ނެތް،" އެކަމުގެ މައުލޫމާތު އެނގޭ މީހަކު ބުންޏެވެ.
ބީއެމްއެލްގެ ނިންމުން އަދި ބަދަލު ކޮށްފައި ނުވި ނަމަވެސް، އެ ބޭންކުގެ ސީއީއޯ، ކާލް ސްޓުމްކެ ރައީސް އޮފީހަށް ގެންގޮސް އެ އޮފީހުގެ އިސްވެރިން މިއަދު ވަނީ ބައްދަލު ކުރައްވައިފަ އެވެ.
އެ ބައްދަލުވުން މިހާރު ނިމިފައިވާއިރު، ބައްދަލުވުމާ ގުޅޭގޮތުން އެއްވެސް މައުލޫމާތެއް ރައީސް އޮފީހުން ވެސް އަދި ބީއެމްއެލުން ވެސް ހާމަކޮށްފައެއް ނުވެ އެވެ.
ކާޑު ލިމިޓުތަކަށް ގެނައި ބަދަލުތައް
- މިހާރު ދޫކޮށްފައިވާ ޑެބިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
- މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
- މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓް ކާޑުތައް: މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުމެވެ.
މި ބަދަލުތައް ގެނައީ ބޭންކަށް ޑޮލަރު ލިބުން ދަތިވެ ގަންނަން ލިބޭ ޑޮލަރަށް ވުރެ އިތުރަށް ބޭންކުން ވެސް ޑޮލަރު ހޭދަކުރަން ޖެހުމުގެ ސަބަބުންނެވެ.
"މި އަހަރު ތެރޭ ކަސްޓަމަރުން އަތުން ބޭންކަށް ގަންނަން ލިބުނީ ގާތްގަނޑަކަށް 60 މިލިއަން ޑޮލަރު. އެހެން ނަމަވެސް ކާޑުތަކުން ކުރެވުނު މުއާމަލާތްތަކުގެ އަދަދު މީގެ ތިން ގުނަ ބޮޑު. ކާޑު ބޭނުންކުރާ މިންވަރު އިތުރުވުމަކީ ވިޔަފާރިތަކަށް ބޭންކުން ދޫކުރާ ބޭރު ފައިސާގެ އަދަދު ނުހަނު ބޮޑު މިންވަރަކަށް ދަށްވެގެންދާ ކަމެއް," ީއެމްއެލްގެ ސީއީއޯ އެންޑް މެނޭޖިންގ ޑައިރެކްޓަރު ކާލް ސްޓުމަކް ވިދާޅުވި އެވެ.
ތަފާސްހިސާބަށް ބަލާއިރު ކާޑުތައް ބޭނުންކޮށްގެން މައިގަނޑުކޮށް ކުރާ ދަތުރުތަކާއި އޮންލައިން ވިޔާފާރިތަކަށް ވުރެ އިގްތިސާދީ މުހިންމު ހަރަކާތްތަކަށް ބޭންކުން ހޭދަކުރާ ބޭރު ފައިސާގެ މިންވަރު 75 ޕަސެންޓު ދަށްކަމަށް ވެސް ބޭންކުން ބުނެފައިވެ އެވެ.
ގައުމުގެ މާލީ ހާލަތު ދަށަށް ދިޔުމާއި އެ ނޫން ވެސް އިތުރު ބައެއް ސަބަބުތަކާ ހުރެ، ޑޮލަރުގެ އަގު އުފެލުމުން ގޮސް ކަޅު ބާޒާރުގައި ޑޮލަރެއްގެ އަގު މިހާރު ހުރީ 18.50 ގަ އެވެ.
