ރާއްޖޭގެ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ޑޮލަރު މުއާމަލާތްތައް އެއްކޮށް ކަނޑާލަން އެ ބޭންކުން ނިންމުމުން އާންމުންގެ ނުރުހުން ވަރަށް ބޮޑަށް އެކަމަށް އަމާޒުވެއްޖެ އެވެ.

ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް ބީއެމްއެލްގެ ބޯޑުން ފާސްކުރީ އިއްޔެ އެވެ. ބޭންކުގެ އެ ނިންމުމަށް އަމަލު ކުރަން ފެށިކަން މިއަދު ބީއެމްއެލުން ވަނީ އިއުލާނު ކޮށްފަ އެވެ.

ބޭންކުގެ އެ ނިންމުމާ މެދު ހިތްހަމަނުޖެހުން ފާޅުކޮށް ރެއިން ފެށިގެން އާންމުން ދަނީ ސޯޝަލްމީޑިއާގައި ހިޔާލުފާޅު ކުރަމުންނެވެ. އެ ނިންމުމާ ދެކޮޅަށް ހިޔާލުފާޅު ކުރި ބައެއް މީހުން ބުނީ މި ސަރުކާރުން ވެރިކަމަށް އައުމަށް ވީ ވައުދުތައް ފުއްދުމުގައި ފެއިލްވެފައިވާ ކަމަށެވެ. އަދި، ރުފިޔާ ކާޑުތަކުން ރުފިޔާ ނުނެގޭނެ ދުވަސް ވެސް އަންނާނެ ކަމަށް ވެސް ބައެއް މީހުން ބުންޏެވެ.

"ގައުމު މެނޭޖު ކުރަން ނޭނގޭ މީހަކު ވެރިކަމުގައި އިތުރަށް ހުރެއްޖެ ނަމަ، ރާއްޖެއަށް ތެލާއި ކާބޯތަކެތި ލިބުން ވެސް ހުއްޓި ދާނެ، ރައްޔިތުން ބޭނުން ވަނީ ވެރިންނަށް ކާންދީފައި ރައްޔިތުން އަޅުންގެ ގޮތުގައި ތިބެން ނަމަ، ކެތް ކޮށްލާ،" ބީއެމްއެލްގެ ނިންމުމާ ދެކޮޅަށް ހިޔާލުފާޅު ކުރި މީހަކު ބުނެފައިވެ އެވެ.

ބޭންކުގެ ނިންމުމާ ގުޅިގެން ހިޔާލުފާޅުކުރި ބައެއް މީހުން ބުނީ މިއީ ވަރަށް ކަންބޮޑުވާ ނިންމުމެއް ކަމަށާއި އެ ނިންމުމުގެ ސަބަބުން ކުދި އަދި މެދުފަންތީގެ ވިޔަފާރިތަކަށް ވަރަށް ބޮޑަށް ގެއްލުންވާނެ ކަމަށެވެ.

"މި ނިންމުމުގެ ސަބަބުން ބޭރުން ތަކެތި ގެނެސްގެން އޮންލައިން ވިޔަފާރި ކުރާ ފަރާތްތަކަށް ބޮޑު ގެއްލުމެއް ލިބޭނެ، އަދި މީގެ ފަހުން ނެޓްފްލިކްސް، އެމޭޒަން ޕްރައިމް، ޓްވިޓާ، ފޭސްބުކް، އިންސްޓާގްރާމް އަދި ސޮފްޓްވެއާ ސަބްސްކްރިޕްޝަންތަކަށް ވެސް ފައިސާ ދެއްކޭނީ ޑޮލަރު އެކައުންޓަކުން،" ގާލިބު ސަލީމް ކިޔާ މީހަކު އެކްސްގައި ލިޔެފައިވެ އެވެ.

ބޭންކުގެ ނިންމުމާމެދު ކަންބޮޑުވުން ފާޅު ކުރައްވައި އިދިކޮޅު އެމްޑީޕީގެ ޗެއާޕާސަން ކުރެއްވި ޕޯސްޓެއްގައި ވިދާޅުވީ މި ބަދަލުގެ ސަބަބުން ޕްރައިވެޓު ސެކްޓަރުގެ އިގުތިސާދަށް ކުރާނެ ނޭދެވޭ އަސަރު ސަރުކާރަށް އެނގިވަޑައިގަންނަވާނެ ކަމަށެވެ.

އަދި، މިފަދަ ކުއްލި ބަދަލެއްގެ ސަބަބުން ދަރިވަރުންނާއި ވިޔަފާރިތަކަށް ވަރަށް ނޭދެވޭ އަސަރު ކުރާނެ ކަމަށް ފައްޔާޒު ވިދާޅުވި އެވެ. އެގޮތުން, ބޭރުގެ ވެބްސައިޓުތަކާއި ސޮފްޓްވެއާތަކަށް ފައިސާ ދެއްކުމަށް ބުރޫ އަރާނެ ކަމަށް ވެސް ފައްޔާޒު ވިދާޅުވި އެވެ.

"މުއިއްޒު ވައުދުވެވަޑައިގަތީ އިގުތިސޯދާ މެދު އެއްވެސް ވަރަކަށް ކަންބޮޑުވެވަޑައިނުގަންނަވާ ކަމަށާއި، އަދި ފަހުން ވަރަށް ހަރުކަށިކަމާއެކު ވިދާޅުވީ ޑޮލަރުގެ ކަޅު ބާޒާރުގެ ރޭޓް އިތުރު ނުވާނެ ކަމަށް. ދައުލަތުގެ އެންމެ އިސްވެރިޔާގެ މިފަދަ މައުލޫމާތު ނެތް ނިންމުންތަކުގެ އަސަރު ހުރިހާ ދާއިރާއަކަށް ކުރާނެ," ފައްޔާޒު ވިދާޅުވި އެވެ.

ބީއެމްއެލްގެ ނިންމުމާ ގުޅިގެން އެ ބޭންކުގެ ކޯލު ސެންޓަރުގެ ހިދުމަތަށް ވެސް މިއަދު ވަނީ ބުރޫ އަރައިފަ އެވެ.

ކާޑު ލިމިޓުތަކަށް ގެނައި ބަދަލުތައް

• މިހާރު ދޫކޮށްފައިވާ ޑެބިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
• މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ,
• މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓް ކާޑުތައް: މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުމެވެ.

މި ބަދަލުތައް ގެނައީ ބޭންކަށް ޑޮލަރު ލިބުން ދަތިވެ ގަންނަން ލިބޭ ޑޮލަރަށް ވުރެ އިތުރަށް ބޭންކުން ވެސް ޑޮލަރު ހޭދަކުރަން ޖެހުމުގެ ސަބަބުންނެވެ.

މިދިޔަ އަހަރު އެކަނިވެސް ގަންނަން ލިބުނު އަދަދަށްވުރެ އިތުރަށް 333 މިލިއަން ޑޮލަރު ބީއެމްއެލުން ވިއްކާފައިވާ ކަމަށް އެ ބޭންކުގެ ސީއީއޯ ކާލް ސްޓުމްކެ ވިދާޅުވެފައިވެ އެވެ.

ގައުމުގެ މާލީ ހާލަތު ދަށަށް ދިޔުމާއި އެ ނޫން ވެސް އިތުރު ބައެއް ސަބަބުތަކާ ހުރެ، ޑޮލަރުގެ އަގު އުފެލުމުން ގޮސް ކަޅު ބާޒާރުގައި ޑޮލަރެއްގެ އަގު މިހާރު ހުރީ 18.50 ގަ އެވެ.

ބީއެމްއެލްގެ މި ނިންމުމާއެކު ޑޮލަރުގެ ރޭޓު ކަޅު ބާޒާރުގައި އަގު އަދިވެސް ބޮޑުވާނެ ކަމަށް ބެލެވެ އެވެ.