ލަންޑަން (އޮގަސްޓް 23) - ޔުއެފާ ކޮންފަރެންސް ލީގުގެ ޕްލޭއޮފްގައި ސްވިޒަލެންޑްގެ ސާވެޓް އަތުން 2-0 އިން މޮޅުވެ، ޗެލްސީން މުބާރާތުގެ ގްރޫޕް ސްޓޭޖާ ގާތަށް ޖެހިލައިފި އެވެ.
އަންނަ ހަފްތާގައި، ސްވިޒަލެންޑްގެ ޖެނީވާގައި ސާވެޓް ދަނޑުގައި ކުޅޭ މެޗުން އެއްވަރުކޮށްލައިގެން ނޫނީ އެއް ލަނޑުގެ ފަރަގަކުން ބަލިވިޔަސް ޗެލްސީ އަށް ޔޫރަޕްގެ ތިން ވަނަ ފަންތީގެ ކްލަބް ފުޓްބޯޅަ މުބާރާތް، ކޮންފަރެންސް ލީގުން ޖާގަ ލިބޭނެ އެވެ.
ރޭގެ މެޗަކީ ޗެލްސީގެ ކޯޗުކަމާ އެންޒޯ މަރެސްކާ ހަވާލުވި ފަހުން ރަސްމީ މެޗަކުން އެ ޓީމު މޮޅުވި ފުރަތަމަ ފަހަރެވެ. މަރެސްކާގެ ފުރަތަމަ މެޗުގައި ޗެލްސީ ވަނީ އިނގިރޭސި ޕްރިމިއާ ލީގުގައި މެންޗެސްޓާ ސިޓީ އަތުން 2-0 އިން ބަލިވެފަ އެވެ.
ސްޓެމްފޯޑް ބްރިޖުގައި ރޭ ކުޅުނު މެޗުގައި ޗެލްސީން ދެ ލަނޑު ވެސް ޖެހީ ދެ ވަނަ ހާފުގަ އެވެ. އެ ގޮތުން، އެ ޓީމުން ލީޑުނެގީ 50 ވަނަ މިނިޓްގައި ކްރިސްޓޮފާ އެންކުންކޫ އެވެ.
ޗެލްސީ އަށް ލީޑުފުޅާކޮށްދޭން 18 އަހަރުގެ ސްޕެއިން ފޯވާޑް، މާކް ގުއިއޫ އަށް ލިބުނު ރަނުގެ ފުރުސަތުގައި، އޭނާ އަށް ގޯލެއް ޖެހޭގޮތެއްނުވި އެވެ. ސާވެޓްގެ ކީޕަރު، ޖެރެމީ ފްރިކް ހެދި ގޯހެއްގެ ފައިދާނަގައި ގުއިއޫ އަށް ލަނޑު ޖަހަން ލިބުނު ފުރުސަތުގައި ހުސް ގޯލެއް ކުރިމަތީގައި ހުރެ ވެސް އޭނާ އަށް ރަނގަޅަށް ފޮނުވާނުލެވުނެވެ.
މެޗުގެ 72 ވަނަ މިނިޓްގައި ޗެލްސީން މި މެޗުގެ މޮޅު ކަށަވަރުކުރީ ބަދަލަކަށް ކުޅެން އެރި ނޯނީ މަޑުއޭކޭ ޖެހި ގޯލުންނެވެ. އޭރިއާތެރެއިން ލިބުނު ފުރުސަތުގައި މަޑުއޭކޭ ވަނީ ހަނި އޭންގަލުން ގޯލުގެ ތެރެއަށް ބޯޅަ ފޮނުވާލައިފަ އެވެ.
