ސަރުކާރު މަސް ކުންފުނި، މިފްކޯއިން 1999 އިން ފެށިގެން ކ. ކަނޑުއޮތްގިރީގައި ހިންގަމުންދިޔަ މަސް ކާރުހާނާ ހުޅުމާލެއަށް ބަދަލުކުރަން ބޭނުންވާ ބިން ލިބެންދެން އެތަނުގައި ކުރި މަސައްކަތްތައް ޅ. ފެލިވަރަށް ބަދަލުކުރަން ނިންމާފައިވާ ކަމަށް އެ ކުންފުނިން ބުނެފި އެވެ.
މިފްކޯއިން ނެރުނު ބަޔާނެއްގައި ބުނީ، ކަނޑުއޮތްގިރީގައި ކުރަމުންދިޔަ މަސައްކަތްތައް ހުއްޓުނީ އެ ރަށުގެ ބަދަލުގައި ހުޅުމާލެއިން ބިމެއް ދިނުމަށް މި ހިނގާ އޯގަސްޓް 4، ގައި ކެބިނެޓުން ނިންމުމުން ކަމަށެވެ. މިފްކޯއިން ބުނަނީ ކަނޑުއޮތްގިރިއަކީ މިފްކޯގެ ލައިފްސްޓައިލް ޕްރޮޑަކްޓްތަކުގެ މައި ހަބެވެ.
ޑިމާންޑު ބޮޑުވުމާއެކު، މި ޕްރޮޑަކްޓުތައް އުފެއްދުމުގެ މަސައްކަތް ފެލިވަރުގައި ކުރެވޭނެ ގޮތް ހެދުމަށް މަސައްކަތް ކުރަމުންދާ ކަމަށާއި އެކަމަށް ވަގުތުތަކެއް ނަގާނެކަމަށް އެ ކުންފުނިން ބުންޏެވެ.
"ކުއްލިއަކަށް ޕްރޮޑަކްޝަން ބަދަލުކުރުމަކީ އަޅުގަނޑުމެންނަށް އޮތް ވަރަށް ބޮޑު ޗެލެންޖެއް. އެހެން ނަމަވެސް ހުޅުމާލެއިން ރަނގަޅު ތަނެއް ހަމަޖެހެންދެން މިވަގުތަށް ފެލިވަރަށް ބަދަލުކުރަން އެބަޖެހޭ. އެކަމުގައިވެސް ހަރަދުތަކެއް ހިނގާނެ. ލައިފްސްޓައިލް އަދި ކަންނެލި މަހުގެ އުފެއްދުންތަކަށް އޮންނަ ޑިމާންޑު އެހާމެ ބޮޑުވެފަ މިއީވެސް އާންމުންގެ ޝަކުވާ އިންތިހާއަށް އޮންނާނެ ކަމެއް،" ސަރުކާރުގެ ކުންފުނިން ބުންޏެވެ.
ލަފައިފުރުމުގެ ދަތިކަމާ ހުރެ ބަނދަރު އަޕްގްރޭޑު ކުރުމަށް ބޮޑު ޕްރޮޖެކްޓެއް ހިންގި ކަނޑުއޮތްގިރިން، މިފްކޯގެ މަސް ފެކްޓަރީ ބަދަލުކޮށް އެ ރަށް ދޫކޮށްލަން ނިންމާފައިވާކަން ސަރުކާރުން ފުރަތަމަ އިއުލާނުކުރީ ޖޫން 13، ގަ އެވެ. އެދުވަހު މަސްވެރިން ކުރި މުޒާހަރާއެއްގެ ބައިވެރިންނާ މުހާތަބުކުރައްވާ ފިޝަރީޒް މިނިސްޓަރު އަހުމަދު ޝިޔާމު ވިދާޅުވީ، ކަނޑުއޮތްގިރީގެ ބަދަލުގައި ހުޅުމާލެއިން ބިމެއް ހޯދަން އެޗްޑީސީއާއެކު މަސައްކަތް ކުރަމުންދާ ކަމަށެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޝިޔާމު ވަނީ އެ ރަށް މިހާރު އެމްއެންޑީއެފް އާ ހަވާލުކޮށްފައިވާ ކަމަށް ވެސް ވިދާޅުވެފަ އެވެ. ނަމަވެސް ހުޅުމާލެއިން ބިން ހޯދުމަށް އަދިވެސް ކުރެވެނީ މަޝްވަރާ ކަމަށް ވެސް އެ ދުވަހު ވިދާޅުވި އެވެ.
ކަނޑުއޮތްގިރިއަށް ކުރި ހޭދަތައް ފާހަގަކޮށް މިފްކޯއިން އިތުރަށް ބުނީ، އެ ރަަށަށް ލިބިފައިވާ އިންވެސްޓުމަންޓުތަކުގެ ބޭނުން ހިފުމަށް ހުޅުމާލެއިން ވަރަށް އަވަހަށް ބިމެއް ބޭނުންވާ ކަމަށެވެ. އަދި، ސެޕްޓެމްބަރު 15، ގެ ކުރިން ކަނޑުއޮތްގިރި ހުސްކުރަން އަންގާފައިވާކަން ވެސް އެ ކުންފުނިން ފާހަގަކޮށްފައިވެ އެވެ.
