ބާސެލޯނާ (އޮގަސްޓް 25) - ލަމީން ޔަމާލް މި ސީޒަނުގައި ޖެހި ފުރަތަމަ ގޯލާ އެކު، ބާސެލޯނާ އިން 2-1 އިން އެތުލެޓިކް ބިލްބާއޯ ބަލިކޮށް، މި ފަހަރުގެ ސްޕެނިޝް ލީގުގައި ކުޅުނު ދެ ވަނަ މެޗުން ވެސް މޮޅުވެއްޖެ އެވެ.
ބާސެލޯނާ ދަނޑުގައި ރޭ ކުޅުނު މެޗުގެ 24 ވަނަ މިނިޓްގައި ޔަމާލް ވަނީ އޭރިއާ ބޭރުން ޖެހި ޝޮޓަކުން ސީޒަނުގައި އޭނާގެ ފުރަތަމަ ގޯލު ކާމިޔާބުކޮށްފަ އެވެ. ޔަމާލް، 17، ޖެހި ބޯޅަ ގޯލަށް ވަނީ، ބިލްބާއޯގެ އިނީގޯ ލެކުއޭ ފައިގައި ޖެހިފަ އެވެ.
ބިލްބާއޯ އިން ފުރަތަމަ ހާފު ނިމުމުގެ ކުރިން އެއްވަރުކުރީ ޕެނަލްޓީ އަކުންނެވެ. މިއީ، ބާސެލޯނާގެ ޑިފެންޑަރު، ޕައު ކުބަރްސީ، އެ ޓީމުގެ އޭރިއާތެރެއިން، ބިލްބާއޯގެ އަލެކްސް ބެރެނެގުއޭ އަށް ކުރި ފައުލަކަށް ދިން ޕެނަލްޓީ އަކުން އޮއިހާން ސަންކޭޓް ޖެހި ގޯލެކެވެ.
ލީގުގެ ފުރަތަމަ ހަފްތާގައި ބާސެލޯނާ އިން ވެލެންސިއާ ބަލިކުރިއިރު ދެ ގޯލު ޖެހީ ވެސް، ރޮބަޓް ލެވަންޑޯސްކީ އެވެ. މި މެޗުގައި ވެސް ބާސެލޯނާ މޮޅުކޮށްދިން ގޯލު ޖެހީ ލެވަންޑޯސްކީ އެވެ. ޕެޑްރީ ފޮނުވާލި ބޯޅައެއް ބިލްބާއޯގެ ކީޕަރު، އަލެކްސް ޕަޑީޔާ އަތުގައި ޖެހިފައި ނުކުތް ވަގުތު ލެވަންޑޯސްކީ ވަނީ ގޯލަށް ބޯޅަ ފޮނުވާލައިފަ އެވެ.
މި ފަހަރުގެ ޓްރާންސްފާގައި ބާސެލޯނާ އިން ގެނައި، ސްޕެއިނުގެ މިޑްފީލްޑަރު، ޑެނީ އޮލްމޯ އަށް އަދިވެސް މެޗެއްގައި ނުކުޅެވެނީ، އޭނާގެ ރެޖިސްޓްރޭޝަން މަަސައްކަތް ބާސެލޯނާ އަށް ނިންމާލެވިފައިނުވާތީ އެވެ. ބާސެލޯނާ އިން އަދިވެސް ކުޅުންތެރިން މަދުކޮށްގެން ނޫނީ އޮލްމޯ ރަޖިސްްޓްރީ ކުރެވޭނެ ގޮތެއް ނެތެވެ. އެއީ، އެ ކްލަބްގެ ސްކޮޑު ކޯސްޓްގެ އަގު އުޅެނީ ގަވާއިދު ތަންދޭ މިންގަނޑަށް ވުރެ މަތީގަ އެވެ.
