ލަންޑަން (އޮގަސްޓް 24) - މެންޗެސްޓާ ޔުނައިޓެޑް އަތުން 2-1 އިން މޮޅުވެ، 31 އަހަރުގެ ކޯޗު، ފަބިއަން ހާޒްލާއާ އެކު، ބްރައިޓަން ހޯލްވް އެންޑް އަލްބިއަންގެ ވަރުގަދަ ފެށުން ދަމަހައްޓައިފި އެވެ.
ޕްރިމިއާ ލީގުގެ ތާރީހުގައި ކޯޗުކޮށްދޭ އެންމެ ހަގު ކޯޗު، ހާޒްލާގެ ކޯޗުކަމުގައި ބްރައިޓަން އިން ކުޅުނު ފުރަތަމަ މެޗުން ވަނީ ރަށުންބޭރުގައި އެވަޓަން އަތުން 3-0 އިން މޮޅުވެފަ އެވެ. ދެ ވަނަ މެޗުގައި، އަމިއްލަ ދަނޑުގައި ބްރައިޓަން އިން މި ވަނީ މި ފަހަރުގެ ސީޒަނަށް ރަނގަޅު ޓްރާންސްފާތަކެއް ކޮށްގެން ކުރިމަތިލި ޔުނައިޓެޑް ބަލިކޮށްފަ އެވެ.
އެމެކްސް ސްޓޭޑިއަމްގައި މިއަދު ކުޅުނު މެޗުގައި ބްރައިޓަން އިން ފުރަތަމަ ހާފުގައި ލީޑުނެގި އެވެ. މި ލަނޑު ޖެހީ، 32 ވަނަ މިނިޓްގައި، ބްރައިޓަންގެ ޖަޕާން ވިންގް، ކައޯރޫ މިޓޯމާ ދިން ބޯޅައަކުން ޑެނީ ވެލްބެކް އެވެ. މިއީ، ކުރިން ޔުނައިޓެޑަށް ކުޅުނު ވެލްބެކްގެ ކްލަބް ކެރިއަރުގައި ޖެހި 100 ވަނަ ގޯލެވެ.
ބްރައިޓަންގެ ކޯޗު ހާޒްލާ: އޭނާ ހަވާލުވީ ތިން އަހަރުގެ ކޮންޓްރެކްޓެއްގެ ދަށުން.
ދެ ވަނަ ހާފު ފަށައިގެން ބްރައިޓަން އަށް ލީޑުފުޅާކޮށްދޭން ތަޖުރިބާކާރު މިޑްފީލްޑަރު، ޖޭމްސް މިލްނާ ޖެހި ބޯޅަ ގޯލު ރޮނގުމަތިން ސަލާމަތްކުރީ، ޔުނައިޓެޑްގެ ފުލްބެކް، ޑިއޯގޯ ޑަލޯ އެވެ.
ޔުނައިޓެޑުން އެއްވަރުކުރީ މެޗުގެ 60 ވަނަ މިނިޓްގައި، އަމަދު ޑިއާލޯ ޖެހި ގޯލުންނެވެ. މިއީ، ޔުނައިޓެޑްގެ މޮރޮކޯ ފުލްބެކް، ނުސައިރު މަޒްރައޮއީ ދިން ބޯޅައެއް ހިފައިގެން ގޮސް، ޑިއާލޯ ޖެހި ގޯލެކެވެ. އެ ބޯޅަ ގޯލަަށް ވަނީ ބްރައިޓަންގެ ކުޅުންތެރިއަކު ފައިގައި ޖެހިފަ އެވެ.
ކައުންޓަ އެޓޭކުގައި ޔުނައިޓެޑުން ވަނީ އިތުރު ގޯލެއް ޖަހައިފަ އެވެ. އެކަމަކު، ޔުނައިޓެޑްގެ އަލެހަންދްރޯ ގާނާޗޯ ޖެހި ބޯޅަ އޮފްސައިޑްގައި ހުރި އެ ޓީމުގެ ޖޯޝުއާ ޒާކްޒީ ފައިގައި ޖެހިފައި ގޯލަށް ވަންއިރު، ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށެވެ. ޒާކްޒީ ފައިގައި ނުޖެހި އެ ބޯޅަ ގޯލަށް ވަންނަމަ، އޮފްސައިޑްވުމުގެ ފުރުސަތެއް ނެތެވެ.
ބްރައިޓަން އިން މޮޅުވި ގޯލު ޖެހުމަށް ފަހު އުފާފާޅުކުރަނީ.
ބްރައިޓަން މޮޅުވީ، އިތުރު ވަގުތުގެ ފަސް ވަނަ މިނިޓްގައި ޖޮއާއޯ ޕެޑްރޯ ޖެހި ގޯލުންނެވެ. އޭނާ މި ލަނޑު ޖެހީ ބަދަލަކަށް ކުޅެން އެރި ސިމޯން އަޑިންގްރާ ނަގައިިދިން ހުރަހަކުން ބޮލުންނެވެ. ޕެޑްރޯ މި ލަނޑު ޖެހީ އޭރިއާތެރޭގައި ހުސްކޮށް ހުރެ އެވެ.
ދެ ވަނަ ހާފުގައި ޔުނައިޓެޑުން ވަނީ އެޓޭކްތަކެއް ކުރެވޭތޯ ގިނަ ބަދަލުތަކެއް ކޮށްފަ އެވެ. އެ ގޮތުން، އެ ޓީމަށް ބްރައިޓަންގެ ކީޕަރު ޖޭސަން ސްޓީލް ޓެސްޓް ކުރެވޭ ވަރުގެ ރަނގަޅު ހަމަލާތަކެއް ފޮނުވާނުލެވުނެވެ.
މިއީ މި ފަހަރުގެ ސީޒަނުގައި ޔުނައިޓެޑް ބަލިވި ދެ ވަނަ މެޗެވެ. އެ ގޮތުން، ސީޒަން ފަށަން ކުޅުނު ޗެރިޓީ ޝީލްޑް މެޗުން ޕެނަލްޓީ ޖަހައިގެން މެންޗެސްޓާ ސިޓީ އަތުން ވަނީ ބަލިވެފަ އެވެ. ޕްރިމިއާ ލީިގުގައި ޔުނައިޓެޑް ކުޅުނު ފުރަތަމަ މެޗުން ވަނީ އަމިއްލަ ދަނޑުގައި ހަނިގޮތަކަށް 1-0 އިން ފުލަމް އަތުން މޮޅުވެފަ އެވެ.
